LUK 4

Jisu yok Honjat Kilang

(Mot. 4:1-11; Mrk. 1:12-13)

1Jisu, Jiuli-Kangthir plengsi, Jordan para wang chirulo aro Jiuli pen ingnam yok pono, 2lalong angkol-hini arni ingnam long si-ik para honjat lango, labang arnihel long choche dungsi kido aro kijut arnike anang an ingchiro. 3La-amun si-ik anangyok pulo, “Nang Arnam Aso tene, labang arlongpo him kachiplang yok thanot.” 4Aro Jisu angpudun phakngo, “Arleng him pen detke hrenghre, ladi kiwi do.” 5Lapara ke Jisu yok inglong kartul long ponsi pirthepe ahuwit longri anangyok paklango. 6Aro si-ikpo anangyok thano, “Labang ahuwit apharan aro anang jortang ne nangpi ye; piyok pu tene lamehel ne rideng pitango, aro ne ingho yok kipi anengdo, bang poyok ne piman. 7Lasi nang neyok nengo chirdom, tene ahuwit nang phansi piye.” 8Aro Jisu wang than phakngo, “Nang Hemphu Arnam yok chirdom nange, aro anangyok detne chirdomot.” 9La-amun si-ik anangyok Jerusalem pon si Arnam ahem kardong athak ponsi, anangyok pulo, “Nang Arnam Aso lo, tene nang bithang holek para alingyok angjangot,” 10piyok pu tene ladisi kiwi do, “Nangyok kiralyok anang abithang tharlon helyok wang pa-en aphan thanne, 11aro, nangkeng ke arlong long tong hlonghle, la-anat anali nangyok ari wang dengdun khopme.” 12La-amun Jisu angpu phakngo, “Ladi pudo, nang Hemphu Arnam yok honjat langek.” 13Aro ladisi si-ik ahuwit honjat lang tangsi, awak kihlong arniyok Jisu yok tikangsi damo.

Jisu Galili Long Sal Kicheng

(Mot. 4:17; Mrk. 1:14-15)

14Laparake Jisu, Jiuli apharan pensi, Galiliyok chirulo, aro anang lamthe adung arel alongri dungyok chitha-ang detno. 15Anang anali Arnam ahem long paklango aro ahuwit ta parklamo.

Jisu yok Najaret Along Kachidengde Alam

(Mot. 13:54-58; Mrk. 6:1-6)

16Konam Jisu Najaret yok wango, lalongsi anang thelo-dingo, anang abi-pun kido badi Kisang-arni anang Arnam ahemyok damo. Anang lo-kangthir kataram yok thuro, 17anang Jisoya turki po alo anangyok pilo aro anang lo puro aro ilong ladi kiwi hlongo: 18“Hemphu Jiuli ne-phuthak do, piyok pu tene kicho kangwehel ango kime-alamthe kapahar yok, anang ne-arwalo, kibeng-thip hel ango kapajok yok, aro chotok abang hel ango amek kicharphak alam kapaharyok, bang hel dongsi hrep kidohel kapajok yok, 19aro Hemphu kachideng anengkan kapaharyok netolo.” 20Aro anang lopo harluk plaksi adun-dun abangyok piphaksi iningo. Arnam ahem long kido abang anangyok lang phrongo. 21Laparake anang analiyok pulo, “Labang lo-kangthir alam mini nali karju hlong lamthe hel chok peno.” 22Ahuwit ta anangyok akime pulo aro anang lo para ka-ole kajinso alamhel asombhik hlongo aro anali pulo, “Anangke Josep po aso kalek ma?” 23Jisu analiyok pulo, “Khanangsi labang sar alamthe nali neyok pulo, “Ei daktor, nang bithang kiso chipame! Kaparnaum long potsi nang katiki hali arju hlongo, labang ahuwit holek nang bithang longri longta tikinot.” 24Aro anang pulo, “Khanangsi ne nali thando, abithang arong longke turki ihutyok ta chideng de. 25Manta, khanangsi ne nali thando, Elija po apor Israyel long hime ako-ong kido, la-amun lalong nengkan kithomne chiklo jon-thorok ethakpe arwe kanghap klak kido, aro longri dungsi ka-ongkal ong kido; 26yongta Elija po anali kaiyokta tolte yongo, manta Sidon alongri long kido Jarephath po yoksi ihut hime arloso pe adungyok tolo. 27Lalong Elisha po kido adak Israel ako-ong arje ibeng kiso arleng kido, aro analiyok ihut yokta pame un-eh yongo, yongta Siriya arleng Naman po detsi melo.” 28Konam anali labang arjulo, Arnam ahem kido ahuwit arleng aneng kang phrolo. 29Aro anali thur pungo, aro Jisu yok rongpe para ujharo, aro inglong kartul athak kikem rongpe long anangyok ponsi, anali anangyok aling kitiye lo. 30Manta anang anali sitem arpatno aro damjongsi dolo.

Akangho Ajiu Kihap Arlengpo

(Mrk. 1:21-28)

31Anang Galili alongri kido Kaparnaum rongpe yok sunsi damo, aro anang kisang-arni anali yok paklango, 32anali anang kapaklang asombhik hlong detno, piyok pu tene anang lamthe apharan pensi kithan. 33Arnam ahem long si-ik ajiuli kihap arleng ihut kido, aro anang hangsi pulo. 34“Ei Najaret Jisu, nang hali pen pot te katiki ayok do? Nang hali kapangho yoksi wangdo ma? Ne thek, nang Ihut Kangthir Arnam.” 35Manta Jisu anangyok tamo, aro pulo, “Dositne do, aro anang para olene wangot!” Konam anali ngosi si-ik ajiu anang yok pakrep dungo, anang para olelo, aro anang yok padukdesi olesi damo. 36Aro anali ahuwit ta asombhik hlong detno aro anali ihut para ihut chipulo, “Labang ke pot badi hak thando? Piyok pu tene apharan aro jakong pensi anang si-ik ajiuli yok toldo, aro anali wang-ole do!” 37Aro Jisu labang katiki asal alam pomar jotmahal longta chitha-ang detno.

Jisu Arleng Ako-ong Kapame

(Mot. 8:14-17; Mrk. 1:29-34)

38Jisu kachirdom ahem para tikangsi, Simon po ahem lut damo. La-amun Simon po ani pe ase kithe ahari kido, aro anali anangphan Jisu yok chingdukngo. 39Laparake Jisu anang dung arjapsi aseyok tamo, aro anang ase hamo. Jongsi thur pen pan analiyok al-poson eno. 40Minon arnipe kichel amun ajatjat bet kiso abang helyok anang dung wano; aro anang ari batsi abangten yokta pame detno. 41Si-ik ajiu hel ako-ong arleng para olesi, hang chero, “Nangke Arnam Aso!” Manta anang mehelyok tamo aro anang lam pathan hlonghle yongo, piyok pu tene anang Khristo pusi kithan-un.

Jisu Arnam Ahem Kapahar

(Mot. 4:23-25; Mrk. 1:35-39)

42Katha-ang amun anang rong tikango aro nisotjot athemyok damo. Aro arleng hel anangyok bisar salsi kido; aro konam lahel anang dung hlengo aro anangyok anali para tikangke kidamde ayok chingduk ngo. 43Manta anang analiyok pulo, “Ne kamprek arongpe hel ayok ta Arnam-alongri kime-alamthe paharpon hlonge; piyok pu tene labang aphansi neyok wang tolo.” 44Lasi anang Judiya Arnam ahemhel long pahar jongsi dolo.

Currently Selected:

LUK 4: AMRI-BSI

Highlight

Copy