LUK 1
1
Ngoqg Tumanam Tiyopilas
1Vijaqg pota Xeqn bo nyi tulungv ngulug swwca so agam yal mwlwngam xeqpwl ap gvnkun. 2Ngulam hog hvla xeq otuqjaq hoqgv Tugu Puiyam tagab kaagab pel bulug gvk hvl gaqnyia bo hvvky nyi tulug bekinam bvrwqkam bulv xeqpnum. 3Hoqgab bir ab otuqjaq hoqgv ngo soq bvrwq mwlw sam xwxwjaqb poorynum. Xwxwjaqb poory cootwl noqgab soq sam puqtu pvbw anyab xeqpwl ap nyiloqkam al kimpa hvl ngo mwwnum. 4Nam hog hvla xeq ngo mwwnum ham tomswrnum hoq puqtu mwlwngam nam cengm tvs mwwnv ngo sam xeqg yin.
Jon Baptistnvn Dwrbuqdynam mam Ao Gumtwngv Pui Bekinam
5Juhudi gvdaho Herod lvpw atwb swwca dvkho Jakariya ngvk hvl Abijayag hoolu hoqgv nyub ak doonum. Mwwg nywxw hoq eminv Elijabet soq nyem aksi Aaron gv ko hosiqkv. 6Soq nywxw nyol vnyi si Pwnbog kaagaho nyidjaqb hoo At Swg pvvb tulu ngamla gamlam tulungam tvjwl swwba sunum, 7Hvbmabde bunyiv ko doomanum, hoggab Elijabet twrngumnum, hoo bunyiv xox- nyekam kunum.
8Aal golo mwwg bon nyicw moodam Jakariya Pwnbog kaagaho nyub gob nyinv bon nyidul doonum. 9Nyub hvdwg nyicw-mwcwjaqb mwam Xumk nam ura jaqb haal sulum mwwmdvb xuqlinum. Hoqgab mwv At Swg nammwb haanum. 10Uraho mwv sulum mwwduyin, nyi tulungv agaho xuml doonum. 11Ho At Swg ao gumtw ak mwwg dookub haanv sulum mwwduko dootam lvqbwq daiyaho doqdunum. 12Mwam kaapa tvl mwv hog looma twqb nyil bos sonum. 13Hvbmabde ao gumtw akv mwam benum, “Jakariya no bos maabv, Pwnbov noqg swgwnam mam loorwq paku, hoo noqg nywxw Elijabet noqg gab ko ak dootayin. Mwam no Jon hvl emin mindwb nyitayin. 14Ho no hemp bvla mwwngam tayin hoqgv mwam ko bwwikam nyiv vigo hemp potayin. 15At Swg kaagaho nyiv yuukum dvb swwtayin. Mwv opo twwdwb nyiram. Mwam dwr buqlin twqda kalam mwwg lvgab dvrwqbo yalv dooba tayin, 16hoo mwv Israel nyiilungam naleqgo bulug Pwnbo At Sw dookub bookur jitayin. 17Mwv nyiqry kaal swwnbo Ilijag hvbkalam hvvjw pwtwl At Swg otuq-otuqb wcol ab tulungam bulug koam aby bominsul bugil swwma bo nyi tulungam nyedarbo nyi tulug mwwlaq-saqpaqngam tal bugil swwm dvb, At Sw gab hang baqxaml doonbo nyi tulungam mwx-mvaql dootwk hvl tomswr tayin.
18Jakariya ao gumtwngam toxnum, “Hvbnyiloqkam ngo sam hoggub nyil cengtayin? Ngo nyekam kunbo nyi akwb nyiadvn hoqgv ngoqg nywxw ngvkam xox yaadkun? 19“Ngo lak Gabriel hvl ao gumtw akv birwqnum, “Soq tugu pui sam bekin taak hvl kanambo Pwnbo kaagaho ngo doodwn. 20Hoo kaato, hwdlo soq pagoq tulu si nyima deedib, no agam gookmab cooikab dootayin, hoggab no ngoqg gomcwr tulungam mwwjw ma, hogloqhv mood xikjaqb niqtuq nyilin tanam mam.”
21Hoqho nyi tulungv Jakariyanvn kaaya yoodul agaho doonum. Xumk nam uraho hvkam bvxeq oyul doon kun hvnv nyi tulungv mwam mwwmo sosonum. 22Kokw so mwv bviywrb lengyi kukam, mwv bulam hog goorwq nyok maanum, ho xumk nam uraho hognvk nyiqry go mwv kaas peeknago bulv mwwnum. Agam goolin kumanum, mwv bulam mwwg alaq lvgab nyik-nyimaql kaakinum.
