MOTHI 28

Jisu Kithi Para Kibur

(Mrk. 16:1-8; Luk. 24:1-12; Jhn. 20:1-10)

1Kisang-arni aphel, kicheng hathi-arul arni adap prang kangting rim-rim apor, Mary Megdalini pe aro kamprek Mary pe thiri ahilikpo kilangyok damo. 2Aro langot, chiklik aghai wango; piyok pu tene Hemphu atharlon ihut, ethakpe para wang sunsi, wango aro arlong aplangpo pakonglongo, aro labang athak iningo. 3Anang mahangpo suneng kabarlang badi kido, aro anang kachi-ik apehel ingphet badi lok phlan. 4Piyok pu tene kihon abang anang yok phere ongo, aro abang klem detsi kithi arlengmat chiplango. 5Manta tharlonpo arloso helyok thano, “Nali phere yek; ne than undo, nali kros long kithi Jisu yok lang-wor do. 6Anang holek ingjong; piyok pu tene anang jibadi kipu, labadisi thuro. Wangot, anangyok kibi athem wang langot. 7Laparake dam sirakngot, aro anang adun hel yok labang alam thanot, “Anang kithi para burphak ngo; aro langot, anang nalingo si Galili yok dam jongsi do; lalong nali anangyok thek hlonge; langot, labangke ne naliyok kapahar alam thano.” 8Lasi anali kaphere pensi aro aneng arong ongsi thiri ahilik para parjangwet si damo aro anang adun hel yok kat katsi kithan yok damo. 9La-amun photsi, Jisu analiyok chiklango aro pulo, “Nali pen nengsam pado nang.” Aro anali anang dungyok wango, anang keng otno, aro anangyok chirdomo. 10Laparake Jisu analiyok pulo, “Phere yek; damot, aro ne-korte hel Galiliyok padam tol alam than damot, lahel lalong neyok thek hlonge.”

Kihon Abang Kijodam Alam

11Konam anali dam jongsi kido amun, angkhan kihon abang rongpeyok damo aro bangthe hel yok kido kangwe kachiplang hel thandam detno. 12Kithe kiding helpen sar-lar hel chipangrum mo, anali bod-sere chirhepsi sonturi helyok nohok ako-ong pilo, 13analiyok pulo, “Hali mek kijang amunsi, anang adun hel anuwe wango, aro anangyok chunghu si pon detno,’ ladi pune thanot.” 14Labang alam gobornorpo arjuhlong, tene hali anangyok padok nge aro naliyok phere-sohrim nali pangweye.” 15Lasi anali nohok eno aro anali kapathan badisi tikilo. Aro labangpo atomo Jihudi hel asitem chitha-angsi, minihok do.

Jisu Anang Dunhelyok Kithan

(Mrk. 16:14-18; Luk. 24:36-49; Jhn. 20:19-23; Aka. 1:6-8)

16Minon ke bang kere-isi adun hel Galili along, inglong kartulpe yok kidamyok Jisu kithan apot lalong yok damo. 17Konam anali anangyok thekngo, anali anangyok chirdomo; manta angkhan ke kikrol ahik-hak dolo. 18Aro Jisu adungyok wango aro analiyok pulo, “Ethakpe pen pirthimipe athak long ahuwit apharan neyok nepilo. 19Lasi damot, aro ahuwit asonyok adun otenot, analiyok Apa, aro Aso aro Jiuli-Kangthir amenpen baptist otenot, 20aro ne naliyok pot thano, lamehel ahuwit kamainot yok analiyok paklangot. Aro nengchipari, ne owepo kijut arniyok, nalipen arnita do dunne.”

Currently Selected:

MOTHI 28: AMRI-BSI

Highlight

Copy