LUK 4
4
Uiyv Jisun Pooka-yirkanam
(Mt 4:1-11; Mk 1:12-13)
1Jisu dvrwqbo yal rooxo tvl Jordon hoqgv wkur kunum hoo Yalv mwam deexa-rarab bool wgnum, 2uiyv deexa-rara ho aal campigo mwam pooka-yirkal doognum. Hoq mood mwlwho mwv hog akkam dvma-twwmab doonum. Hoo hwdlo hoq tuluhv nyinya yukho, mwv kano kunum. 3Ui akv mwam benum, “Pwnbog Kov jaqloqkam soq wlw sam wtwb nyitwk hvl beto.” 4Jisu birwqnum, “Dvrwqbo potalo hvl bedwn, nyiv wtw rooxongam dvl swwma dvn.” 5Hoq kokw so Ui akv mwam nyiody puutu golo booca banv gvda gvtwg lvpw haty mwlwngam nyiqyab-nyiqbio kama daab kaakinum. 6Ui akv mwam benum. “Ngo nam soqg atoram la yuunam mam swwg mvdwb jitayin, soq hog mwlwngam ngoqg alaqb jipa kun, hoo hiyv jaqkam ngoqg jib mwwnam mam ngo sam jitayin. 7Hoqgab no ngam lwbw kumbwl xumb nyiloqkam soqg hog mwlwngv noqg gab kvda dootayin.” 8Jisu birwqnum, “Dvrwqbo potangv bedwn, Noqg Pwnbo At Sw xumto, hoqgv mwam rooxo paqto.”
9Hoq kokw so ui akv mwam Jerusalem bool wgnum hoo Xumk nammwg mwwlo aoho doom tvl benum, “No Pwnbog Kov jaqloqkam soqgv no atv poqpoq kaato. 10Hoggab dvrwqbo potalo bedwn, ‘Pwnbov nam hvvminl kaaya mvdwb mwwg ao gvdag gumtw tulungam kanam tayin.’ 11Ho si hvlakam bedwn “Noqg lvpiangam wlw aolo hodaql vc mvma dvb bulv nam bulug alaqkv joorab aptayin.” 12Jisu mwam birwqnum, “Dvrwqbo potalo bedwn noqg Pwnbo At Swn pooka-yirka dvb nyimadvn.” 13Hwdlo Uiyv pooka-yirkanam mam nyiyum yukun, uiyv mwam mood toggoq ak kaapa namgub apaqpel wleqnum.
Jisu Mwwg Bonam Galiliho Nyirabnum
(Mt 4:12-17; Mk 1:14-15)
14Kokw so Jisu Galilib wkur kunum, hoqgv dvrwqbo yalwg atorv mwwg lvgab doonum. Mwwg puiyv hoq gvda gvt tvqpwb wiywq kunum. 15Mwv Sinagog nam nvmxy lo tomswr banv yvnum, hoo nyi mwlwngv mwam paqnum.
Jisun Najaretho Haqxianum
(Mt 13:53-58; Mk 6:1-6)
16Kokw so Jisu mwam sotv ko Najaretwb wkurnum, hoqgv Doonu ko aalho mwv Sinagog nammwb wnum. Mwv dvrwqbo pota hoqgv poory rilin dvb daqrabnum. 17Ho mwam nyiqry kaanbov pota taqam mwwg alaqho gvqlwqnum. Mwv hoq pota taqam lwqkonv soq sam xeqpwl ap koam kaapanum. 18“At Swg yalv ngoqg aosi doodwn,
hoggab mwv ngam jwwgw nyi tulungam
Tugu Puiyam bekin mvdwb ngam xuqpan.
Mwv ngam nyuum nyi tulungam bulam tolin mvdwb pui bekin taak hvl hoo nyiqca bo nyi tulungam kaapa taikun hvl bekin taak hvl kanam pakun,
ho nyijab-nyiyiqnam nyi tulungam naalin mvdwb ngam kanam pakun.
19Hwdlo aalam At Swg nyi tulungam ywwt ywwtayin
hoq moodam bekin taak hvl ngam kanamnum!”
20Kokw so Jisu pota taqam tiqtkul sam jinbo akam jikur tukul mwv doa kunum. Sinagog uraho doonbo nyi mwlwngv mwam vnyiqngv kaagab lalal doonum. 21Mwv bulam goorabnum, “Nulv poorynam mam tagnvba, soq dvrwqbo pota poorynam si niqtuq lengpa ku.”
22Bulv mwwg benam mam tvlwq alnum, hoo mwwg agam hoqgv agam tangam albo agam goonam mam tatwl bulv lomnyanum. Bulv benyanum, “Mwv Josap ko ak hvvma i?”
