MOTHI 16

Asombhik Asin Kihang

(Mrk. 8:11-13; Luk. 12:54-56)

1La-amun Pharisi aro Saduki hel adung wangsi, Jisu yok porman kilang yoksi, ethakpe para asin isi anali paklangpi ayok chingduk ngo. 2Anang analiyok thano, “Anithu apor inghun ero tene, botor meye pusi nali puman. 3Aro adap prang apor, ‘minike tomon herel arwe wangta hal’ piyok pu tene inghun ero aro suneng ingder do, manta nali asinhel aporke thandak un-eh. 4Labang owelong kangho aro kidoner arlengke asin chihangman, manta Jona po asin aparke lahelyok prek asin pipe ye.” La-amun anang analiyok tikangsi chikakngo.

Pharisi Aro Saduki hel Athengkur

(Mrk. 8:14-21)

5Konam adun hel prek aga hlengo anali kicho ahim kipon yok tenge jango. 6Jisu anali yok pulo, “Pharisi pen Saduki hel athengkur para atot chipado.” 7Aro labangso anali dak chirwalsi pulo, “Ili him wanwe yong.” 8Manta Jisu atot hlongsi pulo, “Ei kikrol chet abang, piyok te nali him kangwe apot nali chirwal do? 9Nali minon hokta abhu hlonghle yong ma? Him plang phongo pen hajar phongo arleng yok kapacho, nali neng ri-re yong ma? Aro pachi kante nali pangrumo? 10Lale plang thorok isi ahim pen hajar phili aro pachi kante nali pangrumo? 11Ne him alam nali kithan pot badi nali abhu hlongkel lo? Pharisi aro Saduki hel athengkur para atot chipado.” 12Laparasi anali abhu hlongo, anang anali yok him long kapalok dun thengkur alampoke thanthe yong manta Pharisi pen Saduki hel kapaklang alam yoksi kipu.

Pitor po Jisu yok Kapachini Alam

(Mrk. 8:27-30; Luk. 9:18-21)

13Aro Jisu Sisiriya Philipi ahol ayok damsi anang adun hel yok arjulo, “Rat hel Arleng Aso yok inghote pusi puman?” 14Aro anali pulo, “Angkhan ke pudo Johon Baptist po, kamprek ke pudo Elija po, aro kamprek hel ke pudo Jeremiya po lale turkihel ihut.” 15Anang analiyok pulo, “Manta nalike neyok inghote pusi nepuye?” 16Simon Pitor po pulo, “Nangke Khristo, kihreng Arnam Aso. 17Aro Jisu anangyok pulo, “Ei Jona po aso Simon po, nang bor-eh kichokpo; piyok pu tene bangpo awi aro a-okpen bangpo nang ngo pachiklangkle yong, manta ethakpe-along kido hane Apa si pachiklango. 18Aro ne ta nangyok thando, nangke Pitor po aro labang arlong athak ne kachikruk ne keme, aro kithi ajakong bangpo yok hal un-eh ye. 19Ne nangyok ethakpe-alongri sabihel nangpiye; aro lalong nang pirthimipe along potsi chingnak nge ma, ethakpe longta chingnak nge aro nang pirthimipe long potsi nang phloknge ma, ethakpe longta phloknge.” 20La-amun, anango Khristo pu ke kaiyok ta pathan hlonghle yok, anang adun helyok than klakngo.

Jisu Aduk Pen Kithiye Alam

(Mrk. 8:31—9:1; Luk. 9:22-27)

21Labang apor para Jisu anang adun hel yok kapaklang cheng pono, te anang Jerusalem yok dam nange, akisarhel, bor-bangthe, kanong paklang hel para ako-ong duk-tap cho nange, aro thi hlongsi, ni-thom arnike burphak hlonge. 22Aro Pitor po anangyok pono aro anang kitamyok chengo, “O Hemphu, Arnam nangyok kajinso padonang; labang ke nangyok jat chiplangple ye. 23Manta anang chipharlep-wolsi Pitor po yok pulo, “Nephel damot, si-ikpo, nang neyok kapangho po. Nang Arnam alamthe chironresi, arleng alamthesi chiron do.” 24Lapara Jisu adun hel yok pulo, “Inghone bak nephel kiwang ar-ih, tene anang bithang chipangdom, aro abithang kros en-ne, nephel-phel wangdun not. 25Piyok pu tene inghosi abithang ajiu aphan chipajok yok ronne, anangke bangpo chipangbo ye, manta inghosi nenat ajiu chitiye, anangke bangpo hlonge. 26Piyok pu tene jai arleng pirthepe dungsi pahlong yongta, anang ajiu chipangho, tene anang pot te alap? Aro arleng abithang ajiu aholan ke pot-wolpi une? 27Piyok pu tene Arleng Aso anang Apa jortang pen anang tharlon helyok ensi kiwangyok aro anang la-amun abangtenyok abithang katiki atengsi angban piye. 28Ne naliyok khanangsi thando, Arleng Aso yok abithang longriyok kiwang thek hlonghle lengke kithi chikuke ye, angkhan arleng, holek arjapsi kido abang asitem do.”

Currently Selected:

MOTHI 16: AMRI-BSI

Highlight

Copy