BON 17

Tissolonikab Poulwg Wnam

1Bulv Ampipolis la Apolloniyab wpeq banv Juhudi tulug Sinagog nam dook Tissolonikab wnum. 2Poul mwwg atwg nyicwb mwv Sinagog nammwb haanum. Kokw so Doonu dvk aal loum ditaqho mwv Dvrwqbo pota hoqgv nyi tulug lvgab bvrwqngam domyaq minsnum. 3Mwv nyi tulungam Ywwnbo akv hentwram hendwb nyinum, ho mwam sik boam purab dukub nyinum hvl bulam bekinnum. Poul benum, “Ngoqg soq nulam bekin gvdwn ak Jisu si mwv Ywwnbo akv.” 4Kokw so bulug pengko hoqgv Poulwg benam mam nyi tuugin tvjw banv bulv Poul gvla Silaswg lvgab nyemaq daqbanum. Hoqhvb kalam Pwnboam xumn bo Gwrik nyi ata go la xikumnam nyem pvtw go Poul la Silaswg lvgab nyemaq daqnum.

5Hvbmabde Juhudi tulungv ham haaxaq banv bulv lamta ho nyi almab gaqkar yvnbo nyi tulungam goqkum banv nyemaq twqlayil bopam mam hur-marab gob mvl apnum, hoo Jasonwg nammam bulv ruqa banv Poulwn la Silasnvn meegaql nootul nyi tulug agaho boolin tanum. 6Kokw so bulv bulam meepa kuma yukam bulv Jasonnvn la mwwjwbo nyi tulu gon bopam hoq saab dookub bulam siilwq banv sogoql goql benum, “Soq nyi tulu si gvda mwlwho yolu swcin rooxob nyig bogo! Bulv sija ngulug bopamsi haado, 7Jason bulam mwwg namho doog gvdo. Bulv Lvpw ab bokumg pvvbam tamab pvvb juqbo pakun, hoo bulv lvpw asaq ak Jisu ngvk hvl benam ak doodnvk hvl bedwn.” 8Soq agam tulu sam bebnv bulv nyi acammam la bopam hoqg gora ab tulungam hur-marab bogub mvl apnum. 9Bopam hoqg gora ab tulungv Jasonnvn la mwwg ajin tulungam twngk paqdynam mam paqtwl kokw so bulam tolin tukul wwm kunum.

Beriya Gvdaho Tugu Pui Bekinam

10Ariyum kan kalam mwwjwbo vbw-bor tulungv Poulwn la Silasnvn Beriyab kanamnum. Kokw so bulv Beriyangam wc yukam bulv Juhudi tulug Sinagog nammwb wnum. 11Beriya gvdaho nyiv Tissolonikag nyiam hoopu-haabia yaanam. Bulv pui bekinam mam tatwl haagab alwb tanum, hoo aalwg looxiam bulv Dvrwq potangam Poulwg benamv jvqtwngam bed hvl potangam kaal doonum. 12Bulug pengko hoqgv nyiv vigo mwwjwnum. Gwrik nyi tulug, gora dvn tulu gola hoo Gwrik nyegangv vigo mwwjwnum. 13Hvbmabde kokw so Tissolonika ho doonbo Juhudi tulungv Poul Pwnbog agam mam Beriya gvdaho hvraqb begaql yvdu dvk hvl tapa tvl bulv hoqb wbnv nyi tulungam biywr banv nyemaq twqnum. 14Ho mwwjwbo vbw-bor tulungv cox alwb Poulwn soiyoqb kanam tvl sa-svlo bviywrb wxia mvnum; hvbmabde Silas la Timoti bunyiv Beriya ho hvraqb dooba suknum. 15Poulwn wlwq minggwl bool wnbo nyi tulungv mwwg lvgab kvtin xaqgub wmin gvnum. Bulv kokw so Beriyab wkur dukho Poul bulam Silasnvn la Timotinvn mwwg dookub cox kvtaqb vnwqb wg dukul mwwg lvgab bon nyibam tujuk hvtak hvl bilwqnum.

