LUK 22

Jisun Mengdwb Ywrsnam

(Mt 26:1-5; Mk 14:1-2; Jn 11:45-53)

1Dvtv Durum hvl benam opap ciqlwq maanam wtw durumko moodv hvvnwq kunum. 2Nyub buda tulungv la pvvb tomswrbo tulungv Jisun mengdwb mengk pagoqkam meekar banv sur rusil doonum, hoggab bulv nyi tulungam bos sonum.

Judas Iskeriot Jisun Nyepinam

(Mt 26:14-16; Mk 14:10-11)

3Ho Uiyv Judas Iskeriot hvl goqnam urab haanum, mwv buu wyw leq vnyig pengko hoggv akwn. 4Hoqgab mwv hog bvxeq Jisun bulug alaqho gvqlwq dvb nyitayin, hoq pagoqkam nyub buda tulu gvla saab tulug lvgab bibwq mins dvb wnum. 5Hoo bulv hempnum, mwam twngk jidwb goobwq kunum. 6Ho Judas loorwqnum hoo nyi tulungam cengma dvb bulug alaqho Jisun nyepin tvl gvqlwq dvb sur bwwl cucub kaayal doonum.

Jisu Dvtv Durum mam Dvtab Nyinam

(Mt 26:17-25; Mk 14:12-21; Jn 13:21-30)

7Kokw so opap kiilwq maanam wtw durum dvd aalv haaikukam Dvtv durum ho sviya koam patabl dvd aalv haaknum. 8Jisu Pitor nvla Jonnvn soq sam bilwqnv kanamnum: “Wgdvl Dvtv durum mam dvdwb mwx-mvaql ap yaata.” 9Bulv birwqnum, “Hogloq ho soq sam ngulam mwx-mvaql aptak hvl no bedwn?” 10Mwv bulam benum, “Kaato, hwdlo nulv bopam urab haaikam, iss uppum pumg jootwl nyi ak nulam wrwq tayin, nulv mwwg kokw kokwb wmin gvgdvl mwwg haak nam urab haamin gvta. 11Nam atam beta, ‘Tomswr bov nam bilwqpa ngoqg buu tulungv la ngo Dvtv durum dvdy ko imiqkv hoglo?’ 12Mwv mwwg nam aoho mwsiqnam imiq miqt albo golo hog mwlwngam doodwb kaapa tayin; hoqho nulv mwx-mvaq ta.

13Hoo bulv wknv bulam Jisug bekinko jaqb hog mwlwngam kaapa tukul bulv Dvtv durum dvsam mwx-mvaql munul ap kunum.

At Swg Swrsa Dvnam

(Mt 26:26-30; Mk 14:22-26; 1 Kor 11:23-25)

14Kokw so moodv haaikukam, Jisu xuqnam nyi tulu lvgab tebol ho dvdwb doa mingnum. 15Jisu bulam benum, “Ngo hentwr hema daab nulug lvgab soq Nyedarko durum dvnam sam dvdwb ngo mwwkynum! 16Hoggab ngo nulam bekin dvn, Pwnbog lvpw lo soq si niqtuq lengma deedib ngo sam dvram.”

17Kokw so Jisu twwn nan pvtaqngam naarab banv Pwnboam paqnum, hoo mwwg buu tulungam benum, “Nulv sam naagdvl twwbam to; 18Hoggab ngo nulam bekin dvn Pwnbog lvpwngv haama deedib, ngo sija galoqkv soq roo ala sam twwkram.” 19Hoo wtwngam naarab banv Pwnboam paqnum, ham pindub banv bulam jijo ywnv benum, “Soq si ngoqg gv soodinv nulgab birnanv. Ngam mwwpa dvb soq sam nyito.” 20Hoq hvbkalam dvnam mam dvxo kalam, mwv bulam twwnam pvtaqngam jinv benum, “Soq pvtaq si nulgab toolinam ngoqg ui lvgab Pwnbog nitib birnanv.

21“Hvbmabde kaato! Ngam nyepin bo akwg alaqkv ngoqg lvgab tebol si dooba do! 22Hoggab sam Pwnbog mwwrko jaqb Nyia Ko Tuupv sitayin; hvbmabde mwam nyepin bo nyi akv vcjaqb hentwr hen nvpv!”

23Hoo bulug pengko ho hiyvjaq soq sam nyita tadwn, ham bulv akwn akwnv tox minsnum.

