JON 6

Jisu Lwwyw Angngam Hoonum

(Mt 14:13-21; Mk 6:30-44; Lk 9:10-17)

1Soq kokw so Jisu Galili swnyiqg Tiberiyas ngvk hvl benam kvtin gonwb rabknum. 2Mwv nyi vcboam mwpnam mam kaatwl mwwg kokw kokwb nyi acam camt algo wmin gvnum. 3Ho Jisu puutu ao golo caaknv mwwg buu tulug lvgab doonum. 4Ho Juhudi tulug Nyedarko Durum moodv hvvnwq kunum. 5Ho Jisu nywrabl kaanamv, nyi acam camt algo mwwg dookub hoodul doonum, Jisu Pilipnvn benum, nyi torabsam dvm dvb dvs rvdwb hogloqkv kaapa tayin?” 6Mwv vm yaab Pilipnvn pookal soq sam toxnum, hvbmabde mwv atv hoggub mvtayin ham cengsnum. 7Pilip bvrwqnum, “Soq nyi mwlw si vcwr saqb vxiv dvjaqkam twngk lwwg wtwb rvjaqkam dwpwram.”

8Mwwg buu tulug pengko soqgv Simon Pitorg bor Andriyo ngvk hvl benam ak hv mwam bekinnum. 9“Himy ak tanyeq wtw taqang gola ngui cinyi go baqnbog doodwk hvl bekinnum. Hvbmabde hvd nyi gab hoq hwiyw ko ham hoggub mvtayin?”

10Jisu bulam benum, “Nyi tulungam doa mvto.” Ho ditaqho nwmwngv vijaqg doonum. Hoqho nyiv lwwyw ang-go yvnum. 11Ho Jisu wtwngam naarab banv bvvtwl Pwnboam paqnum, ho doonbo nyi tulungam hornum, nguiyam kam hvb mvnum; hoo bulug kepongv dvdeqnam gob dvnum. 12Kokw so bulam dvtar namgob dvmtvl mwv buu tulungam benum, “Mwciq-mwiyiq tamab wtw dvleqkam dorkum darpato.” 13Ho bulv nyi tulug dvtar tvl apaqnam tanyeq wtwngam dorkumnv huc cwyw leq cinyi go dorkumnum.

14Ho nyi tulungv Jisug soq swrdorxeq dvb nyil kaakin namsam kaatwl bulv bemin sunum, “Jvqtw jaqb soq nyi ak si gvda gvtwb haady bo nyiqry kaanbo akv!” 15Jisu nyi tulungv mwam nootul gumlil Lvpw at gob mvtanam mam cengtwl mwv lokta puutub vp-cwkwb caaleqnum.

Jisu Iss Aob Wnum

(Mt 14:22-33; Mk 6:45-52)

16Hwdlo ariyumv haai kukam, mwwg buu tulungv swnyiqb iyabanv, 17swpho caobanv swnyiq kvtinwg Kaparnahum wnum. Ho kan kunum hvbsujaqkam Jisu hvraq bulug dookub hvvc maadanum. 18Hoq ditaqho dooiyv vcib yilayil issam biimnum. 19Buu tulungv mail doum dvvpy gob swpam kool wdu yikho, bulv Jisun iss aoho wgaql bulug dookub hoodul doonam mam kaapa tvl bulv lomb nv bosnum. 20Jisu bulam benum, “Bos maabv, ngo sulak.” 21Ho bulv mwam swp aob cao mvdwb mwwnum. Kokw so Jisu oyu maadab bulug swpwb bulv wdy ko gvdangam wc kunum.

Nyi Tulungv Jisun Meekarnam

22Aal loogwn so nyi tulungv swnyiq kvtin ho doonbo nyi tulungv swp pwkin go dootwq dvb kaapanum. Jisu mwwg buu tulug dookwb swp uraho caol wmanum hvl bulv cengnum, hvbmabde buu tulungv mwam apaqpel vpwb wnum. 23Hvbmabde Tiberiyas hoqgv haanbo swp torab pv nyi tulungam At Sw wtwngam paqxo tvl dvkho haaknum. 24Kokw so nyi tulungv hoq ditaqho Jisun nvla mwwg buu tulungam kaapa maaikam, bulv swpwb cao kunv Jisun meekar taab Kaparnahum wknum.

Jisu Swwg Dvsv

25Kokw so nyi tulungv Jisun swnyiq kvd gonho kaapa tvl bulv mwam toxnum, “Tomswr bov, hwdlo no rabknum?”

