LUK 15

Sviya Niinbo

(Mt 18:12-14)

1Lok aal golo gvda nyooga kokar bov la nwd xipa maanam nyi tulungv Jisug tomswrnam mam tatab haanum. 2Parisi tulungv la Pvvb tomswrbo nyi tulungv budum-bvraml benum, “Soq nyi aksi nwd xipa maanam nyi tulungam ocuqpaqlal bulam svgagvrwql hoo bulug lvgab dvba dvn!” 3Hoqgab Jisu soq gonsam bulam doocil benum. 4“Nulug hiyv akgon mwwg sviya lwwg hoqgv sviya dorgin niib nyiloqkam mwv hog bvxeq nyidwn? Mwv camkiya leq kiya gon ww hwwtaqlo roop pel niinbo sviya doram meepa maady deedib meekar dvn. 5Mwv mwwg sviya niinbo doram meepa yukam atv gorbw lo joocal nammwb joal haag dukun. 6Ho mwv hemp kunv mwwg gutu-gora lo ajin tulungam goqkum banv bedwn, ‘Ngo ngoqg sviya niik boam kaapa pakun, hoqgab nulv ngoqg lvgab hwnyir-hvmar soogdvl hemp pomin gvto!’ 7Hoq hvbkalam ngo nulam bedwn, camkiya leq kiya nyedarbo nyi tulu gab hemp podynam mam hilayab nyic nyia hoqgv mwwkur laikul hookurbo nyi ak gab ao gvda tol Pwnbov hemp pobin yaadwn.

Niinbo Tayin

8“Ho nyem akwg rup tayin tvqyw hoqgv taqgin niim baloqkam mwn hoggub nyidwn? Mwn mur toul svmpwq pwql niinbo rup taiyinam meepa maady deedib nam nvmpwngam miyum doomab hindy jaqb meekar dvn. 9Hoo mwn niinbo taiyin taqham meepa yukam hemp poknv mwwg ajin tulungam la gutu-gora lo doonbo nyi tulungam lvkin gob goqkum goqpa banv bedwn, ‘Ngo ngoqg niinbo taiyin taqham meepa pakun, hoqgab nulv ngoqg lvgab hwnyir hvmar soogdvl hemp pomin gvlabv!’ 10Hoq hvbkalam ngo nulam bedwn, nyic nyia bo akv mwwkur laikul hookurbo nyi ak gabnvl Pwnbog gumtw tulungv hemp podwn.”

Niinbo Ko Tuup

11Jisu benum, “Ko tuup vnyig doogbo nyi ak doonum. 12Ko tuup anyo akv mwwg abam benum, ‘Ab noqg galoqkv ngoqg gumn-ran naadynam mam sool ngam jilakub.’ Hoqgab ab akv mwwg gumnam mvpin mvral ko tuup vnyiam jinum. 13Aal loonyi loum kokw so hoq ko tuup anyobo akv mwam gumn pengnam mam twngkwb puqnv nammam apaqpel aado gvda golo wbnv sooxianum. 14Mwwg gumnam mwlwngam sooxia kalam twqda, hoq gvdaho dwr poot jaqg wnum. Hoqgv mwv hog loomatwqb vs-axaq gob nyinum. 15Kano hvngwrb ceceq jaqb hentwr kaanyib hengam gab mwv hoq gvda hoqg nyetbo nyi ak lvgab bon nyijo dvb mwv atam tomgaql yvnum. Hoq nyetbo nyi akv mwam mwwg iriq torabpam svpa pataq golo kaal yvg yaatwk hvl kanamnum. 16Kanol iriq hoodynam mam dvdwb nyisbakam mwam hiyvkam hog gokam dvdwb jimanum. 17Kokw so mwv atv mwwdar kunv hvl benum, ‘Oa ngoqg abwg namlo nyijobo tulungv dvla maadwb dvs twwsv dooiyo deen, hvbmabde soolo si ngo kanob sika-sikal simin dooiya dvn! 18Ngo gorab gvdwl abwg dookub wnwq gvdwl hvl beka sutayin, “Abv Pwnbo gvla noqg kaagaho ngo nyic nyia nyit kuba. 19Noqg kov hvdwb ngo sija hog doog kuma. Hoqgab noqg nyera akgon du hwiywb ngam doog tvb.”’ 20Hoqgab mwv gorab kunv mwwg abwg dookub wknum. Hvbmabde mwwg abv mwam hvraqb aado ho hoodul doodwb kaapa twqx kalam mwwg hangv biinv wrwq banv mwwg lwwpongam gwrgabtvl moopupnum. 21Ko akv nvl begamv, ‘Abv, Pwnbo gvla noqg kaagaho ngo nyic nyia nyit kuba, noqg kov hvdwb sija ngo nyikma.’ 22Hvbmabde, ab akv mwwg nyera tulu mwlwngam benum, ‘Nyebia jaqb lvvywbo nit vj rumg vnwqb bwato, hoo ham mwam koomto, hoo mwwg alaqho lvqc pilwqto hoo mwwg lvpia ho luxuq lo gvmto. 23Hoo dwjw jwpup paqnbo svv hvvdo doram patabto, hoo ngul mwlwngv dvg-twwg dvl soomin nyirmin tuj. 24Hoggab ngoqg ko akv sipe kulakam turkur pakun; mwv niiknum, hvbmabde kaapa pakun.’ Hoqgab bulv soomin nyirmin soorabnum.

25“Hvbmabde soqsam nyidul doodu dvkho mwwg ko tuup vbw akv rongo ho yvleqnum. Kokw so mwv nam ogumb wnwq yukam, mwwg namho soomin nyirminl soodul doonam mam tapanum. 26Hoo mwv nyera akgon goqnv toxnum hognvkv yu nam uraho nyidu dvn? 27Nyera akv birwqnum, ‘Noqg bor akv nammwb hookur paku, hoo mwam sima dormab kaapa pookur ko-gab, noqg ab dwjw jwpup paqnbo svv hvvdo doram patab pakun. 28Ko tuup vbw akv nam urab haama jaqb haaxaq xaql agaho doqtu ko-gab ab akv lengnv namrab haatwk hvl maanyoqnum. 29Hvbmabde ko tuup vbw akv abam hvl birwqnum, ‘Abv, kaato, anyojaq hoqgv sija godab ngo nyera swwnv ngo noqg bonam nyitkun, hoo lokjaqkam benam mam ngo tamab nyima pan. No hognvkv ngam lok jikanum? Ngoqg ajin orum lvgab soomin nyirmin mvdwb sibin dorjaqkam no ngam nywywngam jika maanum. 30Hvbmabde, noqg soq ko ak si noqg swwnam gumn mwlwngam hwwmab meqjo bo nyem vxy lvgab nyikar yvnbo akv nammwb hookur ko-gab, mwam ya no soolo dwjw jwpup paqnbo svv hvvdo doram pal soomin nyirmin nvgdvn!’ 31Ab akv birwqnum, ‘Ngoqg kov no looxiam ngoqg lvgab namsi dooba do ngoqg hog mwlwngv noqg kvda gab doodkun, 32Hvbmabde noqg bor anyo akv sipe kulakam turkur paku, ho niipe kulakam hookur paku, hoqgab lak, ngulv soomin nyirmin nyidul doodwn.’”

Currently Selected:

LUK 15: NISS

Highlight

Copy