BON 20

Poul Mesidoniya la Akaiyab Wnam

1Hur-marab pv xooyiq yuk kokw so Poul mwwjwbo nyi tulungam lokub goqkum banv bulam biywr bebia banv alwb dooiyak hvl bepel mwv Mesidoniyab bulam wleqnum. 2Mwv hoq gvdab wpeq banv mwwjwbo nyi tulungam biywr bebial bulam haakam bepanum. 3Hoqgv mwv Akaiya haabnv pool borumgo ho doonum. Mwv Siriya wdub mwx-mvaq kunum, hvbmabde Juhudi tulungv mwam mvdwb ywrsnam mam tapa tvl, mwv Mesidoniyab wpeql wkur gvdkul wdwb mwwnum. 4Beriya hoqgv Pairas ko tuup Sapatar; hoq hvbkalam Tissolonika hoqgv Aristarkas la Sekundas, Darbe hoqgv Gaius la Timoti, Asiya gvda hoqgv Taikikas la Tropimas mwwg lvgab wbanum. 5Bulv wco banv ngulam Troas hv kaaya yaal doonum. 6Ngulv opap ciqlwq maanam wtw Durum kokw so Pilipi hoqgv iss jaajib wknum, hoo aal loong kokw so ngulv bulam Troasho kaapanum. Ho ngulv hapta gob doonum.

Poul Troas Sam Kvvtwr-kaanyab Kaanam

7Nyiai aalwg ariyumho ngul mwlwngv dvnam lokub dvbam dvb hookumnum. Poul nyi tulungam goonum, ho mwv gooknv gooknv ai nywywra namgob goodunum, hoggab aal loogwn so mwv bulam wleq tanum. 8Ngulug dookumko nam aoho mur wmv vigo huul doonum. 9Yaapa ak Iutikas ngvk hvl eminam hv pupumho doodunum. Poul hvraqb goodul doonum, Iutikas yumy kunv yubtab tabknv yubngaq banv mwv nam nommum gob ao mvcanam hoqgv hatib hol namgob yub tabnum. Kokw so bulv mwam sidkub joorab kunum. 10Hvbmabde Poul ipoq banv mwam cegabtvl mwv benum, “Mwwdwq maab, mwv sija godab sima da i!” 11Hoq kokw so mwv nam aob cookur kunv wtwngam pintul dvnum. Mwv bulug lvgab oyu jaqg doonyiv caalin daqnam gob goopekul wleqnum. 12Bulv yaapa akam nammwb turdkub hemp alwb bool wgkunum.

Troas Hoqgv Miletaswb Wnam

13Ngulv Poulwn aadob wg tak iss jaajib caonum hoo Assosub jaal wleqnum. Ngulam wiyatvk hvl betwl mwv kedwb winvk hvl benum. 14Mwv ngulam Assosho wrwq yukam ngulv mwam jaajib cao mvtwl Mitileneb wknum. 15Ngulv jaaj hoqgv wknv Kiyosam loogwn so wc kunum. Loonyi deenso ngulv Samosub haanum. Hoqgv loogwn so Miletasam wc kunum. 16Poul Asiya gvdaho mood moomangam meceqgokam wwm tamab mwv Ipisib hvraqb ws wda dvb mwwnum. Mwv Jerusalemho vnwq kvtaqb wc dvb mwwnum, nyorib wdub nyibaloqkam Pentikost aal jaqkam wc dvb hengnum.