26Jisu bvrwqnum, “Ngo nulam jvqtw jaqb bekin dvn, nulv ngo nulam swrdorxeqgob nyil kaakin ko-gab ngam meekar maaslak, hvbmabde wtwngam dvdeq dvb dvgam gab sulak nulv ngam meekar dvn. 27Yuupaqbo dvs gab bon nyimabv, hvbmabde nwrba cwtam swwnam gob doody bo dvs gab bon nyito soq dvs sam Nyia Kov nulam jitayin, hoqgab Pwnbo mwam ham nyim dvb birwl ap jipa kun.”

28Ho bulv mwam toxnum, “Hvbnyiloqkam, Pwnbog nyis tulungam nyis sam ngulv hoggub nyil nyinyi tayin?”

29Jisu birwqnum, “Pwnbov nulam bonam nyim dvb mwwnamv mwwg kanamnam akam mwwjwnam hv sulak nulug nyisv.”

30Ho bulv mwam bvrwqnum, “No ngulam mwwjw mvdwb hognvk nyima wmanam swrdorxeqkam nyil kaakin tan? No hognvkv bonam nyil kaakin tayin? 31Ngulug at ab tulungv Dvrwq potalo xeqpwl apnam hvbkalam deexa-raraho maanangam dvnum. Mwv ao gvda toloqgv bulam wtw dvdwb jipoqnum.’”

32Jisu benum, “Ngo nulam jvqtw jaqb bedwn, Mojes nulam ao gvda toloqgv wtw jima sulak, hvbmabde ngoqg Abv nulam ao gvda toloqgv wtw loodangam jidwn. 33Hoggab Pwnbov jinam wtwngv ao gvda toloqgv ipoqdvn, hoo gvda gvtam swwm dvb jidwn.”

34Bulv mwam konum, tomswr bov, “Ngulam hoq wtw ham lwxiam jitwb.”

35Ho Jisu bulam benum, “Swwgwg dvsv ngo.” “Hiyv lajaqkam ngoqg dookub haanbov kano kuram, hoo hiyv lajaqkam ngam mwwjw bov mwv nywywngam hvngwr kuram. 36Hvbmabde nulv sija ngam kaat lakam mwwjw ma. 37Ngoqg Abv hognvkv xeq ngam jipan hoq tuluhv ngoqg dookub haatayin, hoo hiyv xeq ngoqg dookub haanboam ngo nywywngam ruqxa ram. 38Ngo ao gvda toloqgv ngoqg atwg mwwkub nyitab ipoq ma, hvbmabde ngam kanambo akwg mwwnam mam nyitab ipoqyin. 39Hoo soq si ngam kanam bog mwwlwqkv, mwwg hog mwlwngam jinam sam akukam niim mvma dvn, hvbmabde bulam vtwr-anya aalam turab mvdwb jitayin. 40Hoggab soq si ngoqg Abwg mwwnamv, Ko Tuupam kaanbo nyiicwr-cwrxiam mwwjw gvdwl nwrba cwtam swwgam naamdvb, hoo kuiyum mam vtwr-anya aalam ngo bulam turdvb purab tayin.”

41Jisu begamv, “Ngo ao gvda toloqgv ipoqbo dvsv” hvgam gab Juhudi tulungv budum-beram benum. 42Ho bulv benum, “Soq nyi aksi Josap ko tuup hvvmas i? Ngulv mwwg abamkam hoo annamkam cengdwn. Hvnyiloqkam mwv sija hoggub ao gvda toloqgv ipoq yinwk hvl bedwn?”

43Jisu birwqnum, “Nulug pengko ho budum-beram bemin sunam mam apaqto. 44Ngam kanambo Ab jima lo hiyvkam ngoqg ogumb haanyiram, hoo ngo mwam vtwr-anya aalam turab dvb jitayin. 45Nyiqry benbo tulungv xeqnum, ‘Nyi mwlwngam Pwnbov tomswr tayin.’ Abwg tomswrnam mam tanbo nyi mwlwjaqkv ngoqg dookub haatayin. 46Hiyv akgon kam Abam kaaka maasu, hvbmabde Pwnbo galoqkv haanbo ak hv Abam kaapa kun. 47Ngo nulam jvqtw jaqb bedwn, hiyv mwwjw dvn, hoq gab nwrba cwtam swwgv doodwn. 48Ngo swwgwg dvsv. 49Nulug ab tulungv maanangam deexa-raraho dvpe-twwpe kul hvraqb sinkun. 50Soq si ao gvda toloqgv jipoqnam dvsv, ho hiyv akv ham dvnbo nyiv siram. 51Ngo ao gvda toloqkv ipoqbo swwgwg dvsv. Hiyv akgon soq dvsam dvbnyiloqkam, mwv nwrba gob swwtayin. Hoo gvda gvtam swwm dvb ngoqg jita gvdwn si ngoqg soodinv.”

