BEGGAR 27
27
Aisak Jakubnvn Lvqcnam
1Hwdlo Aisak nyekam yukho mwwg vnyiqkv nyiqmv ko-gab mwv kaadar kumanum, mwwg ko tuup vbw Esunvn mwv goqbnv mwam benum, “Ngoq ko no hog doodwn”; hoo mwv birwqnum, “Ngo si doodwn.” 2Mwv benum, “Kaato, ngo nyekam duku; ngoqg sid aalam ngo cengkma. 3Hoqgab sija, noqg illy-uppuqkam naalayil, ngoqgab nyoro gaqtab, 4hoo ngoqg abynam mam, ngam dvngam aldvb munu tvl, hoo ngam bwa tvb ho ngo dvtwl, ngoqg sima taab, ngoqg yvjv nam lvqc citayin.
5Hwdlo Aisak mwwg ko tuup Esunvn agam goonam mam Rebeka tapanum. Ho hwdlo Esu nyoro gaqtab wro yukho, 6Rebeka mwnwg ko tuup Jakubnvn benum, “Noqg abv noqg vbw Esunvn agam goonam mam ngo tapanum, 7‘Nyoro gaqg dvl ngam dvngam albo dvs loq bwa tvb, ho ngo ham dvtwl ngoqg sima taab At Swg agaho ngo nam lvqc citayin hvnum.’ 8Hoqgab sija, ngoqg ko, no ngoqg gaml bek jaqb nyito. 9Sibin bintwb wgdvl sibin bindo loq dornyi go boata, ho hoq tulu ham ngo noqg abwg abynam mam dvngam aldvb munu tvnwp. 10Hoo no ham noqg abwg dookub bwa jitwl dvmto, ho mwwg sima taab mwv nam lvqc citayin.” 11Hvbmabde Jakub mwwg ann Rebekanvn benum, “Kaato, ngoqg vbw Esu vm-rvsabo nyiingv, hoo ngo bvbin bo nyiib nyido. 12Ngoqg abv hoggub nyijaqkam mwv ngam hubka tayi, hoo ngo mwam nyij-nyiparnam hvb nyitayi hoo lvqc cam naakmab, ngo atv beenam mam nyipup sutayi.” 13Mwwg annv mwam benum, “Ngoqg ko, nam beenam mam ngoqg aoso haamto; ngoqg benam sam tvtwq gvdvl no wgdvl ngam sibin tulu ham boa taab.”
14Ho mwv wknv hoq tulu ham mwwg annam boa jinum, hoo mwwg annv mwwg abwg abynam mam dvngam aldvb munu jiknum. 15Ho Rebeka mwnwg ko vbw Esug aljaqn bo vjam mwnwg namho doognam mam naalayil hoq tulu ham mwnwg ko tuup bor Jakubnvn koomnum. 16Hoo sibin bindo hoqgv vpinam mwn Jakubg bvbin ko alaq hoola mwwg lwwpo ho gvmnum. 17Hoo mwnwg dvngam aldvb munu kunam dvsam la wtwngam mwnwg ko tuup Jakubg alaqho jilwq kunum.
18Ho mwv mwwg abwg dookub wnum hoo benum, “Ngoqg abv.” Hoo mwv benum, “Ngo si doodwn. Ngoqg ko, no hiyv?” 19Jakub mwwg abam benum, “Ngo noqg ko vbw Esu. No ngam hoggv benum, hvb ngo nyipa kun; sija tuurab gvdwl ngoqg nyoro gaqnam sam dvto, ho noqg yvjv ngam lvqc citwb.” 20Hvbmabde Aisak mwwg ko tuupam benum, “Ngoqg ko, no nyebia jaqb hoggub kaapa yin?” Mwv birwqnum, “Noqg Pwnbo At Sw ngam nyebia jaqb xirwl jinum.” 21Ho Aisak Jakubnvn benum, “Kujo ogumb hvvnwqto, ngoqg ko, no jvqtw jaqb ngoqg ko Esu yv ma Esu maai yv, ngo nam hubka tayin.” 22Ho Jakub mwwg ab Aisak ogumb wnwqnum, mwam hubka tvl hoo benum, “Agamv Jakub hvb goodo, hvbmabde alaqkv Esug alaq hvb nyido.” 23Hoo mwv mwam kaacin maanum, hoggab mwwg alaqkv mwwg vbw Esug alaq hvb vm-rvsabnum. Ho mwv mwam lvqc ciknum. 24Mwv benum, “No jvqtw jaqb ngoqg ko tuup Esu yv?” Mwv birwqnum, “Vv ngo Esu.” 25Ho mwv benum, “Dvsam ngoqg ogumb bwwnwq tvb, ho ngo noqg nyoro gaqnam mam dvtwl hoo nam lvqc citayin.” Ho mwv dvsam ogumho bwwnwq jinum, hoo mwv dvnum; hoo mwv roo alangam bwa jinum, hoo mwv twwnum.
26Ho mwwg ab Aisak mwam benum, “Ngoq ko, ogumb hvvnwqto hoo ngam moopup tvb.” 27Ho mwv ogumb hvvnwqnv mwam moopupnum. Hoo Aisak mwwg vj noram suupa banv hoo mwam lvqc cinv hoo benum,
“Kaato, ngoqg ko nor si
At Sw nyoro gvqjiq mvdwb lvqc cinam nor hvb suudo!
