JOHON 8

1La-amun Jisu Olip anglong kartulpe yok damo. 2Adap prang anang Arnam ahem yok wang phakngo. Ahuwit arleng anang dung wango, aro anang iningo aro analiyok kapaklang cheng pono. 3Kanong paklang hel aro Pharisi hel kangho kidoner arloso ihutyok wano; aro ahuwit ango asitem parjapsi, 4anali Jisu yok pulo, “Paklang po, labang arloso peyok kangho kidoner amunsi nepmo. 5Minonke labadi arloso pe yok ke arlong warsi kamari ayok Mosi po kanong long hali than do. Minon nangke anangyok pot puye?” 6Anangyok ado kapangthek ayok chironsi anangyok honjat kilang alam pulo. Jisu ingkuksi ari munso pen lungle athak wilo. 7Konam anali anangyok lam arju jongne kido amun, anang anali yok langsi pulo, “Nalidak inghosi pap tiki ke yong, labang si ango bangpe yok arlong pawar nang.” 8La-aphel anang ingkuk phaksi, lungle athak ari munso pen wilo. 9Konam anali labang kipu arjulo, akisar hel ango chengsi anali ihut para ihutsi damphrot no; aro lalong Jisu pen asitem anang ngo arjapsi kido arloso pe detsi dolo. 10Jisu anangyok lango aro pulo, “O arloso pe, anali dak longte damo? Nangyok inghone bak ado kipi abang kido ma?” 11Arloso pe pulo, “O Hemphu, ihut ta ado pipe yongo.” Aro Jisu pulo, “Ne ta nangyok ado pipe. Kidame along damot, minon para ke aro pap tiki phakngenot.”#8:11: Ango kicheng kapharlep alohel longke labang alappo ingjong (lake 8:1-11).

Jisu si Pirthe pe Akatha-ang

12Jisu analiyok pu phakngo, “Hanesi pirthe pe long katha-ang. Inghosi nephel wangdune anang ke kangting long kengkam chijorje manta katha-ang jiuli hlonge.” 13Laparake Pharisi hel anangyok pulo, “Nang bithang aphansi hakhi chipido; nang hakhi kachipi ke khanang kalek.” 14Jisu analiyok pulo, “Ne bithang aphan ne hakhi chipido, yongta nehakhi poke khanang; piyok pu tene ne daklong para wango, aro daklong ayok dam, bangpo ne thek, manta ne daklong para wangdo lale ne daklong yok dame, bangpo nali thekthe. 15Nalike munusi a-ok patengsi bisar otedo, ne ke ihut yokta bisar-otete. 16Ne bisar-ote yongta, ne bisar ke khanang; piyok pu tene ne hudet ke bisar-otete, manta ne aro neyok wang kitol Apa do. 17Bang hini arleng hakhi kipi ke khanang pusi nali kanong long kiwi alamthe do. 18Ne bithangyok ne hakhi pido, aro neyok wang kitol neApa ta nephan hakhi pido.” 19Laparake anali Jisu yok pulo, “Nang Apa poke daklongte do?” Jisu pulo, “Nali neyok chinine, ne Apa yokta chinine; neyok kachini tene, ne Apa yok ta chinilo hoi.” 20Anang Arnam ahem long kapaklang amun, puru ahemlong lamehel alam thano, manta anangyok ihut ta nep un-eh yongot, piyok pu tene anang aporpo chokche lang.

