LUK 23

Jisu yok Pilat po Ango Kiwan

(Mot. 27:1-2,11-14; Mrk. 15:1-5; Jhn. 18:28-38)

1Laparake anali ahuwit ta asemdung si chingthuro aro Jisu yok Pilat po ango wano. 2Anali Jisu yok ado kolsi pulo, “Hali asonyok kapachon ponpo, Koisor rechopoyok khajana papi tolte, aro abithang yok anangsi Khristo, ihut recho, kachipu arleng poyok hlongo. 3Lapara ke Pilat po anangyok arjulo, “Nangsi Jihudi hel arecho ma?” Anang anangyok pulo, “Nangsi ladi pudo.” 4La aphel Pilat poke, bor-bangthehel pen ratyok pulo, “Ne labang arlengyok jat ado kido angthun thek hlonghle yong.” 5Manta anali aro pu ong-ongo, “Bang arlengpo Galili para chengsi Judiya yok paklang paklangsi arleng helyok pachon ponman.”

Jisu yok Herod po Adung Kitol

6Konam Pilat po labangpo alam Galili arleng mene pusi arjulo. 7Aro lalong Herod recho angbong para kiwang arleng pusi Pilat po than unsi, anangyok Herod rechopo adung yok tol lo, piyok pu tene la aporsi Herod po ta Jerusalem longsi kido. 8Konam Herod po Jisu yok theksi aneng arongo, piyok pu tene anang Jisu yok kilang ar-isi jokha arni inghongsi kido, aro anang para angkhan asombhik asal asin kilange chihasi kido. 9Herod po Jisu yok lam ako-ong arjulo, manta Jisu lam angthan dunde yongo. 10Bor-bangthe hel aro kanong paklang hel adung wang arjap pungsi, anali kilang un-eh ado pilo. 11Herod po pen anang sonturi yongta Jisu yok patharak si, ado pisi, anangyok recho natsi chol akiding pa-iksi, Pilat po adung tol phakngo. 12La arni matmatsi Herod po aro Pilat po bang-hini adak khoi chiplango; labang angoke anali hutur anengsi kido.

Jisu yok Kamari Alam

(Mot. 27:15-26; Mrk. 15:6-15; Jhn. 18:38—19:16)

13Pilat po laparake bor-bangthe, phu-phang hel aro arleng helyok inan taramsi pangrumo, 14lahel yok thano, “Nali labang arlengpo rat ayok kangho aga pachon pondo pusi puman; aro ne holek arleng poyok nali ngosi aporman lango aro nali kangho ado angkipi anat; ne ke jat ado angthun thek hlonghle yongo. 15Herod pota kangho ado hlonghle yongot, piyok pu tene anangyok anang ili dung wangtol phakngo; aro khanangke, anang kithi nange asal jatsi tikike yong. 16Ne lasi anangyok sabukpen pasapme aro anangyok hlopok nge.” 17Minonke anali Kijoktang-kamai arni Pilat po ihutyok kapajok nange kido. 18Manta anali ahuwit ta inansi hangsol lo, “Anangyok marinot, hali phan Barabaspo yok hlonot.” 19(Labang Barabas po rongpe along bang pen kachilare aro arleng kamari anat anangyok akrol long kibi.) 20Pilat po, Jisu yok kihlo ye aneng kido, lasi anang rat ayok iphong than phakngo; 21manta anali ke, “Anangyok kros long tarnot, anangyok kros long tarnot!” pusi hang chot-chotno. 22Pilat po phong-thom long iphong analiyok pu phakngo, “Piyok, anang pot ado tikilo? Ne anang yok kithi nange ado angthun hlonghle yong; lasi anangyok sabukpen pasapbo aro laparake anangyok hlobo.” 23Manta anangyok kros long tar nange pusi anali hang chot-chot no; aro anali asi posi hal peno. 24Lasi Pilat po anali kachihang ong anat Jisu yok kamari yok kihang kipiyok thansi chikeng duno. 25Manta bang pen kachilare aro arleng marine akrol long kidopo yok hlosi anali kiron ateng Jisu yok anali arideng champilo.