Etenwb Poulwg Wnam

16Poul Eten bopam ho Silasnvn la Timotinvn kaayal doodu dvkho bopam bumpwngam murty rooxo dvb kaapa tvl mwwg hangv mwwr alnum. 17Hoqgab mwv Sinagog namho Juhudi tulug lvgab Nyoodo nyi tulug lvgab, Pwnboam xumn bo nyi tulug dookho, kwm-kor mvk haat ho nyi kaapanam gotwq bolo mwv looxiam bvrwq domyaq minsnum. 18Ipikurian nyi ata go la Istoyik tomswrbo nyi tulug lvgab mwv bviyaq minsnum. Nyi tuugin benum, “Soq nyi aksi, mwv hog nvkam yu hog mwlwngam cingtwr yaagub hogam yu betadvn?” Hvbmabde nyi tuugin benum, “Mwv gvda asaq goloq Pwnbo akwg pagoqkam bekin tad nago.”

Poul Jisug puiyam turkur kunam pagoqkam bekinam mam bulv tatwl soq sam benum. 19Hoqgab bulv Poulwn nootu layil mwam Aropagas dookum ho boa banv benum, “Ngulv noqg nitib tomswrnam ak goodu gvdwn sam cengnwdo. 20Ngulv tanamv noqg begdvn tuugin hv ngulug lokkam taka maanam go, hoqgab ngulv hoqhv hognvkv yu ham cengnwdo.” 21Etenho doonbo nyi tulungv la Nyoodo nyi tulungv bulug mood mooma mwlwngam gon nit kusuqngam bekho la tak gab mooma jempaqnum.

22Poul Aropagas dookum ho daqrab banv benum, “Atwg nyi tulu! Ngoqg kaagamv nulv hog nyitaq mwlwho Pwnbo tulungam bos jijaq banv nyil mvl swwdo. 23Hoqgab ngo nulug bopam lvpab wpeql xumk nam tulungam kaanamv, ngo yugw pvvb ao golo hoqhvb xeqpwl apnam akam kaapanum, “Cengmanam Pwnbo gab!” Hoq nulug cengmakam xumnam ak sam ngo sija nulam bekin gvdwn si. 24Gvda gvtam la hoq aoho doonbo hog mwlwngam pwnbo, ao gvdangv la gvda gvtwg At Swv, mwv nyi tulug pwnam xumk namho dooma dvn. 25Hvbmabde mwam nyiv jid bvk hvl mwwg gab bon nyija dvb nyima dvn, hoggab mwv atv su nyi tulungam swwdwb, saqdwb ho nyi tulungam hog mwlwngam jidwn. 26Mwv nyi akin hoqgv hvd mwlw nyobam pwlinum, hoo bulam gvda gvt tvqpw ho doodub jipan. Mwv atv otuqho suklak moodam hindib xirwl apnum, hoo gvdangam nyi doody koam mwrwl apnum. 27Soq sib bulam mvnam si hvbaloqkam bulv hoggub naal mwam bulug dook ogum mam hempa mvdwb sulak. Hvbsujaqkam Pwnbov jvqtw jaqb ngulv hiyv hoqgvkam aado ho dooma dvn, 28hvbmabde nyi akgon benum,

“ ‘Mwv ngulam ator jigam gab ngulv swwdwn, wgaql yvdwn hoo doodwn.’

Ho soq sam nulug pengko hoqgv nyijwq-nyegam benbo nyi ak benum,

“Ngulv kam mwwg kov.”

29Ngulv mwwg koob nyigam gab, ngulv Pwnbog nyuqtuq-moorv hun rup hoqgv mvnum nyia kog mwwlaq mwwpaq pwnam hvb nyid nvp mwwdwb nyima dvn. 30Nyi tulungv cengma daqdwkho Pwnbov nyi tulug nyixiaq wxaqnam mam kvvmwnum, hvbmabde sija nyi mwlwjaqkam bulug almanbo lamta hoqgv wkur tukuk hvl gaml jipa ku. 31Hoggab mwv gvda gvtam pw-hwwdwb hvl aal xipwl ap pakun. Mwv hoq nyi akam sik boam turdkub purab tukul nyi vxiam kaakin pakun!”

32Poulwg siknam hoqgv purab kunam bvrwqkam tatwl nyi tulungv tuugin nyirj- nyiryanum, hvbmabde nyi tuugin benum. “Ngulv soq pagoqsam lokta noqg galoqkv benam mam tvnw do.” 33Kokw so Poul dookum hoqgv lengknum. 34Nyi tuugin mwwg benam mam tvjw banv mwwg lvgab nyemaq ceenum. Mwwjwbo nyi tulug pengko hoqgv Dionisiyus akgon, mwv Aropagas Dookum hoqg nyiv ho Damarisvk hvl eminam nyem ak la nyi asaq ngvkam mwwjwnum.

Currently Selected:

BON 17: NISS

Highlight

Copy