MARK 16

Jisu Kithi Para Kibur

(Mot. 28:1-8; Luk. 24:1-12; Jhn. 20:1-10)

1Kisang-arni kidamtang aphel, Mary Megdalini pe pen Jems po anang ai Mary pe aro Salomi pe Jisu abanglong jangthu kihelyok lahel kanempru jangthu namo. 2Ni-arul arni adap prang arni kiwang apor lahel thiri ahilikpo ayok damo. 3Thiri aduwar para lahel hijan chipujolo, “Ili phan inghote thiri ahilik arlongpo pakonglong piye?” 4La-apor lahel kilang ayok ke, arlongpo pakonglong si kibi thekngo; piyok pu tene labang arlongpo watsi aplang akithe kido. 5Lahel thiri ahilikpo yok lutdamsi, akiding pe akilok phlan kachi-ik ihut riso arlengyok ancho-ari aga iningsi kido theksi, lahel bismat pahlongo. 6Manta anang analiyok pulo, “Neng sohrim mek; nali kros long kithi Najaret Jisu yok langwor do; anang thuro, holek ingjong; langot, lalo anangyok anangyok kibi athempo.” 7Manta nali damot, anang adun hel yok aro Pitor po yok thandamot, anang nalingo-ngo si Galili ayok damjongdo; anang jibadi naliyok kithan, ladisi naliyok lalong anangyok thek hlonge. 8La-amun lahel olesi, thiri ahilik po para kat-katsi damo; piyok pu tene kaphere aro bismat hlongo; aro lahel kaiyok ta lam chipuhalhe yongo, piyok pu tene lahel kaphere-ong kido.

Jisu Mary Magdalini peyok Kachiklang

(Jhn. 20:11-18)

9Ni-arul arni adap prang Jisu kithi para burphaksi, inghoyoksi Jisu si-ik Arnam bang thorok-isi anang para ka-ujhar, labang Mary Megdalini pe yok ango chiklango. 10Anang damsi lahel aneng chipaduk si suru jongne kido ango alok hel yok thano. 11Manta Jisu hreng phakngo, aro anangyok thek dungo pusi kipu karju amun, anangyok lahel krolkre yongo.

Jisu Adun Bang-hiniyok Kachiklang

(Luk. 24:13-43; Jhn. 20:19-23)

12Labang aphel, lahel bang hini rong ayok damjongne kido ako anali bang hiniyok Jisu kamprek athoksi chiklango. 13La-amun lahel damsi bang hel ayok parju pono; manta lahel ta analiyok krolkre yongo. 14Labang aphel bang kere-isi adun cho-jun long iningsi kido apor, Jisu analiyok chiklango aro kibur phak aphel, anangyok kithek hlong abang hel kikrolkre apot, anali kikrolmo aro aneng karthat kachibi hel ayok tamo. 15Aro anang lahel ayok pulo, “Nali ahuwit pirthepe yok damot, sanse-chanjal ajaldung ango kime-alamthe paharnot. 16Lalong ingho krolsi baptist chiplang, anang jok hlonge; manta inghosi krolmo doman, anang ado chibat hlonge, aro labang asinhel kikrol abang adak chiklang dune, 17nali nemen pen si-ik ujhar une; akimi-akimi alam than une, phurul ayok rung une; 18anali kithi-nange penebak abi alang jun pong yongta, lahel inghohe ye, kiso-kilak arleng abang long ari bat tene lahel meye.”

Jisu Ethakpe Thursi Kidam

(Luk. 24:50-53)

19Labadi si lahelpen lam kachithan tang aphel Hemphu Jisu yok ethakpe yok thur pono aro Arnam ancho-ari aga iningo. 20La-aphel lahel ole damsi, ahuwit athem along lamthe pahar pono; aro Arnam la jong-jongsi sal tikisi, labang alamthe atengsi asin aporman paklang pono. Amen.

Currently Selected:

MARK 16: AMRI-BSI

Highlight

Copy