28Pwnbov nam doag gumsiam jignvka hoo swcwg diix-dea pwnwram nwrj gvnka
hoo dvs-twwsv naleq nvka.
29Nyiilungv noqg nyerab swwnka,
hoo nyob tulungv nam xil-paql doonka.
Noqg vbw-bor aoho atwb swwnka,
noqg annwg ko tuup tulungv nam xil-paql doonka.
Nam beenbo nyi vxiam beenamv haanka,
hoo nam lvqc cinbo nyi vxiam lvqc cignvka!”
30Aisak Jakubnvn lvqc cinam mam benya kalam Jakub mwwg abwg dook hoqgv lengleq kunum, ho mwwg vbw Esu mwv nyoro gaqpe kul haaknum. 31Mwv dvngam albo dvsam munu laikul mwwg abwg dookub bwa jinum. Hoo mwv mwwg abam benum, “Abv gorabto hoo ngoqg nyoro gaqnam sam dvto, ho no ngam lvqc citbv.” 32Mwwg ab Aisak mwam benum, “No hiyv?” Mwv birwqnum, “Ngo noqg ko tuup vbw, Esu lak.” 33Ho Aisak vc loodab tvmdwr hwqnv hoo benum, “Hiyv yu nyoro gaqlayil hoo ngam bwa jinum, hoo noqg haama taab ngo hog mwlwngam dvtkun, hoo ngo mwam lvqc citkun? Vv, mwv lvqc cinam mvku.” 34Esu mwwg abwg soq gomcwr sam tapa twqda kalam, mwv vc looda sogoq kiirl hangv kacaq bviyaql xabnv mwwg abam benum, “Ngam kam lvqc citwb, ngam kam, ngoqg aba!” 35Hvbmabde mwv benum, “Noqg bor akv surjaqb nyiknv haanv hoo mwv noqg lvqcam naareq gvn kuba.” 36Esu benum, “Mwwg eminv Jakub maas i? Mwv ngam si lwnyi dvb vm mvvpaq paku. Mwv ngoqg ko bwwtaqnam gumnam naareq gvnkun, hoo kaato, sija mwv ngoqg lvqcam hvraqb naareq gvn kuba.” Ho mwv benum, “No ngoqgab hvvminl pvol apnam lvqc dook maai yv?” 37Aisak Esu nv birwqnv benum, “Kaato, ngo mwam noqg aoho at swwm dukub, hoo mwwg vbw-bor mwlwngam ngo mwwg nyerab swwm dukub, hoo ngo dvnam-twwnam mam mwam naleq mvdkub jiyum tukun. Hoggv ngo noqgab jik buiyu, ngoqg konga?” 38Esu mwwg abam benum, “Ngoqg aba no ngam vcwr gojaqkam lvqc lo citbv? Ngam kam lvqc tvb, ngam kam, Ngoqg aba.” Hoo Esu vcjaqb sogoq banv xabnum.
39Ho Aisak mwwg abv mwam birwqnv hoo benum:
“Kaato, diix-dea pwnwr maanbo gvdangv noqg doogwb nyitayin,
doag gums dooma ko gvdangv noq gvku.
40Noqg lyoqr orioq hoqgv no swwtayin,
hoo noqg borwg nyerab no swwtayin;
hvbmabde hwdlo no nyoma twqb swwikun mwwg luukam noqg lwwpo hoqgv no tuxia tayin.”
41Hoggab mwwg abwg mwam lvqc citanam mam mwv naareq ko-gab, Esu Jakubnvn hang baqnum hoo Esu mwv atv mwwsil benum, “Ngoqg abwn nyix-riid moodv hoodu do; ho ngoqg bor Jakubnvn ngo mengtayin.” 42Hvbmabde mwnwg ko tuup vbw Esug goonam mam Rebeka tapanum. Ho mwn nyi kanam tvl mwnwg ko Jakubnvn goqa banv mwam benum, “Kaato, nam mengdwb noqg vbw Esu atam atv mwwt saqlal doodo. 43Hoqgab sija, ngoqg ko, ngoqg benam sam tato. Sija da no gorab gvdwl Haranwb ngoqg vbw Laban dookub keto 44hoo noqg vbw akwg hang lengnamv sunyum maady deedib, mwwg lvgab meeg mood gob doota— 45noqg vbw akv noqg aoho haaxaqnamv niima deedib, hoo mwv mwwpa kuram no mwam hoggv nyiknum. Ho ngo nyi kanam tayin hoo nam aloqkv boa taikun. Hoggub yu ngo nunyi-nunyiam aal lookin ho yuupaq mvtayin?”
46Ho Rebeka Aisaknvn benum, “Hittaitwg nyem tulu gab ngoqg swwnamv nyelin-dorsil vs-axaq looda do. Jakub soq Hittaitwg nyem tulu sib nyinbo, soq gvda soqgv nyem naak baloqkam, ngoqg swwnamv ngoqgab hoggv niqtuq dootayin?”
Currently Selected:
BEGGAR 27: NISS
Highlight
Share
Copy
Want to have your highlights saved across all your devices? Sign up or sign in
Nyishi, DVRWQ PVVB @ Bible society of India 2016