Hiyv Mwlwjaqkam Koi Yaadwn

24Ho buu tulug pengko ho hogloq akv mwlwngam koi yaadwn hoq pagoqkam bulv hwwiyaq minsnum. 25Hvbmabde Jisu bulam benum, “Soq gvda gvtwg lvpw at tulungv nyi tulug aoho lvpw at saab swwdwn, hoo ab bokum tulungv nyi tulungam niqtuq lengn bov hvl goqdwn. 26Hvbmabde nul lvgab hoqhvb nyima dvn; nulug pengko lo mwlwjaqkam koi yaanbo akv mwlwngam anyo ko hvb nyitayin, hoo nyig-wgbo akv nyera hvb nyitayin. 27Hvnyiloqkam hogloq akv mwlwngam koi yaadwn, dvnam dvtab doabo ak hvviya yv, ma mwwsul hornbo ak hvviya yv? Vvjaqsu dvnam dvtab doabo ak hvvsu. Hvbmabde ngo nulug pengko ho mwwsul dvnam mam hornbo akwb nyidwn.

28“Ngam pooka-yirka dvk mwlwho nulv ngoqg lvgab dooba bo nyi tulungv. 29Hoo ngam ngoqg Ab lvpw ak bwwm dvb jinam hvbkalam, ngokam ham tvlwqnum hoq hvbkalam nulug lvgab mvtayin, 30nulv ngoqg lvpwlo doonbo tebol lo dvba twwba dvb nyiyi nvpv hoo Israelwg nyob wyw leq vnyiam nulv pw-hwwdwb dootayin.

Jisu Pitorg Vm Mvvdynam mam Belinam

(Mt 26:31-35; Mk 14:27-31; Jn 13:36-38)

31“Simon, Simon! Kaato! Uiyv nam gumdo, mwv wtw ammam dorxubnam hvb dorxub tan, 32hvbmabde Simon noqg mwwjwngam niim mvma dvb mwwl ngo noqg gab xumt kunum. Hoo no ngam mwwkur kurxo kokwngam, noqg vbw-bor tulungam no ator mvdwb nyidwb nyitayin.” 33Pitor birwqnum, “At Sw, ngo noqg lvgab pvtwq bvkam wmin gvdwb hoo simin gvd bvkam ngo mwwr svqkwl doodwn!”

34Jisu birwqnum Pitor, “Ngo nam bekin dvn, no ngam kaacin maak hvl luum go bema deedib soi poroqkv xoqram.”

Twngk Kui, Cuk la Lyoqr Orioq

35Kokw so Jisu bulam benum, “Twngk kui, cuk ho luxuq gvma dvb ngo nulam kanam nvmlwq dvkho nulv hog vs-axaq gob nyin mvi yv?” Bulv birwqnum, hog nyimanum.

36Jisu birwqnum, “Hvbmabde sija hiyv twngk kui doogdvn, mwam ham naamto, hoq hvbkalam cukam naamto, hoo hiyv lyoqr orioq doog maadwn, mwam mwwg lvlwqkam puqg dvl daag rvmto. 37Hoggab ngo nulam soq dvrwq pota soq benam mam bekin dvn, ‘Mwam nyic nyia nyinbo nyi tulug lvgab xitaq gvnkun.’ Hvnam si ngoqgab niqtuq nyilin tayin. Hoggab ngam benam pagoqkv jvqtw jaqb nyitayin.” 38Bulv benum, “Kaato, At Sw, soq si lyoqr orioq dvnyi go doodo.” Hoo mwv bulam benum, “Hoqhv jotv ku.”

Jisu Olib Nyiody Aoho Xumnam

(Mt 26:36-46; Mk 14:32-42)

39Hoo Jisu mwwg nyicwb lvvgwb lengnv Olib puutub wgnum, hoo buu tulungv mwam wmin gvnum. 40Hoo hwdlo mwv hoq nyookam wc yukam, mwv bulam benum, “Pooka-yirka koma dvb nulv swgwnam mam swgw gvdvl dooto.” 41Kokw so mwv bulug dook hoqgv goqto gob wlayil lwbwngv kumbw tvl xumnum. 42Mwv benum, “Abv, no mwwd nyiloqkam soq twwnam pvtaq sam ngoqg galoqkv naaxatvb. Hvbmabde ngoqg mwwk bvma noqg mwwlwqb nyimto.” 43Hoo ao toloqgv ao gumtw ak mwam kaakin banv ator jinum. 44Kokw so mwv hentwr alwb henl dwqdwq dwqdwqyab swgwnam mam swgwnum; mwwg gv hoqgv haaxorv ui hilum gob nyitwl kedwb dilnum.

45Mwv swgwnam mam mvxo peekul gorab kunv mwwg buu tulug dookub wkur kunv bulam mwwdwq dwql yubngaql doodwb kaapa kunum, 46hoo mwv bulam benum, “Hoggab nulv yubdul doodu dvn? Pooka-yirka koma dvb nulv gorab gvdwl xuml dooto.”