Jisu yok Kros Kitar

(Mot. 27:32-44; Mrk. 15:21-32; Jhn. 19:16-24)

26Anali sonturihel Jisu yok kipon jong amun, Sairene alongri para kiwang Simon, pusi arleng ihut yok pochakngo aro anali anang aphang kros po batsi, Jisu aphel anangyok parung pono. 27Jokha rat ako-ong anang phel-phel duno, aro lalong angkhan aneng chiteng si neng kadoho aro anang phan kasuru dun arloso hel inghongsi kido. 28Manta Jisu anali aga chirtingo aro pulo, “Ei Jerusalem arloso hel, nephan ke suru yek, manta nali bithang aro nali sohel aphan suru. 29Piyok pu tene konam baji arloso, jon-jogar kangwe, mok ka-olele pe yok bor-eh kichok pu ye, labadi owe wangsi do.” 30Laparake anali inglong kartul helyok pu ye, “Hali thak jangot;” kardel anglong helyok pu ye, “Haliyok kupklak ngot.” 31Piyok pu tene anali akicham athengpe yok ladi inghol, tene akreng athengpe arongyok ke pot inghole? 32Labang amun bang-hini arleng yokta, arleng kamari ado katiki, analiyok ta Jisu pen kamari yok pono. 33Konam anali “Aphu akhorlop” kipu athem yok hlengo, lalong arleng kamari arleng hel pen Jisu yok kros long taro, aro anang acho ari aga ihut, aro debera ari aga ihut, ado kido arleng hel yokta tar duno. 34Laparake Jisu pulo, “O Pa, analiyok ronnot; piyok pu tene anali pot tikido, anali thekthe yong.” Aro anali sang langsi anangpe hel chithaksi eno. 35Aro arleng hel adung lang phrongsi, arjapsi kido; manta Jihudi kithe-kiding helke anangyok patharaksi, pulo, “Anang bangyok pajok uno; anang Arnam karwal Khristo tene, anang bithangyok chipajok nang!” 36Sonturi helta anangyok patharakngo, adungyok wango aro hor akithor pajuno, 37aro pulo, “Nang Jihudi hel Arecho, tene nang bithangyok chipajok!” 38Lalong anang phu thak ‘Anang Jihudi hel Recho’ pusi kiwi alamthe tarsi kido. 39Ado kido arleng ihutpoke Jisu yok patharak si pulo, “Nang Khristo kalek ma? Nang bithang yok aro hali yokta pajok ngot.” 40Manta kamprek ihutpoke anangyok tamsi, pulo, “Nang ke ladi matmat ado kido ta, nang Arnam yok pherere ma? 41Aro hali ke ado kanghol bisar kangthir ado hali batdo, piyok pu tene halike potsi tikilo labang kamichang angban hlong do, manta labang arlengpo kangho asal tikike yong.” 42Laparake anang pulo, “O Jisu, konam nang longriyok wang, neyokta nangneng chipurki.” 43Jisu, anangyok pulo, “Ne aserengsi nang thando, nang minisi ethakpe-alongri long ne pen dohlonge.”

Jisu Kithi Alam

(Mot. 27:45-56; Mrk. 15:33-41; Jhn. 19:25-30)

44Labang apor anelo baji kere hini apuno, aro baji kithom apunyok ta longri dungsi ingting kukngo, 45la-amun arni pe katha-ang wedetno; aro Arnam ahem long kihing ape phlakni chiplangsi chingsekngo. 46Laparake Jisu kihang-wong asipen pulo, “O Pa, nang arideng ne jiuli champilo!” labang thansi, anang kijut asithe eno. 47La-amun mehel kachiplang hel theksi, sonturi salchak po Arnam yok parklamo aro pulo, “Khanangsi, labang arlengpo ado kangwe.” 48Aro lamehel kilangyok kachingrum abang amek sungdangsi pot kachiplang thek hlongo, aro anali abithang aneng chiteng-chitengsi hemyok chirulo. 49Manta Jisu yok ango para kachini abang, Galili para anang phel-phel wang kidun arloso hel akaholo para arjapsi, labang kachiplang apot hel langsi kido.

Jisu yok Kipep

(Mot. 27:57-61; Mrk. 15:42-47; Jhn. 19:38-42)

50Minonke langot, Josep amen ihut akime arleng aro kadhorom arleng kido, anang ason amel along ihut abangphu yongta, 51anali kachithan aro katikihel chikeng dundesi kido. Anang Arimothiya kipu Jihudi arongpe para kiwang aro Arnam-alongri yok chihasi kanghong arleng kido. 52Labang arlengpo Pilat po adung yok damo aro Jisu abangpo hango. 53Laparake anang labangpo pasuno, aro pe kang-ar pen pero, aro ihut arleng kibibe, ladi arlong ahilik long pa-isi bilo. 54La-arnike Jogan-arni kido, aro kisang arni adung het kido. 55Galili para Jisu aphel-aphel wang kidun arloso hel, aro lahel ahilikpo, aro anang abangpo pot badi bilo, labang thek detno. 56Laparake anali chirulo, aro angnim abihini aro jangthu honjokngo. Kisang-arni ke kanong ateng anali kisang.

Currently Selected:

LUK 23: AMRI-BSI

Highlight

Copy