LUK 18

Xwwmy Ak la Nyegam Belaqboam Doocnam

1Kokw so bulam hang homa jaqb xumkil doom dvb Jisu bulam doocnam sam bekinnum. 2“Nampam pamg golo Pwnboam bos maanbo hoo hiyamkam modu duma bo nyegam belaqbo nyi ak doonum. 3Hoq nampam pamkin ho xwwmy ak doonum, mwn mwwg dookub haadaq kvlaqnv mwwg bek-nyik dvb mvnyi-moiyul benum, ‘Ngoqg ceebio nyi tulu hoqgv ngam svka tvb!’ 4Meeg oyu gob nyegam belaqbo akv tvmwnum, hvbmabde kokw so mwv atv atam besnum, ‘Ngo Pwnboam bos soma ho nyiam kam modu maasu, 5hvbsujaqkam soq xwwmy ak si ngam bidwq-bekdo, ngo mwnwn jvqtwngam jitayin, hvbmab nyiloqkam mwn haadaq kvlaql ngam bidwq-bekwl bidul doota yi!’” 6Hoo At Sw benum, “Hoq kam dvn bog nyegam belaqbov benam sam tagabto. 7Sija svka taab mwam aal-aiyib xabn bo mwwg nyi tulungam hengl Pwnbov pw-hwwma tai nvi yv? Mwv bulam svka dvb nyinyiaq bvcaqb pw-hwwtayin yv? 8Ngo nulam bedwn mwv bulug ceebio ngam haal pw-hwwtayin hoqgv sam nyebia jaqb nyitayin. Hvbmabde Nyia Ko Tuupv haaiyam, mwwjwngam swcw nvg aoso kaapa tai nvi yv?”

Parisi Tulungam la Gvda Nyooga Kokar boam Doocnam

9Kokw so atam atv alv subo mwws banv asaqkam muiyum yumnbo nyi tulungam Jisu soq doocnam sam bekinnum. 10“Nyi vnyi go xumtab xumk nammwb wnbo bulug akwn Parisingv, hoo akwn hv gvda nyooga kokar bov. 11Parisi akv daqtwl cooikab xumsnum, Pwnboa, ngo nam paqdwn ngo hiyvg hvbkam rvvsw maadwn, nyibum nyiyiq maadwn, nywxw-nyol bwwxin bob, ho gvda nyooga kokar bo hvbkam nyima dvn. 12Ngo haptangam loonyi gogaqb dvma twwmab dery reel doodwn; hoqgv ngoqg door-tvk hoqgv jidynam akam jidwn. 13Hvbmabde gvda nyooga kokar bo akv aado ho daqgin tvl mwwg vnyiqkv doa ao bvkam koodu dvb hampeq maanum, hvbmabde atwg hangam kwdin kwdin banv benum, ‘Pwnboa, ngo nyic-nyiya bo akv, ngam aya mwwpa tvb!’ 14Ngo nulam bedwn, soq nyi ak siilak, nyi akwn hvvma Pwnbov xitkul nammwb wknum. Hoggab hiyvkam atv atam koigob mwwn boam mwam anyo dvb mvtayin, hvbmabde hiyv atv atam anyo dvb mwwsbo akam koi dvb mvtayin.”

Jisu Himy Anyongam Lvqc cinam

(Mt 19:13-15; Mk 10:13-16)

15Kokw so ko anyo tulungam mwam alaq gvbw mvmdvb nyi tulungv bulam Jisug dookub boanum. Hvbmabde buu tulungv ham kaapa tvl bulam yolu ruqnum. 16Hvbmabde Jisu himy tulungam mwwg dookub goqbanv benum, “Himy tulungam ngoqg dookub hvvnwq mvmto! Bulam bitur maab hoggab Pwnbog lvpwngv soq svk tulu gab doodwn. 17Jvqtw jaqb, ngo nulam bedwn, hiyv lajaqkam Pwnbog lvpwngam anyo hvb svgagvrwq maadwn hv hoqb haanyiram.”

