LUK 1

Nengdok Thiyophilas po

1Ilidak kichok alam amek sungdangne kithek hel aro lamthe kapahar abang ako-ong arleng kiwi-kitok yok anali arideng en pono, 2lake anali inghosi kicheng adak para katiki tang asal alam hakhi kido aro lamthe paharsi kiwi, anali haliyok kapaklang atengsi, 3ne ta kicheng para ahuwit meso chilang-chibem pachikeng tangsi me-at archalsi, kangthir karjap loseng kangsam Thiyophilas po aphan kiwiyok kime thekngo, 4lasi nali khanang alamthe hel thek-re aphan nali kithan tang atengsi wilo.

Johon Baptist po Kiplang Alam Kaparju

5Judiya arecho Herod po apor Abija po agijing long Jakhariya amen ihut bangthe kido. Anang pisope ke Harun po agijing kido, aro anang menke Elijabet kido. 6Anali bang-hini Arnam ango dhorom kangthir kido, aro Hemphu ahuwit kanong aro abi-pun ateng meng phrot si kido. 7Manta anali aso wedungsi kido, piyok pu tene Elijabet pe baji kido aro anali bang-hini ta sar ongo. 8Iphong anang Arnam ango bangthe asal katiki jong aro anang katiki apal kido, 9bangthe po katiki abi apun badisi Hemphu kachirdom ayok katiki apal hlongsi Arnam ahemyok lut damo aro hujung thekngo. 10Minonke hujung kithek amun rat hel mokol long kapingkit jong, 11laparake anangyok Hemphu atharlon ihut athuli long hujung kithek ancho-ari aga arjapsi anangyok chiklango. 12Jakhariya po anangyok theksi anang chiron un-eh pholo aro phere detno. 13Manta labang Arnam tharlon anangyok pulo, “Jakhariya, phere yek, nang pingkit arjulo, nang piso Elijabet pe so-penso ihut hlonge, aro nang anang men- Johon binot. 14Nang nengrong choknge aro aneng ingsame, aro anang kiplang apor ako-ong arleng nengronge, 15piyok pu tene Hemphu angot anang aghai chiplange aro anang hor lale rihanthu alang junjeye, aro anang ai apok para Jiuli-Kangthir pensi plenge. 16Anang Israel aso hel ako-ong anali Hemphu Arnam ayok neng pharlepme. 17Anang Hemphu yok trepne kido aphan, lasi asomar ayok apohel aneng, aro dhorom kangthir agiyan longyok kimengme abangyok, anang Elija po ajiuli aro ajakong pen Hemphu ango-ango dame.” 18Jakhariya po Arnam tharlonpo yok pulo, “Ne ke ihut akisar arleng aro nepiso pe ta saro, ne pot badi labang than une?” 19Aro Arnam tharlon anangyok pulo, “Arnam ango arjapsi kidoman Gabriyel po lake ne lo; aro nang pen lam kachithan yok aro labang kime-alamthe nang kithanyok neyok wang tolo. 20Manta minon, nang nelamthe kikrolkre apot, nang arni chokche lengke, konam adin bangpomar choknge, la arniyok nang debal chiplangsi lam than un-eh ye.” 21La amun arleng hel Jakhariya po ayok inghong dingsi kido, aro anang Arnam ahem long kapabhem apot anali asombhik hlongo. 22Konam anang mokol wang olelo, anang anali yok lam than un-eh yongo, aro lasi anang Arnam ahem long penebak kachiklang pusi anali chirono. Anang analiyok ajat-jat ari atewa pilo; aro kalarsi do jongo. 23Konam anang katiki asal apor chok tango, anang ahemyok damo. 24Labang arni aphel anang piso Elijabet pe agat dolo; aro anang chiklo jon-phongo chibuti sitsi dolo. Anang pulo, 25“Konam anang neyok nejinso lo labang ke Hemphu katiki asal aro ne arleng aphan nekapatharak kachihi para, labadisi kangho hel kolo.”

Jisu Kiplang Alam Kithan

26Chiklo jon-thorok apor, Galili alongri Najaret rongpe yok, Gabriyel tharlon yok Arnam para wang kitol, 27ihut so-arloso pen arik-kichowen Dabhit po agijing Josep amen ihut arleng kido, aro so arloso amen ke Mary pe kido. 28Aro tharlon, anangdung wangsi pulo, “Ei Arnam kajinso kihlong so arloso pe, Hemphu nangpen bor-eh pado nang.” 29Manta anang lamthe arjusi chiron hapmo, anang nenglong chirondingo, labangpo ke pot badi bor-eh kichok alam. 30Arnam tharlonpo anangyok pulo, “Mary pe, phere yek; piyok pu tene nang Arnam para jinso hlongo. 31Aro minon, nang agat dosi, So penso ihut plange, aro anang amen Jisu binot. 32Anang kithepo chiplange, aro Aghaichot Arnam Aso pusi chitha-ange, aro Hemphu Arnam anang sar-lar Dabhit po anghol anangyok piye. 33Anangsi Jakup po agijing aphuthak anang mophelyok pangdom pone, anang longri ke jat or-eh ye.” 34Mary pe Arnam tharlon ayok pulo, “Neke nepihan ingjong, la-apot labang alam pot badi chiplange?” 35Arnam tharlon anangyok pulo, “Jiuli-Kangthir nang phuthak wange, aro Aghaichot Arnam ajakong nang phuthak tibene; lasi kiplange Oso so ke Kangthir Arnam Aso pusi chitha-ange. 36Aro minon, nang bai Elijabet pe akisar amun yongta ihut sopenso agat do, inghoyok baji kipu, anang agat kido chiklo jon-thorok chokngo. 37Piyok pu tene Arnam long ki-un eh ingjong.” 38Laparake Mary pe pulo, “Ne holek do, Hemphu amurkiya pelo, nang kipu alamthe badine pachok nang.” Laparake Arnam tharlon anang para chikakngo.

