BEGGAR 14
14
Abram Lotnvn Ywwlinam
1Hoq moodho Sinarg lvpw at Amrapel, Ellasarwg lvpw at Ariok, Elamg lvpw at Kedorlaomer, hoo Goiimg lvpw at Tidal soq tulu si, 2Sodomg lvpw at Bera, Gomorrag lvpw at Birsa, Admag lvpw at Sinab, Jeboiimg lvpw at Semeber, hoo Belag lvpw at (hoqhv Joar), soq lvpw at tulu lvgab nyob panum. 3Hoo soq mwlwg sipai tulungv Siddim Lywpa ho lvkin gob hookumnum (hoqhv Al Sa-svlo ho). 4Vnyw camleq nywnyi gob Kedorlaomer uraho bon nyinum, hvbmabde vnyw camleq nywum deenho bulv mwam ceekonum. 5Vnyw camleq nywpy yikho Kedorlaomer la mwwg lvgab dooba lvpw at tulungv Asterot-karnaimho Repaim mam, Ham ho Jujim mam, Sabe-kiriataimho Emim mam haal nyob paiyanum, 6hoo Horit nyi tulungam bulug Seir diisw gvda namgub ho El-paran vrrwg deexa-rara nyook namgub nyob panum. 7Ho bulv wkur kunv En-mispatho (hoqhv Kedesho) haanum hoo Hajajon-tamarho doodu bo Amalek nyi tulungam la Amor nyi tulug gvda mwlwngam nyob paiyanum.
8Ho Sodomg lvpw atv, Gomorrag lvpw atv, Admag lvpw atv, Jeboiimg lvpw atv hoo Belag lvpw atv (hoqhv Joarho) wnum, hoo bulv lvkin gob Siddim Lywpa ho nyob panum 9Elamg lvpw at Kedorlaomer lvgab, Goiimg lvpw at Tidal, Sinarg lvpw at Amrapel, hoo Ellasarwg lvpw at Ariok lvpw at vpiv ang lvgab ceekonum. 10Siddimg Lywpa ho taking (katra) ungngv naleqgo doonum, hoo Sodom gvla Gomorrag lvpw at tulungv kenum, ho bulv tuugin ungho yoqlwqnum, hoo yoqngo tuugin diisw gvdab kenum. 11Ho nyemaqkv Sodom gvla Gomorrag gumn-ran hog mwlwngam naaknum, hoo bulug dvs mwlwngam naala yukul bulug lamtab wknum. 12Bulv Sodomho doonbo Abram bor hoq ko Lot nvkam, hoo mwwg gumn-ran tulungam naala yukul bulug lamtab wknum.
13Ho hiyv Amor tulug Mamre kora svvn nwwtaqho doon boam, kelinbo nyi akv Juhudi Abramnvn haabnv betamnum. Mamre la mwwg bor Eskol la Aner bulv Abram gv ajin gob nyinum. 14Hwdlo Abram mwwg imiq nyiingam nyumwb boog nvba hvl tapa tvl, mwwg namho ko bwwtwl honynam nyi 318 gob mwv bulam boolayil wgnum, hoo bulam Dan namgub ruqmin gvnum. 15Hoo mwwg sipai tulungam bulam ceeko mvdwb mwv la mwwg nyera tulungam ai mvpin-mvranum, hoo bulam mviyanum hoo bulam nyoodum daiya Damaskaswg Hoba namgub ruqmin gvnum. 16Ho mwv gumn-ran mwlwngam boqkur kunum, hoo mwwg imiq nyi Lotnvn la mwwg gumn-ran tulungam, hoo nyem mam la nyiilungam kam bookur kunum.
Abramnvn Melkijedek Lvqcnam
17Kedorlaomer nvla mwwg lvgab nyiba bo lvpw at tulungam mwv mviya peekul wkur yukho, Sodomg lvpw atv mwam Sabeg Lywpa ho kvvrwqtab lengnum (hoqhv Lvpw at tulug Lywpangv). 18Hoo Salemg lvpw at Melkijedek dvs-twwsv baqlinl jinum. (Mwv Mwlwngam Koi yaanbo Pwnbog nyubwb nyinum.) 19Hoo mwv mwam lvqc cil hoo benum,
“Mwlwngam Koi yaanbo Pwnbov Abramnvn lvqc cignvka,
Doangam la swcwngam doogbo atv;
20hoo Mwlwngam Koi yaanbo Pwnbov xinam jaqkv,
noqg ceebio tulungam noqg alaqho jilwq paku!”
Hoo Abram mwam hog mwlw wyw hoqgv ak jibwqnum. 21Hoo Sodomg lvpw atv Abramnvn benum, “Nyi tulungam ngam jipe bv, hvbmabde dupum-dvrab tulungam noqgab naagwn.” 22Hvbmabde Abram Sodomg lvpw atam benum, “Mwlwngam Koi yaanbo Pwnbo At Swn, ho Doangam la swcwngam doogbo atam, ngoqg alaqkam ngo irabl dingr pakun, 23ngo tan soogkam ho samtaqnan oso gokam ho noqg dupum-dvrab hoolu luug jaqkam naaram, hvb mabnyiloqkam no betayi, ‘Ngo Abramnvn nyet dvb mvpa kun.’ 24Ngoqg yaapa tulug dvnam hoqgv la ngoqg lvgab wba bo nyiam jinam lvvg hoqgv ngo hog akjijaqkam naaram. Aner, Eskol, hoo Mamrenvn bulug naady sanam mam naam to.”
Currently Selected:
BEGGAR 14: NISS
Highlight
Share
Copy
Want to have your highlights saved across all your devices? Sign up or sign in
Nyishi, DVRWQ PVVB @ Bible society of India 2016
