BON 14

Poul la Barnabas Ikonium Wnam

1Ikonium hookam Poul la Barnabas bunyiv Juhudi tulug Sinagog nam urab haabnv Tugu Puiyam bekinnum, ham tatwl Juhudi nyiv la Nyoodo nyi tulungv vigo mwwjwnum. 2Hvbmabde mwwjw maanbo Juhudi nyi tulungv Nyoodo nyi tulungam ol lubur tvl bulam mwwjwbo nyi tulungam hang baqrab banv ceebiob nyinum. 3Hvvky tulungv hoq gvdaho apo jaqg doonum. Bulv haakam alwb At Swg puiyam bebnv mwwg anyangv jvqtw jaqb doodnvk hvl kaakin banv bulam swrdorxeqb nyimanam mam nyibnv kaakin mvdwb bulam ator jinum. 4Hoq bopamho nyi tulug hangv pwnyi gob mwwnum, tuugin Juhudi nyi tulug taqlwb, hoo tuugin xuqnam tulug taqlwb mwwnum.

5Kokw so Nyoodo nyi tulungv la Juhudi tulungv lokub nyiyin akin gob nyil xuqnam tulungam hvnyw-har nyipa dvb hvl bulam wlw hurdwb nyig wgbo nyi tulungv goormins kunum. 6Kokw so xuqnam tulungv soq pui sam tapa tukul bulv Listrab la Darneb Likaoniag bopam tulu hoola ogum bviywrho doonbo bopam keknv, 7hoo bulv Tugu Puiyam bekin kunum.

Poul la Barnabas Bunyiv Listraho Yvnum

8-9Listra nampamho nyi ak ko bwwiywk hoqgv lukum kuml gorab nyomab doonbo nyi akv Poulwg benam mam tal doodunum Poul mwwg mwwjwnam mam kaatwl, mwam mwp jikin do mwwnv, mwam kaagab jinjin banv 10vc alwb benum, “Daqrabto!” Ho dara nyi akv daqrab banv wgaql yvnum. 11Hoo soq sib Poulwg nyiknam mam nyi tulungv kaatwl, bulv sogoq, goqrab nyiabnv benum, “Nyiib pwnbo tulungv nyiknv ngulug dookub ipoq paku!” 12Hoqgab bulv Barnabasnvn Jisu, ho Poulwn Harmes hvl eminum, hoggab Poul mwv agam xilo goonbo gob nyinum. 13Jisu Pwnbog xumk nam bopam bviywrho doonum, ho Jisu Pwnbog nyub akv svv hvvb hoq la opungam xumkumko viyap haagab bwa banv, mwv la nyi tulungv xuqnam tulungam xuml xumtab haanya tanum.

14Kokw so nyi tulungv hoqhvb nyitanam mam Barnabas la Poul tapa tvl, bulv nyi pvtwg lvpa rajaqb xara banv bulug vjam twqjorl sogoq goql benum, 15“Nyi tulu, nulv soq sam hoggub nyidwn? Ngulv kam nulug hvk nyiv sulak! Ngulv nulam swcw nyodongam, sa-svlongam hoo hoq aoho doonbo mwlwngam pwnbo Pwnbog Tugu Puiyam nulam, sima bo Pwnbog dookub murty ui panam hoqgv mwwg gab wkur tukuk hvl bekin dvn. 16Kol otuqho Pwnbov nyi tulu mwlwjaqkam bulug mwwlwqkob at atwg mwwkub nyim wmnum. 17Hvbmabde aalwg looxiam bon al kvda boam nyibnv mwv doodnvk hvl kaakin doodwn, mwv ao toloqkv nyodongam hodwb jidwn; mwv nulam mood jaqkam am temiam jidwn ho mwv nulam dvsam jidwn, hoo nulug hangam jubxo-yaro dvb hemp pol swwdwb jidwn.” 18Hvvky tulungv hoqhvb bed kulinkam bulam xuma mvdwb miceq gokam bitur nyok maanum.

19Juhudi nyi tulu go Pisidiyag Antiok hoqgv la Ikonium hoqgv haanum; bulv nyi tulungam ol lubur tvl bulug nyemaqb twqkub banv Poulwn wlw hurnum hoo kokw so mwam bopam agab sidkun go mwwnyia banv seelinum. 20Hvbmabde mwwjwbo nyi tulungv mwwg ogumho doqkum doqlum yukam mwv gorab kunv bopam urab haaknum. Loogwn so mwv la Barnabas Derbvb wknum.

Siriya Gvdag Antiokwb Wkur kunam

21Poul la Barnabas Tugu Puiyam Dere gvda hv bekin yukam nyiv vigo mwwjwnum. Kokw so bulv Listra, Ikonium, hoo Pisidiyag Antiokwb wkur kunum. 22Bulv mwwjwbo nyi tulungam biywr bebia banv bulam atorb mwwg dvl hindib mwwjwl dootwk hvl benum. Bulv bulam tomswrnum, “Ngulv Pwnbog lvpw haty lo haadwb hentwr lwwywngam hendwb nyitayin.” 23Dvrwq namlo vx gab bulv nyig wgbo nyiam bul gab xuql ap jinum, hoo bulv swgw banv hoo dery reebnv bulam bulug mwwjwnam At Swg alaqb gvqlwq jinum.

24Pisidiya gvdangam wpeq laikul bulv Pompiliya gvdangam wc kunum. 25Bulv Tugu Puiyam Parga hoola hoqgv Attaliyab ibnv bekinnum, 26hoqgv bulv Antiokwb issib jookur kunv bulam Pwnbog alaqb gvqlwql jitwl bulug niqtuq nyilin kunam bonam nyirabko ho wc kunum.

27Kokw so bulv Antiok ho wc yukam, bulv dvrwq namlo ho nyi tulungam goqkum banv Pwnbov bulug lvgab doomin gvl hog mwlw nyinam wnam mam, ho hoggub nyil mwv Nyoodo nyiam mwwjw mvdwb lamtangam mvko jinum ham bekinnum. 28Bulv Antiok ho mwwjwbo nyi tulug lvgab apo go doomin gvnum.

Currently Selected:

BON 14: NISS

Highlight

Copy