MARK 4

Chili Kirip Athenghlan

(Mot. 13:1-23; Luk. 8:4-15)

1Anang langpe akung damsi paklangpon phakngo. Lalong la-an ako-ong arleng anangdung long wang chingrumo, anang langpe long isi tilong along arlusi iningo; aro la ahuwit arleng langpe adung bam alongsi dolo. 2Anang pathenghlan si analiyok ako-ong alamthe paklang ponhilo, aro anang kapaklang amun analiyok pulo: 3“Onenot! ihut amu kirippo chili amu kiripyok olesi damo. 4Aro anang kiripjong akosi, adhok achili amu ke duwar akung jang damo; aro wohel wango aro chongthok det no. 5Kamprek chili amu ke lungle kang-ar kido longsek athak jango aro lunglepo karthakthe apotsi, arong wangdapmo. 6Aro konam arnipe wango, la-amun phang-oh ongsi, angkur kidam un-eh apot si, kreng hapmo. 7Kamprek chili amu ke ingsu aju jangdamo, lalong ingsu arong hel thesi anangyok sok arong hel jol detno, aro athe wang un-eh yongot. 8Kamprek chili amu ke akor kido lungle athak jangdamo, aro arong wango, aro arongpe thelo, aro ahrong dingo, aro sok akok polong athe wango, aro thom-kep, aro kep thorok, aro phoro isi athe wango.” 9Aro anang pulo, “Nali ano do tene one-not!”

Athenghlanpo Aron

(Mot. 13:10-17; Luk. 8:9-10)

10Konam Jisu ahudet kido, anang alokjor helpen bang kere-hini adun abang anangyok chikomwol si athenghlan hel aron meso arjulo. 11Aro anang analiyok pulo, “Naliyok Arnam-alongri kabutisit acho alamthe nali pido, manta ingho mokol along do, ahuwit abihini athenghlan along wang phrotman: 12Labang hel aphan, “anali thek ke theknge, manta chiron un-eh ye, aro karju ke arjuye, manta abhu hlonghle ye, aro pene bak ke nali chirul phaksi wang, aro anali pap ronpi ye, la-anat anali ngot ahuwit alam athenghlan pensi analiyok thando.” 13Aro anang analiyok pulo, “Nali labang athenghlan abhu hlonghle yong ma? Laparake ahuwit athenghlan pot badi abhu hlonge? 14Labang amu kirip arleng po lamthe ripman. 15La mehel ke duwar akung kirip chili amu helo, ingho yok lamthe ripman, konam anali oneman, si-ik jongsi wangman aro anali long kirip alamthe kharpon detman. 16Aro ladisi arlong athak kirip chili amupo: konam arleng hel lamthe oneman, anali jongke aneng arongsi chidengman. 17Manta anali bithang angkur kangwe anat, aro anang bekso arni yoksi chihiman; laparake, konam lamthe anat aduk-tap, lale honjat wang, jongsi anali lamthe tikang det man. 18Aro kamprek amupo mar ke ingsu ajulong ripmo: anali ke, ingho lamthe oneman, 19manta pirthepe yok nengpi-ongsi, aro lungle-phalang palorsi, aro boi-bihini alop wango, aro lamthe jol detman, aro athe paklang un-eh yongot. 20Aro akime alungle long kirip chili amupo anali ke: anali lamthe arjuman aro mehel chideng man, aro thom-kep, aro kep-thorok aro phoro-isi athe wangman.”

Pachik Parkup Klak Asati

(Luk. 8:16-18)

21Anang analiyok aro pulo, “Me-lur isi gosa athak bibesi, ho arlo lale ki-ih ahong arlo biman ma? 22Piyok pu tene paklang si kibi aparke, isi abihini bisitse yong; lale patha-ang si kibi aparke, isi abihini butisit ke bibeyong. 23Inghone bak karju ano do pu tene onenot.” 24Aro anang anali yokta pulo, “Nali potsi arju man bangpo nengpine one-not; nang kipi alin atengsi nangyok ta alin pachirline, aro layongta ongchot nangpiye. 25Piyok pu tene ingho long do, anangyok ongchot pibo; aro ingho beksota wedung, anali pot dochokdo, anang rideng para ponpi detne.

Arong Kiwang Chili Athenghlan

26Anang aro pulo, “Arnam-alongri poke ihut arlengpo lungle athak chili amu kiripsal badi, 27aro amek jange aro thure, anuwe aro anelo, aro chili arong ingbobme aro the-dinge, bang po pot badi chiplang anang chithan un-eh. 28Pirthimipe abithangsi, ango ke arwo-pawang man, laparake arong ahrong pawang man, bangpo aphel ke apum, la aphel sok athe-amu pawang man. 29Manta sok konam athe mene, jongsi nok-ke ensi dame, piyok pu tene sok kirot apor wang hlengo.”

Jamu Amu Athenghlan

(Mot. 13:31-32; Luk. 13:18-19)

30Anang pu pono, “Pot pen te ili Arnam-alongri pangbar une, lale pot athenghlan pen ili pachiklan pon une? 31Bangpo ke isi jamu amu badi, bangso, konam lungle long ripme, pirthimipe athak ahuwit amu yok akibek chot; 32yongta konam labangso ripme, aro ahuwit bap arongyok thechotman, aro arorem wangman, lasi suneng kangjar awohel labang aben long atar chihorman.”

Athenghlan Sal-lappon

33Labadisi ako-ong athenghlan pensi, Jisu anali ka-one un aleng analiyok bangpo alamthe thano; 34anang athenghlan kithan aparke ke, anali yok isita thanthe yongot, manta anang abithang adun hel yok ahudetsi ahuwit alamthe mesosi than dakngo.

Jisu Tomon Akithe Kapaham

(Mot. 8:23-27; Luk. 8:22-25)

35Labang arni, konam anithu apor wang hlengo, anang analiyok pulo, “Ili langpe ha aga apar damsonang doh.” 36Aro rat ayok tikang detsi, anali Jisu yok tilong athak anang kidomat matsi pono. Aro kamprek tilong helta anali pen kido. 37Isi tomon akithe wangjap mo, aro lang adul tilongyok wang tongo, lasi tilong along lang pleng rang rango. 38Manta Jisu tilong angkon long punghul athak aphu bisi, amek jangsi kido; aro la-amun adun hel anangyok pangthuro aro pulo, “O Paklang po hali ke thibo, bangpo nang hali chiron dunde yong ma?” 39Anang thuro, aro tomon yok tamo, aro langpe yok pulo, “Ingsam mot, ham mot.” Laparake tomon ingsamo, aro ham detno. 40Anang analiyok pulo, “Nali piyok phere do? Minon hok ta krolkre ma?” 41Aro anali chiphere ongsi, ihut para ihutyok chipujolo, “Anang ke inghote, tomon pen langpe ta anang yok mengman?”

Currently Selected:

MARK 4: AMRI-BSI

Highlight

Copy