23Xumk nam uraho mwwg bonam nyiyum yukam, mwv nammwb wkur kunum, 24Soq kokw so mwwg nywxw Elijabet ko gvrab kunv pool barng xaqgub hogloq bvkam caalin caa maab namho looxiam dooknum. 25“Kokw so At Sw ngam svkanum,” Mwn benum, “Mwv nyi rolu lo ngoqg hvnyw-haram naaxa gvnkun!”
Jisun Dwrbuqdynam mam Ao Gumtwngv Pui Bekinam
26Kokw so Elijabet ko gvnamv pool barx gob nyidwkho Pwnbov ao gumtw Gabrielnvn Galili gvdaho doonbo Najaret nampamb kanamnum, 27Debidg ko hosiq Josap gabwk hvl begaql apnam nyem nyijwr ak gab mwv pui bilwqnum, hoq nyem nyijwr hoqg eminv Meeri 28Ao gumtwngv haabnv mwnwn benum, “Swrsomalongv noqgab kula! At Sw noqg lvgab doobal hindjaqb lvqc cig nukun!” 29Ao gumtwg puiyam tatwl hog looma twqb nyinv soq pui sam hognvk pagoq gab begyin mwn ham mwwdwqnum, 30Hoo ao gumtwngv mwnwn benum, “Meeri bos maabv, hoggab Pwnbov nam mwwsw pakun. 31No ko gvl ko ak bwwtayin hoo mwam no Jisu hvl emin mindwb nyitayin. 32Mwv nyi nyiit radwb swwikukam, mwam mwlw jaqkam koi yaanbo Pwnbog Kov hvl bedwb nyin nvpv. Mwwg at Debid hvbkalam, Pwnbov At Sw mwam Lvpw atwb mvtayin 33Nwrba xaqb mwv Jakub ko hosig Lvpw at akwb nyin nvpv hoo mwwg lvpwngv nywywngam nyitwr dooram.”
34Meeri ao gumtw akam benum. “Ngo mvvngam mvlak, hoggub yu soq si nyitayin?” 35Ao gumtwngv birwqnum, “Dvrwqbo yalv noqg aoho ipoqtayin hoqgv Pwnbog atorv noqg aoho dootayin. Hoqgab dvrwqbo ko bwwtanam ham Pwnbog Ko Tuupv hvl goqtayin 36Noqg lwkw Elijabetnvn mwwpa to. Nyi tulungv mwnwn ko dookramwk hvl benum, hvbmabde xox xuguq kujaqkam, sija mwnwg ko gvnamv pool barx yukun. 37Hoggab Pwnbog nyiny maanam hog bon luugkam dooma dvn.”
38Meeri birwqnum, “Kaato, ngo Atwg paqnv, noqg bekwb sam ngoqg lvgab nyika mvsv” Ho Ao gumtw akv mwnwg ogum hoqgv wleq kunum.
Meeri Elijabetnvn Kaatab Wnum
39Oyu maadab Meeri rudw rvqxwl mwx-mvaq layil Judiya gvdag yorn aoho doonbo bopam golo wnum. 40Mwn Jakariya nammwb haabnv Elijabetnvn alpa hvl benum. 41Elijabet Meerig alpa hvl benam mam tapayin, Elijabetwg aiyeq uraho ko hv pojuqnum. 42Dvrwqbo yalv mwnwg lvgab doomin gvgam gab Elijabet vc alwb benum, Nyem tulug pengko lo no moloq xinam jaqkv! 43Hvbmabde hog gabyu ngoqg At Swg ann akv ngam kaatab haadwn. 44Hoggab kaato, noqg alpa hvl benam yalv ngoqg nyuru lo hvvtwqkalam, ngoqg nvmmam nvplo ko doon bov hemp poknv pojuqnum. 45At Sw hog hvla xeq nam dingnum ham mwwjw jwwgam gab no hog hwdgo hemp dvn!
Pwnboam Paql Meerig Bemin Benam
46Meeri benum,
“Ngoqg hangv At Swn paqdwn;
47Ngam ywwt ywwnbo Pwnbo gab ngoqg yalv hemp dvn,
48hoggab ngoqg svk mwwg paqnam aya kaapa dvb nyin boam mwv mwwpa pakun!
Hoggab kaato, sija galoqkv hotam tomxig nyi mwlwngv ngam xinam jaqkv hvl betayin,
49ngoqgab atorbo Pwnbov xitorbo bonam nyij pakun.
Mwwg eminv dvrwqdvn;
50Mwam bosbo nyi tulungam hotam-hotam gob mwv aya mwwpanam mam kaakin dvn,
51Mwv mwwg alaq laqtorbo bon nyinam mam kaakin dvn
hoo atv atam hanglo xitor gob mwwnbo nyi tulungam mwv cwrsaq-bvraq twqb mvgnukun.