Poulwg Ipisi Nyiixa Nyi Tulungam Svxin Benam

17Poul Miletas hoqgv Ipisig dvrwq namlo hoqg nyiixa tulungam mwwg dookub wtwk hvl nyi kanam banv pui bilwqnum. 18Bulv kokw so mwam kaapa yukho mwv bulam benum, “Ngo Asiya gvda so wc aal jaq hoqgv hoggub nyil hwd moodam nulug lvgab doobanum ham nulv cengdo. 19Juhudi tulungv ngam ywrsil nyis wsbakam ngo hentwram henl nyiqs tanap dijol At Swg nyerab nyil hog mwlwngam hentwr mwlwngam hent kun. 20Nulv cengdo, ngo nulam nyi rolu hoola nulug namho bekinam hvb la tomswrnam hvbkalam nulam ngoqg svka kaadynam mam hog gokam mwwram maab ngo nyitkun. 21Ngo Juhudi tulungam ho Nyoodo nyi tulu mwlwngam aiyinwb bulam nyic nyia hoqgv mwwkur gvdwl Pwnbog dookub wkur tukuk ho ngulug At Sw Jisun mwwjw tvk hvl aljaqb buut xaat kun. 22Ngo sija Dvrwqbo yalwg benam mam tal, Jerusalem alo hognvkv ngam nyitayin ham cengmab wdwn. 23Hvbmabde ngam Dvrwqbo Yalv bopam vxho ngoqgab hentwr kaasngv kaaya yaal doodu dvnwk hvl betamnam mam, ngo sam aro cengdwn 24Hvbmabde ngo ngoqg atwg swwgam ngo hog hvvtw maagub mwwl, hvbmabde At Sw Jisug ngam nyitwk hvl jinam bonam niqtuq nyilin gvdwl, mwwg Tugu puiyam bel Pwnbog anyangam bekin tvk hvl benam sam nyinya jitws mwwdwn.

25“Ngo nulug mwlwg pengko ho vigo wgaq kunv Pwnbog lvpw-hatiam bekin yvtwn. Hoo sija ngo cengdwn nulv hiyvkam ngoqg nyuqm mam lokta kaapa nyokram. 26Hoqgab ngo soolog so nulam bid lalal jvqtw jaqb bekin dvn; nulug pengko hoqgv hiyv ak gon ywwma baloqkam, hoq yolungam ngo baqram. 27Hoggab ngo Pwnbog mwwnam bvrwqngam nulam bekin maab hog gokam mvvsil ap maapan. 28Hoqgab nulv atv hengab doonyia sulaka hoo Dvrwqbo Yalv nulug alaqho gvqlwq jiknam pvtwngam hengabl rvkil doogto. Mwwg ko Tuupam hirin rinnam, Pwnbog dvrwq namlongam hindib sviya rvkynam hvb rvky jito. 29Ngo cengdwn, nulam ngo wleq kalam twqda kokw daab svca cvvtwngv nulug pengkob haal nulam hiyv nvkam bulv apaqram. 30Ho lok moodv haatayin nulug atwg nyi tulug acam hoqgv nyi tulungam xaalyo banv mwwjwbo nyi tulungam bulug kokwb wwm dvb nulug acam hoqgv boopin booral bulug dookub wgtayin. 31Hoqgab hengab to, hoo ngoqg nulam ai aalwb nyiqs tanap rooxo tvl vnyw nyium paqta go nulam vxiam tomswrnam mam mwwgabl dooto.

32“Hoo ngo sija nulam Pwnbog alaqb la mwwg anyabo puiywg dookho gvqlwq jig yukun. Mwv nulam ator mvdwb jitayin, hoo mwv mwwg nyi tulungam jidub apnam lvqc cisam mwv nulam jitayin. 33Ngo hiyv akgonwg rup, hun ho vjam kaaby maatwn. 34Ngo ngoqg soq alaq lvqnyig lvgab ngo bon nyis banv, ngo la ngoqg ajin tulug hog mwlw koos buqs, vj orioqngam hoo dvs twwsam atv door twnwr sul swwnam, nulv atv cengs do. 35Hog mwlwngam ngo nulam nyikin banv nyil kaakinam hvbkalam kwrwb bon nyigdvl jwwgw homabo nyi tulungam ngulv svka dvb nyidwn, At Sw Jisug benam mam mwwgabto, mwv benum, “Naanam mam jinam yaangv hemp ponam jaqkv.’”

36Kokw so Poul mwwg goonam mam goonya tukul, mwv kumbw tvl bulug lvgab xumnum. 37Bul mwlwngv mwam gwrgab tvl xabjol moopup dvtaqnum. 38Mwam bulv kaapa kuram hvl benam mam mwwpa banv mwwdwqnum. Kokw so bulv mwam jaajho godab wlwq mingnum.

Currently Selected:

BON 20: NISS

Highlight

Copy