Jisun Leenam

(Mt 26:47-56; Mk 14:43-50; Jn 18:3-11)

47Mwv hvraqb goodul doodwkho nyi olum gola buu wyw leq vnyig pengko hoggv Judas Iskeriot ngvk hvl benam akv bulam wgnum. Mwv Jisun moopup taab mwwg ogumb wnwqnum, 48hvbmabde Jisu mwam benum, “Judas, no moopup layil Nyia Ko Tuupam nyemaq alaqb gvqlwq gviyin?” 49Hoo hwdlo mwwg taqg-loosaq daqnbo tulungv kaapanum hoo bulv benum, hoggv nyita dvn, “At Sw, ngulv ngulug lyoqr orioq lvgab pag ywnkv i?” 50Hoo bulug akgon nyub butwg nyera akwg nyuru rubwqngam xaqpaqnum.

51Hvbmabde Jisu benum, “Hoboku, soq sam nyikmab!” Mwv nyi akwg nyurungam idaq banv mwam mwp jiknum.

52Ho mwam nootu taab haanbo nyub buda tulungam la xumk nammwg rvkybo tulug saab tulungam la nyi axa tulungam Jisu toxnum, “Dvco conbo nyi tulungam nootu taab wnam hvbkalam ngam hog nyitwl nulv lyoqr orioq kam la dvvpam jootwl ngam nootu taab lengnya yin? 53Ngo nulug lvgab looxiam xumk namlo yvbanum, hoo nulv ngam hiyvkam mvdwb alaq irab maanum. Hvbmabde sija nulug moodv, hoo kanwg atorv.”

Pitor Jisun Cengmakvl Vm Mvvnam

(Mt 26:57-58,69-75; Mk 14:53-54,66-72; Jn 18:12-18,25-27)

54Bulv Jisun leela yukul nyub but abwg nammwb bool wg kunum; hoo Pitor aado aado kvtaq ho kokw-kokwb rumin gvnum. 55Kokw so nyel nam lvpa jaqho bulv wm ak partwl lvkin gob doobamnum. Pitor bulug pengko ho doonum. 56Paqn ko ak mwam rogab jinjin banv benum, “Soq nyi ak siikam mwwg lvgab yvbanum!” 57Hvbmabde Pitor mwam vm mvvnv benum, “Nyemv, ngo mwam cengka maas lak!” 58Hoo oyu maadab miceqg dooxo kokw so, nyi ak mwam kaapa tvl benum, “Nookam bulug pengko ho akgon!” Hvbmabde Pitor benum, “Ma, ngoma sulak!”

59Hoo mood ak dooxo kokw so, nyi asaq ak hvraqb hind-pwcw banv benum, “Jvqtw jaqb soq nyi ak si mwwg lvgab yvba bo ajin akgon, hoggab mwv kam Galili nyiv!” 60Hvbmabde Pitor benum, “Noq nyi no, hognvkam bedwn ham ngo cengma lak!” Mwv hvraqb gool doodu ywk ho poroqkv xoqknum. 61Hoo At Sw nywwkur banv Pitornvn kaagab jinjinum. Hoo Pitor At Swg agam beknam mam mwwpa kunum, “Soi poroqkv xoqma daab, no ngam kaacin maak hvl luum go vm mvvtayin.” 62Pitor agab lengknv vcjaqb mwwdwql xabnum.

Jisun Bej-bepar Banv Jwwnum

(Mt 26:67-68; Mk 14:65)

63Jisun daqg nyanbo rvkybo tulungv mwam bej-bepar banv jwwnum. 64Bulv mwwg vnyiqkam vjv putum tvl mwam toxnum, “Hiyv nam sija jwwn bov nyiqry kaalin kaat!” 65Kokw so bulv mwam vijaqg hvnyw-har dvb bej-beparnum.

Jisun Dookum Agaho Boanum

(Mt 26:59-66; Mk 14:55-64; Jn 18:19-24)

66Ar huto yukam Juhudi nyi axa tulungv lvkin gob wkum banv Jisun bulug nyel dookum ko nammwb boanum. 67“Bulv benum, ngulam bekin tvb, no Ywwnbo ak hvvjaq yv.” Hvbmabde mwv bulam benum, “Ngo nulam bekin baloqkam, nulv ngam mwwjwram, 68hoo ngo nulam tox baloqkam nulv birwq nyoram. 69Hvbmabde sija galoqkv Nyia Ko Tuupv Pwnbog lvqbwq alaq daiyaho doodwb nyitayin.” 70Ho bul mwlwngv benum, “Hoqnyiloqkam, no Pwnbog Ko Tuupv yv?” Mwv bulam birwqnum, “Nulv nyook hvl bedo.” 71Hoo bulv benum, “Ngulv hiyv nvkam hvvky naadwb nyikma! Ngulv atv mwwg agam jaq hoqgv tatkvl tukba!”

Currently Selected:

LUK 22: NISS

Highlight

Copy