52Soq sam tatwl Juhudi tulungv hang lingtwr ram lengnum. Bulv benum, “Soq nyi si hoggub nyil ngulam mwwg soodinam dvm dvb jinyi tayin?”

53Jisu bulam benum, “Ngo jvqtw jaqb nulam bedwn, nulv Nyia Ko Tuupwg soodinam la hijum mam dvma-twwma baloqkam nulv atwg swwgam kaapa nyoram. 54Hiyv xeq ngoqg soodinam dvdwn hoo ngoqg hijum mam twwdwn hoq nyi ak hv nwrba cwtam swwgam naatayin; hoo ngo vtwr-anya aalam mwam purab jitayin. 55Hoggab ngoqg soodin si dvs xinam hvvtwjaqkv, hoo ngoqg hijum si twws hvvtwngv. 56Ngoqg soodinam dvnbov la hijum mam twwn bov mwv ngoqg urasi doodwn, hoo ngo kam mwwg uraho doodwn. 57Nywywngam sima bo Abv ngam kanam pan, hoo mwwg galoqkv ngo kam swwdwn. Hoq hvbkalam soq sam dvnbo nyi akv ngoqgv. 58Soq si ao gvda toloqgv ipoqbo dvsv, nulug ab tulungv wtw dvtwl hoo kokw so sinam hvb nyimadvn. Hvbmabde sam dvnbov nwrba gob swwtayin.” 59Kaparnahumho tomswr banv yvi yikho Jisu soq torab sam Sinagog nam uraho benum.

Nwrba Cvtam Swwg Pui

(Mt 8:19-22; 10:36)

60Ho mwwg buu tulug pengko hoqgv sam tatwl benum, “Soq tomswrnam si tacin lama namgo hiyv sam talaq tayin.?” 61Hiyvkam Jisun betam maasu mwwg buu tulungv mwwg benam mam tatwl budum-beram bemin sunam mam cengtwl bulv kam benum, “Soq si nulgab muurnam gob nyido i? 62Hvnyiloqkam Nyia Ko Tuupam mwwg otuq dook gvdab cookurnam mam kaapa baloqkam nulv hog hvl betayin? 63Yalv swwm dvb jidwn, nyia kog atorv hog gokam nyinyi maadwn. Ngo nulam agam benam hvvsulak yalv la swwgv. 64Hvbmabde nulug pengko ho tuugin mwwjw maab doodo.” (Jisu otuqjaq hoqgv hiyv mwwjw maadwn hoo hiyv mwam nyemaq alaqb nyepinl gvqlwq tayin ham cengl doonum.) 65Hoo mwv lokta betin banv benum, “Ngo nulam hvlakam betkun, Abv svkal hiyv nvkam ator jima baloqkam ogum haanyiram.” 66Hoq kokwb mwwg buu ata gon wkur kunv lokta kokw so mwwg lvgab wmin gvkmab nyiknum. 67Ho Jisu mwwg wyw leq vnyiam benum, “Nulv kam ngam apaqpel wdkub mwws i?” 68Simon Pitor Jisun birwqnum, “At Sw, ngulv hiyv lvgab wtayin? No nwrba cwtam swwgam jinbo agam mam doog do, 69hoo ngulv sija mwwjw dvn, hoo cengdkun, no Pwnbog Dvrwqbo Akv.” 70Jisu bulam birwqnum, “Ngo nulam wyw leq vnyi gon goqmanum i? Hvbsujaqkam nulug pengko ho akwn uiyib gwwl doodo!” 71Mwv Simonwg Iskeriot ko Judasnvn bvrwqngam bidul doonum. Hoggab buu wyw leq vnyig pengko hoq akgonwb mwv nyisbakam mwam nyepin pingpaq tvl nyemaq alaqb gvqlwq bongv.

Currently Selected:

JON 6: NISS

Highlight

Copy