BEGGAR 29

Jakub Liya nvla Rakelnvn Nyem Naanam

1Ho Jakub mwwg nyiodam booknv dou-cagag nyiilug gvdaho haanum. 2‍Ho mwv kaanv, mwv gvda kaanv sokum ak rongo ak golo kaapanum, hoo kaato, hoq bviywrho sviya pvtw twum go gel karnum, hoggab sviya pvtwngam hoq iss hoqgv twwmnum. Sokum hoqgv wlw tutumnanv pwt jaqnum, 3‍hoo hwdlo sviya pvtw mwlwngam hoqho rookum yin, sviya rvkybo tulungv sokum ung hoqg wlwngam ngurgin tvl sviya tulungam hingky jaqb iss twwmnum, hoo sokum mam lokta wlwngv ngurtuml apnum.

4‍Jakub bulam benum, “Ngoqg vbw-bor tulu nulv hogloqkv haai yin?” Bulv benum, “Ngulv Haran aloqkv.” 5‍Mwv bulam benum, “Nulv Nahor ko tuup Labannvn cengd nvi yv?” Bulv benum, “Ngulv mwam cengdwn.” 6‍Mwv bulam benum, “Mwv alwb doos dvi yv?” Bulv benum, “Mwv alwb doos do; hoo kaato, mwwg nyem ko Rakel sviya lvgab hoodu do!” 7‍Mwv benum, “Kaato, sija aal lvpa xiqdo; sija sibin-svvngam lvkin gob rookum dv mood maata. Sviyangam iss twwm peel hoo bulam wgdvl nwmw dvmto.” 8‍Hvbmabde bulv benum, “Ngulv sibin-svv mwlwngam lvkin gob rookum xiqtwl hoo sokum wlwngam ngurkoq tvl; ho ngulv sviya tulungam iss jidwn.”

9‍Mwv hvb bulam agam doodu yukho, Rakel mwnwg abwg sviya tulu lvgab haanum, hoggab mwn sviya rvky bo nyemwb nyinum. 10‍Jakub mwwg annwg vbw Laban nyem Rakelnvn la mwwg annwg vbw Labanwg sviya tulungam kaapa kalam twqda, Jakub sokum gamb ogumb hvvnwq banv wlwngam ngurgin jinum hoo mwwg annwg vbw Labanwg sibin-svv tulungam iss jinum. 11‍Ho Jakub Rakelnvn moopup nv hoo vcjaqb xabnum. 12‍Hoo Jakub Rakelnvn mwv mwnwg abwg imiq nyiingv hvl betamnum, hoo mwv Rebekag kongv hvl betamnum, hoo mwn xarbnv mwnwg abam betamnum.

13‍Laban mwwg bwrm ko Jakubg puiyam tapa kalam twqda, mwv xarbnv mwam kvvrwqnum hoo mwam cegabl hoo moopupnum hoo mwam mwwg nammwb boanum. Jakub Labannvn hog mwlwngam betam kunum, 14‍hoo Laban mwam benum, “Jvqtw jaqb no ngoqg soodin soqgv lengn bov!” Hoo mwv pool bargwb mwam doomin gvnum.

15‍Ho Laban Jakubnvn benum, “No ngoqg imiq nyi sujaqkam no nyijo naamab ngam bon nyij tan yv? Ngam betamto, hoggv no nyijo naatayin?” 16‍Laban nyem ko vnyi go doonum. Any hoqg eminv Liya, hoo bwrm hoqg eminv Rakel. 17‍Liyag vnyiqkv kangamnum, hvbmabde Rakel gv dorpwngv kangam altvl koojubnum. 18‍Jakub Rakelnvn abynum. Hoo mwv benum, “No ngam noqg nyem ko anyo bo Rakelnvn nyem jibnyiloqkam, ngo nam vnyw kvn gob bon nyij tayin.” 19‍Laban benum, “Nyi asaqkam mwnwn jimmam lingsam nam jinamv vcjaqb alyado; ngoqg lvgab dooto.” 20‍Hoggab Jakub Rakel gab vnyw kvn go bon nyijnum, hoo mwv mwnwn aby ko-gab hoqg vnyw tuluhv mwwg gab anyo ko mood gob nyinum.

21‍Ho Jakub Labannvn benum, “Ngoqg nywxwngam ngam jitkubv ngo mwnwg lvgab dooba yidkun, hoggab ngoqg moodv wiyum paku.” 22‍Ho Laban nyiilu mwlwngam lvkin gob goqkum goqpa banv durum dvgnum. 23‍Hvbmabde ariyum yukho mwv mwwg nyem ko Liyanvn Jakub dookub boa jinum, hoo mwv mwnwn doog kunum. 24(Laban mwwg paqn Jilpanvn mwwg ko Liyag paqn gob jinum.) 25‍Hoo arho kaaknamv, hoqhv Liya kunyi! Hoo Jakub Labannvn benum, “No ngam si hoggv nyipa kun? Ngo Rakel gab nam ngo bon nyij maan mvi yv? Hoggab no ngam mvvpaq pakun?” 26‍Laban benum, “Ngulug gvda so anyam nyem jima taab bwrm mam nyem jima dvn. 27‍Hapta akwb wnya mvtwl ngulv nam akwn hamrub jitayin, hoggab no ngam hvraqb vnyw kvn gota bon nyij dvb nyitayin.” 28‍Jakub hoqhvb nyinum, hoo hapta ak wiyum yukam ho Laban mwam mwwg nyem ko Rakelnvn mwwg nywxwb jiknum. 29(Laban mwwg paqn Bilhanvn mwwg nyem ko Rakelg paqn gob jinum.) 30‍Ho Jakub Rakelnvn doog kunum, hoo mwv Liyanvn koiyab Rakelnvn abynum, hoo Labannvn vnyw kvn gota bon nyijnum.

Jakubg Ko Tulug

31‍Hwdlo Liyanvn oyumnam mam At Sw kaapa tvl, mwv mwnwg mambam mvkonum, hvbmabde Rakelnvn twrngum mvnum. 32‍Hoo Liya ko gvknv hoo nyega ko ak bwwnum, hoo mwn mwwg eminam Reuben hvl goqnum, hoggab mwn benum, “At Sw ngoqg hentwr henam mam kaapa paku; hoggab sija ngoqg nyolv ngam aby yuk nvpv.” 33‍Mwn lokta ko gvnv hoo nyega ko bwwnum, hoo benum, “At Sw ngam oyumnam mam tapa paku, hoggab mwv ngam soq ko samkam jipa ku.” Hoo mwn mwwg eminam Simeon hvl goqnum. 34‍Lokta mwn ko gvnv hoo nyega ak bwwnum, hoo benum, “Soq mood soqgv ngoqg nyolv ngam lvkin gob doog yuk nvpv, hoggab ngo mwam ko tuup oum go bwwj pakun.” Hoqgab mwwg eminam Lebi hvl goqnum. 35‍Hoo mwn lokta ko gvnv hoo nyega ko ak bwwnum, hoo benum, “Soq mood so ngo At Swn paqtayin.” Hoqgab mwn mwwg eminam Juda hvl goqnum. Ho mwn ko bwwgo tvl doonum.

Currently Selected:

BEGGAR 29: NISS

Highlight

Copy