52Mwv koibo lvpw at tulungam bulug pwqlw hoqgv mvgeq pakun,
hoo yanbo tulungam koiyib swwmnum,
53Kano bo nyi tulungam xumdwb mwv albo dvs pootam jinum,
hoqgv nyetbo nyi tulungam alaq asarwb wwm gvdkun,
54Ngulug ab apa tulungam dingrwl ap jinam mam pvvj pakun, hoo mwwg nyera Israelam svka taab haapa kun.
55Abraham nvla mwwg ko hosiq tulungam nwrba gob
aya mwwpanam mam mwv kaakin pakun!”
56Meeri Elijabetwg lvgab pool borumgo dooba peekul nammwb wkur kunum.
Jon Baptistnvn Ko Bwwnam
57Kokw so Elijabetwg ko bwwd moodv haaikukam mwn ko nyega ak bwwknum. 58Ho mwnwg gutu-gora ngvla at nyi tulungv mwnwn At Sw hog hwdgo albo swrdorxeqkam mwnwn anya kunam mam, hoo bul mwlwngv mwnwg lvgab hemp poknum.
59Aal piin deenso bulv ko nyega akam muxul Jakariya hvl emin mindwb mwwnum, 60Hvbmabde mwwg annv benum, “Hvbma, mwam Jon hvl goqtayin.” 61Ho bulv mwnwn benum, “Hvbmabde noqg nyob pengko lo hoqhvk emin mingnam nyi akkam dooma dvn lak.” 62Kokw so ko akam hognvk emin jaqb mimb nyiloqkam altayin hvl bulv ab akam nyiyw nyima nyinv toxnum. 63Ho Jakariya xeqnam taqg konv “Mwwg eminv Jonnv hvl xeqnum” ho bulv lomnum! 64Ho dara Jakariya lokta agam goolin kunum, hoo mwv Pwnboam paqrab kunum. 65Ho gutu-gorag nyi mwlwngv bos sonyianum, hoqgv Judiya diisw gvda tvqpwho soq benam-nyinam pui si wiyiq kunum. 66Soq pagoq sam tapa bo mwlwngv hoqham mwwkanum hoo toxnum, “Soq ko aksi kokwngam hogbvxeq nyidy bov yu.” Hoggab At Swg atorv mwwg lvgab dooba yvbanyi hvl mwlwngv cengnum.
Jakariyag Nyiqry Benam
67Dvrwqbo yalv mwwg ab Jakariyag lvgab doomin gvgam gab mwv nyiqry benam mam bekinnum:
68“Kuj ngulv Israelwg Pwnbo At Swn paqtuj!
Mwv mwwg nyi tulungam svka taab haabnv bulam meelin kunum.
69Ngulam atorjaqb ywwt ywwd bo nyi akv mwv
mwwg nyera Debidg ko hosiq ak jipa kun.
70Kol otuqjaq hoqgv mwv sam mwwg dvrwqbo nyiqry benbo tulungam beol apnum.
71Mwv ngulam ngulug ceebio baqnbo hoqgv la ngulam oyum yumnbo nyi tulug alaq hoqgv ywwt ywwtayin.
72Mwv ngulug at ab tulungam anya tainvk hvl mwwg dvrwq aldvb goorminsnam mam mwwgabl daqtor tainvk hvl benum.
73-74Ngulug ab apa Abrahamnvn piwr jwr-jwr dvb dingrwl
mwv ngulam ceebio baqnbo nyi tulug alaq hoqgv vcwr gokam bos somab ngulug swwnam xaqb mwwg gab bon nyim dvn.
75Mwwg kaagalo ngulv dvrwq bvla jvqtw ngulug swwnam bumpw ho doodwn.
76Ngoqg ko nam mwlw jaqkv koi yaanbo Pwnbog nyiqry kaanbo hvl betayin.
No Atwg wma daab otuqb wcol lamtangam
mwwg gab mwx-mvaqta,
77bulug nyic nyiangam ywwt ywwta yinwk hvl mwwg nyi tulungam bekin mvdwb.
78Hoggab ngulug Pwnbov aya mwwpal hoo hang biidwn.
Mwv ngulug aoso nyedar tanam hutongam huurab mvtayin
79hoo sig doonyium kan urab doonbo nyi tulug aolo ao gvda toloqkv huul dvb jitayin,
ho mwv ngulug lvpiangam swrsomalo lamtab bool wgtayin.”
80Kokw so hoq ko akv koi kunv yalv la gv ngv hwngkw alwb swwrabnum. Mwv Israel nyi tulug rolu agaho mwx-mvaql lengnam aal xaqb deexa-raraho doonum.
Currently Selected:
LUK 1: NISS
Highlight
Share
Copy
Want to have your highlights saved across all your devices? Sign up or sign in
Nyishi, DVRWQ PVVB @ Bible society of India 2016