23Mwv bulam benum, “Hvbmabde nulv ngam soq niitin sam tingl betayin, ‘Nyub no atv atam mwp suto,’ ho nulv hvlakam ngam betayin Kaparnahum, alo nyinam akinam no sookam noqg at nampam so nyito.” 24Jisu hvlakam benum, ngo nulam jvqtw jaqb bekin dvn, “Nyiqry kaanbo nyiam hiyv nvkam atwg gvda lo nywywngam looma dvn. 25Ngam tagabto, si jvqtw jaqkv Ilijag swwca dukho Israel gvdaho vijaqg xwwmiv doonum. Vnyw nyium gola nywpo gob vcwr gokam nyodo homab doodwkho gvda gvtwb dwr poot jaq poog wiywq paqnum. 26Ilija bulug acam hoqkv hiyv nvkam Israel dookub kanam maanum, hvbmabde Sidon gvdag Jarepat nampamg xwwmy dookub kanam twqnum. 27Nyiqry kaanbo Ilijag swwca dukho Israel gvdaho vijaqg tviyiq nyinbo nyiv doonum hiyv nvkam mwp nyomanum, hvbmabde Siriya nyi gvdag Naaman rooxon mwp twqnum.” 28Sinagog namho doonyia bo nyi mwlwngv sam tapa tvl hang os bvkam lengmanum. 29Bulv daqrabnyianv Jisun nampam bviywrb seelin seepaqnum, hoqgv wlw lwwtaq bwdw dwraq golo mwam paqgeq lotab bulug nampam paal dookwg yorn pooywb bulv mwam boocal caagnum. 30Hvbmabde mwv bulug maqra lvpajaq hoqgv mwwg at lamtab wknum.
Sony Cenam Nyi
(Mk 1:21-28)
31Kokw so Jisu Galiliho doonbo Kaparnahum nampam wnv Doonu dvk aalho nyi tulungam tomswrnum. 32Mwlwngv mwwg tomswrnam mam vcjaqb lomnum, hoggab mwwg benamv gvmr abjaqb benum. 33Sinagog nam uraho sony cenam nyi ak doonum, mwv sogoq banv vcjaqb benum. 34“Oa, Najaretwg Jisu noqg lvgab ngulv hognvkv nyisv doodwn? No ngulam mengta bviyv soq haadwn? No hiyv ham ngo cengdwn, No Pwnbog Dvrwq Ak hv sulak!” 35Jisu sonyiam benum, “Cooikab dooto” Ho sonyiv nyi akam nyi tulug agalo hurpaq pel mwam hog gokam mvnyi maab mwwg hoqgv agab lengknum. 36Ho mwlwjaqkv lomnya banv akwn akwn bemin sunum, “Soq si hognvk jaq agam muiyu? Gvmrjaq bvla ator lvgab soq nyi aksi sony mwlwngam gaml jiyikam, hoo bulv agab lengdwn.” 37Hoq gabnvl mwwg puiyv hoq gvda gvt tvqpwb yuupw kunum.
Jisu Vcbo Nyiam Vigo Mwpnum
(Mt 8:14-17; Mk 1:29-34)
38Jisu Sinagog nammam apaqpel Simong nammwb wnum. Simong aiyu akv aram karl doonum hoo bulv hoq nyem ak gab mwam goqnum. 39Mwv hoq nyem akwg dookub wbnv mwnwg bviywrho daqtwl aram mam gaml jinum. Ho nyem akam aram karnamv apaq daqxy kalam mwn gorab layil bul mwlwngam cirab-hoorabnum. 40Doonyi haaxo kokw so deedy luuxy vc cil doonbo nyi tulungam Jisug dookub boal haagnum, mwv mwwg alaqkam vcw atwg gv aoho idaq banv bul mwlwngam mwp jiknum. 41Nyi vi yaan tulu hoqgv sony tulu ngvkam xabjol lengnyanum, “No Pwnbog Ko Tuupv!” Hvbmabde bulv mwam Kristo hvl ceng gam gab mwv bulam akv kam goom mvmanum.
Jisu Juhudi Gvdaho Tomswrnum
(Mk 1:35-39)
42Kokw so ar komc yukam Jisu nampam mam apaqpel deexa-rara cumciq galo wnum. Ho nyi tulungv mwam meegaq banv meepa yukam bulv mwam wleq mvma dvb buut xaanum. 43Hvbmabde mwv bulam benum, “Pwnbog lvpwg Tugu Puiyam ngo nampam pvmxiam bekin dvb doodwn, hoq gab Pwnbov ham ngam nyim dvb kanamnum.”
44Hoq gab mwv Juhudi gvdag Sinagog ho tomswr swrkwrnum.
Currently Selected:
LUK 4: NISS
Highlight
Share
Copy
Want to have your highlights saved across all your devices? Sign up or sign in
Nyishi, DVRWQ PVVB @ Bible society of India 2016
