BEGGAR 35

Pwnbov Lvqcnv hoo Jakubnvn Emin Mindarnam

1Pwnbov Jakubnvn benum, “Gorabto, Betel wgdvl hoo alo doota. Hwdlo noqg vbw Esu hoqgv no keleq yukho nam wrwqbo Pwnbo gab yugw lo alo ak mvta.” 2‍Ho Jakub mwwg imiq nyiingam la mwwg lvgab dooba mwlwngam benum, “Nulug pengko ho nyoodo pwnbo tulungam hurpaq tuku hoo nulv atv atam darxaqto hoo nulug vj tulungam kwly to. 3‍Ho gorabto ngulv Betelwb wnuj, ho Pwnbo gab yugw loq ak alo mvtaj, ngoqg vs-axaq moodho hiyv ngam svkanum hoo ngoqg hogloq bvxeq wknum ngoqg lvgab wbanum.” 4‍Ho bulv Jakubnvn bulug doognam nyoodo pwnbo mwlwngam, hoo bulug nyuruho gagy tulungam jiknum. Jakub hoq tulu ham Sekem ogumg terebin svvn niikumho kvsil apnum.

5‍Hoo bulv nyiody boodu yikho Pwnbo hoqgv diis-paapwg bopam tulungam bos looda dvb haanum, hoggab bulv Jakubg ko tulungam ruqmin gvmanum. 6‍Hoo Jakub Kanaan gvdag Luj ho haaknum (hoqhv Betel), mwv la mwwg lvgab wba bo nyiilu mwlwngv haaknum, 7‍hoo hoqho mwv yugw ak mvnum hoo nyookam El-betel hvl goqnum, hoggab hwdlo mwwg vbw hoqgv mwv keleq yukho, hoqho Pwnbov mwv atv mwam kaakinum. 8‍Hoo Rebekanvn bon nyijbo Debora siknum, hoo mwnwn Betelwg kora svvn niikumho svma liiknum. Ho mwv hoqg eminam Allon-bakut hvl goqnum.

9‍Hwdlo mwv Paddan-aram hoqgv haai yikho, Pwnbov Jakubnvn lokta kaakinum, hoo mwam lvqcnum. 10‍Hoo Pwnbov mwam benum, “Noqg eminv Jakub; hvbmabde noqg eminam Jakub hvl goqk ram, hvbmabde noqg eminam Israel hvtayin.” Ho mwwg eminam mwv Israel hvl goqnum. 11‍Hoo Pwnbov mwam benum, “Ngo mwlwngam ator koi yaanbo Pwnbov: mipar-gooiyiql hoo dumtwq-miilyw swwn ka. Nyob ak hoo jaqt bo nyob tulungv noqg hoqgv lengtayin, hoo lvpw at tulungv noqg atwg gv hoqgv lengtayin. 12‍Abraham nvla Aisaknvn gvda jinam mam ngo nam jitayin, hoo noqg kokwb noqg hosiqkam ngo gvdangam jitayin.” 13‍Ho Pwnbov hogloq nyookho mwwg lvgab mwv agam gooknum mwwg hoqgv wleq kunum. 14‍Hoo hogloq nyookho Pwnbov mwam agam gooknum, Jakub wlw swwrw ak hoqho diidaql apnum. Mwv hoq aoho twws akiam tooiyaqnum hoo hoqho kutiam tooiyanum. 15‍Ho hogloq nyookho Pwnbov mwwg lvgab agam gooknum Jakub hoq nyook hoqg eminam Betel hvl goqnum.

Rakel la Aisakg Sinam

16‍Ho bulv Betel hoqgv nyiody booknum. Hwdlo bulv Iprat hoqgv aado kvtaq go dooyikho, Rakel cinc cirabnum, hoo mwn vc loodab cinc cinum. 17‍Hoo hwdlo mwnwg cincv vc loodab cigwq yukho, cinc joonbov mwnwn benum, “Bos maabv, hoggab no nyega ko akta doopa ku.” 18‍Hoo mwn sijo ywwtwl, mwwg eminam mwn Ben-oni hvl goqnum; hvbmabde mwwg abv mwam Benjamin hvl goqnum. 19‍Ho Rakel siknum, hoo mwnwn Iprat lamtaho svma liiknum (hoqhv Betleham), 20‍hoo Jakub mwnwg nyubuho wlw swwrw ak diidaqnum. Hoqhv Rakelg nyubungv, hv soolo godab doodwn. 21‍Israel mwwg nyiodam boodul doonum hoo mwwg tombungam Eder sojag taqcgon ho rwwnum.

22‍Israel hoq gvdaho doodu yukho, Reuben mwwg abwg xwwbaq nywxw Bilhanvn bwwnum. Hoo Israel ham tapanum.

Ho Jakub ko tuupv camleq vnyi kunum. 23‍Liyag ko tuupv: Reuben (Jakub tuup vbw cociq), Simeon, Lebi, Juda, Issakar, hoo Jebulun. 24‍Rakelg ko tuupv: Josap la Benjamin. 25‍Rakel paqn Bilhag ko tuupv: Dan la Naptali. 26‍Liyag paqn Jilpag ko tuupv: Gad la Aser. Soq tulu si Paddan-aram lo Jakubnvn ko bwwjnum ko tuupv.

27‍Hoo Jakub mwwg ab Aisakwg dook nyook Mamre, Kiriat-arba (hoqhv Hebron) ho hvvc kunum, hoqho Abraham la Aisak doogwnum. 28‍Ho Aisak 180 vnyw gob swwl dooknum. 29‍Hoo Aisak mwv nyekam pvg dvb doope kul, mwwg svqriq taiyikho mwwg nyiilungam mwv goqkumnum hoo mwv svqriq kunum. Hoo mwwg ko tuup Esu la Jakub mwam svma liiknum.

Currently Selected:

BEGGAR 35: NISS

Highlight

Copy