Marype Elijabet peyok Kilangdam

39Labang arni adak Mary pe damo aro parjangsi Judiya rongpe inglong alongri yok damsi, 40anang Jakhariya po ahemyok damsi Elijabet pe yok Mary pe nengsam kardom pajiro. 41Mary pe konam kardom kapajir Elijabet pe arju penpano, anang agat kido oso so klemo; aro Elijabet pe Jiuli-Kangthir plengsi, 42aro anang hang-wongsi pulo, “Arloso hel asitem bor-eh kichokpe; aro nang agat kido oso sota bor-eh pachok nang. 43Aro Hemphu anang aipe nekapochak yok wango, nekorom kime daklong para chokngo? 44Piyok pu tene jongsi ne nengsam kapajir arju hlongo, ne agat kido oso so aneng arongsi klemo. 45Aro Hemphu para nangyok jibak kithan, labang ahuwit chokpene pusi kikrolpe, nang krolsi bor-eh kichokpe lo.”

Mary pe Kaparklam Alun

46Mary pe pulo, “Ne jiu long Hemphu yok parklam do, 47Ne Ral Hemphu Arnam long neneng arong do, 48piyok pu tene anang bithang murkiyape chakchepho apunyok lango, lasi minon para awe-awe yokta bor-eh kichokpe pusi nitarane; 49piyok pu tene anang inghosi jakong akithe asal nephan tikilo, anang menke kangthir. 50Anang yok kaphere owe para owe yok kajinso doman. 51Anang awengkong kangtang pensi kihal jakong tikilo; anang ingho angthin kachiron long aborai do, analiyok anang pachidat detno. 52Anang ajakong kido abangyok recho anghol para pasunsi, kibek het abang yok pangthuro. 53Anang kangchirpo yok akime abihini pen padoro aro kidolepo yok anang pangwe detsi tolo. 54Anang neng kajinso kachipurki pen anang murkiya Israyel abangyok anang rapmo, 55ili pa Abraham po yok aro anang so-su hel yokta mophel yok anang seme-kitang badi!” 56Aro Mary pe, Elijabet pe pen chiklo jon-thom dosi anang hemyok chirulo.

Johon Baptist po Kiplang Alam

57Minonke Elijabet pe oso kihlong apor chokngo, aro anang so penso ihut paplango. 58Anang adung arel aro hemphlak hemcher abang helta Hemphu anangyok kajinso chot kapaklang arjusi anali anang pen nengrongo. 59Ni-narkep arni oso-so sunnot (a-ok kangtep) kanghol yok anali wano, aro anang pa Jakhariya po badi amen kibiye lo. 60Manta anang aipe pulo, “Kalek, anang men ke Johon si biye.” 61Anali anangyok, “Nali hembang long ihut ta ladi amen ingjong.” 62Aro anali anangpa yok atewa pisi arjulo, “Nang pot amen kibiyok aneng doman?” 63Lasi Jakhariya po kiwi silot ipak hango aro wilo, “Anang menke Johon.” Aro anali ahuwit ta asombhik hlongo. 64La jongsi Jakhariya po angho ingkosi lam than uno aro anang Arnam yok parklamo. 65Lasi anali dung arel abang pherelo aro lamehel alam Judiya inglong alongri dungsi chitha-ang detno. 66“Labang oso so potsi chiplange” pusi, abithang anenglong chipherelo, piyok pu tene Hemphu ari anang pen kido.

Jakhariya po Katurki Alam

67Laparake anang apa Jakhariya po Jiuli-Kangthir plengsi kido, aro turki ponsi thano: 68“Hemphu Arnam bor-eh kido Israyel abang Hemphu Arnam bor-eh pado nang, piyok pu tene anang wango, aro anang arleng helyok pajokngo. 69Anang murkiya Dabhit po ahem para kipajok apharan aphan wango, 70anang atono kangthir turki hel parasi anang angho pen kithan, 71ili hutur hel para aro ili kisim abang arideng para pajoknge, 72ili pa helyok kajinsone kaching-ak kapachok aro anang kangthir kachingnak hel kachipurki yok, 73dak bangposi ili sar-lar Abraham po yok anang seme-kitang, 74lake ili yok pachokngo, ili hutur hel arideng para pajokngo, lake phereresi kachirdom yok, 75kangthir aro dhorom si arnita anang ngo do nange.

76“Aro nang, ososo Akithechot Arnam turki po pusi puye, piyok pu tene Hemphu damsi anang duwar hel honjok dame, 77anang arleng helyok anali pap hel para kijok agiyan kipi yok, 78ili Arnam nengdok kajinso para ili thak ethakpe para chiklano, 79kangting aro kithi aben long kido abang yok katha-ang kipiyok, aro ili kengkam nengsam aduwar yok ili kipon yok.” 80Oso so the-dingsi, aro jiuli pen apharan dolo, aro anang Israyel ajat ango kachiklang adinyok ingnam aju longsi kido.

Currently Selected:

LUK 1: AMRI-BSI

Highlight

Copy