Nyetbo Nyi

(Mt 19:16-30; Mk 10:17-31)

18Juhudi tulug lvpw ab ak mwam toxnum, “Albo Tomswrbo, ngo hoggub nyil nwrba cwtam swwgam kaapa tayin?” 19“No hoggab ngam albob bedwn?” Jisu mwam toxnum. “Pwnbo lvvg alo hiyvkam almadwn. 20No birwl apnam mam cengdwn, nywxw-nyol bwwxin maabv, nyi mengmabv, dvco maabv, vm mvvmabv, noqg ab anam modul swwto.’” 21Nyi akv birwqnum. “Yaapa hoqgv jaq ngo soq mwlw birwl apnam sam bugil swwca yin.” 22Jisu sam tatwl mwam, benum, “No sija godab nyis ak doodo. Noqg hog swwnam mwlwngam puqg dvl jwwgwbo nyi tulungam horta, homolo ao gvda tol noqg nyetv dootayin ho haato, hoo ngoqg kokw kokwb wmin gvto. 23Hvbmabde mwv nyet alwb swwgam gab nyi akv sam tatwl mwwdwqnum. 24Jisu mwwg mwwdwqnam mam kaatwl benum, “Pwnbo lvpwb haadwb nyet nyi tulu gab hwdjaqgo vs-axaqnam go! 25Hoggab nyet nyi tulungv Pwnbog lvpwb haam mam lingsam svjinv peqs silo ukob gwwcoql wnamv wngam yaadwn.” 26Sam tanbo tulungv mwam toxnum, ho nyiloqkam hiyv yu nyedarnam mam kaapa tayin, 27Jisu birwqnum, “Nyi gab hognvkv nyila maadwn hv Pwnbo gab nyipw maadwn.” 28Ho Pitor benum, “Kaato, ngulv ngulug nam rongo mwlwngam apaqpel noqg kokw kokwb wmin gvdwn.” 29Jisu bulam benum, Vv, Ngo nulam sam bedwn, hiyvkam Pwnbog lvpw gab nammam, nywxwngam, vbw-boram, ab annam ho ko tulungam Pwnbog lvpw gab apaqpel ludum bov 30soq swwca so ham hilayab kaapa tayin hoo kuiyum mam nwrba cwtam swwgam kaapa tayin.”

Jisug Luum dvb Mwwg Sidynam mam Bekinam

(Mt 20:17-19; Mk 10:32-34)

31Kokw so Jisu buu wyw leq vnyiam boobwq layil bulam benum, “Tagabto! Ngulv Jerusalemb caatayin ho tolo nyiqry benbo tulungv Nyia Ko Tuup gab xeqpnam hog mwlwngv niqtuq lengtayin. 32Hoggab nyoodo nyi tulug alaqlo mwam gvqlwq tayin, ho nyi tulungv mwam bej-bepar tayin hoo hvnyw-har dvb mvtayin, hoqgv mwam tacor curyaqtayin. 33Hoo bulv mwam jwwmwql mvtayin, mwam mengtayin, hvbmabde mwv aal loum deen aalam lokta turkur tayin.” 34Hvbmabde buu tulungv soq benam sam vcwr gokam tacin maanum. Hog nvkam benam hoq niqtuqngam bulv cengmab doonum, hoqgv Jisu hog hvla xeq bidul doonum ham bulv tacin maanum.

Jisu Kokarbo Nyiqca bo Nyi Akam Mwpnum

(Mt 20:29-34; Mk 10:46-52)

35Kokw so Jisu Jerikongam ogum wnwq kunum ho nyiqca bo nyi ak lamta bviywrho dootwl kol doonum. 36Hoq lamtab nyi tulug wnam mam tapa tvl mwv hoq pagoqkam toxnum, “Soq si hoggv yu nyidwn?” 37Bulv mwam birwqnum, “Najaretwg Jisu soq daiyab wdul doodo.” 38Ho mwv sogoql benum, “Debid Ko Tuup, Jisu nga! Ngam aya mwwpa tvb!” 39Otuq daiyab daqnyiabo nyi tulungv mwam cooikab dootwk hvl yolu ruqnum. Hvbmabde mwv dwqdwq dwqdwq yab sogoql benum, “Debid Ko Tuup! Ngam aya mwwpa tvb!” 40Hoo Jisu romol daqnv mwwg ogumb nyiqca bo nyi akam boatvk hvl benum. Mwv ogum wnwq yukam Jisu mwam toxnum. 41“Noqgab ngam hognvkam nyit bvsv mwwdwn?” Ho mwv birwqnum, “Tomswrbo, ngo lokta kaapa nwwdo.” 42Hoo Jisu mwam benum, “Kaato, noqg mwwjwngv nam mwp pakun” 43Hoo dara mwv kaapa kunv Pwnboam paqnv Jisu kokw kokwb wnum, hoo nyi tulungv ham kaatwl Pwnboam Paqnum.

Currently Selected:

LUK 18: NISS

Highlight

Copy