Hane Daklong Dame Nali Dam Un-eh

21Anang analiyok pu phakngo, “Ne dam hrole, aro la-amun nali neyok bisare, manta nali bithang nali pap anatsi thiye. Ne daklong dam, lalong nali dam un-eh ye.” 22La-amun Jihudi hel pulo, “Anang pudo, ‘Ne kidam long, nali dam un-eh,’” kipuke anang abithang thibo ma? 23Anang analiyok pulo, “Nali ke pirthepe parasi wangdo, ne ke ethakpe para wangdo, nalike labang pirthepe arleng, ne ke pirthepe para kalek. 24Ne nali thado, nalike nali bithang apap anatsi thiye, piyok pu tene ‘hanesi anango’, kipu alampo nali krolkre lengke, nali bithang apap anatsi thiye.” 25Anali anangyok pulo, “Nangke ingho te?” Jisu analiyok pulo, “Kicheng cheng para nali than dakde yong? 26Ne nali lam kipuyok aro bisar-kahonthe yokta ako-ong alamthe do; manta neyok wang kitolpo anangsi khanang, aro ne anang para karju hlong alam pirthepe yok pachitha-angdo.” 27Apa alam analiyok kithan pomar, anali abhu hlonghle yongot. 28Lasi Jisu pulo, “Konam nali Arleng Aso yok angsong tare, la amunsi ‘hane si anango’ kipu alampo aro ne bithang apharan penke jatsi tiki un-eh, manta ne Apa nekithan badisi lamehel alam thando, labang nali abhu hlonge. 29Aro neyok wang kitol ihutpo ne pensi do; anang neyok nehudet ke tikangke, piyok pu tene arni kiwang anang aneng pangsam ateng tikido. 30Anang ladi kipu apotsi, arleng amokha anangyok krolo.

Kijok Adun Aro Aturu Arleng Alam

31Lalong Jihudi arleng hel inghosi anangyok krolo, Jisu lahelyok pulo, “Ne lamthe long nali krol longdo, pu tene nali khanangsi ne adun hel; 32aro nali khanangpo theknge, aro labang khanangpo si naliyok pajoknge.” 33Anali anangyok pulo, “Hali ke Abraham po agijing, aro jatsi kaita aturu tikike yong. ‘Nali joktange’, pusi ladi alam pot badi pudo?” 34Jisu analiyok pulo, “Ne naliyok khanangsi thando, abangten pap katiki abangke pap aturu chiplangdo. 35Aturu ke mo-mo ayok hem along dolen le, manta Aso ke mo-mo ayok do len. 36Lasi Aso ke naliyok pajokdo, tene nali khanangsi joktang hlonge. 37Nali ke Abraham po agijing, labang ne thekdo; manta nali ne kamariyok awak bisardo, piyok pu tene nelamthe nali nenglong athem hlonghle. 38Ne Apa pen jipe thek hlongo, labang si thando, nalita apa hel para potsi arjulo, labang si tiki do.

Jisu Pen Abraham

39Anali anangyok pulo, “Abraham po hali apa.” Jisu analiyok pu phakngo, “Nali Abraham po asomar tene, Abraham po katiki badisi nali tikilo hoi, 40manta ihut arleng Arnam para khanang alam arjusi naliyok kithan arlengpo ne lo, minonke neyok kamari yok awak langsi do. Abraham po ke ladi tikike yongo. 41Nalike abithang apa asal tiki do.” Anali anang yok, “Hali mahang katharak aso kalek; hali ihut apa do, anang ke Arnam.” 42Jisu anali yok pulo, “Arnam nali Apa la, tene nali neyok nengdokngo hoi; piyok pu tene ne Arnam para wango; piyok pu tene ne nebithang ke wangwe yong, anangsi neyok wang tolo. 43Nali ne kipu alam piyok abhu hlonghle? Lake piyok pu tene nelam chideng un-eh. 44Nalike nali pa si-ik parasi nali wango, aro nali bangpo apa kiron ateng pachokyok si aneng doman. Anang ihut kicheng para arleng kamari, aro anang khanangpo long dode, piyok pu tene lalongke khanangpo ingjong. Anang konam asisik puman, la-amun anang bithang kido asoi para thanman, piyok pu tene anang pa asisik puman, aro anang asisikpo anang pa. 45Manta ne ke khanang alam thando, apotsi nali neyok krolkre. 46Nali sitem ingho neyok papi arleng pusi porman paklang un-eh ma? Aro ne ke khanang alam thando, tene piyokte neyok krolkre? 47Inghosi Arnam para wangdo, anangke Arnam alam oneman. Nali Arnam arleng kalek lasi onene. 48Jihudi hel anangyok pulo, “Nangke Samaria, aro nang longke si-ik aghai do, hali nangyok me-atsi nang pupe yong ma?” 49Jisu pulo, “Ne longke si-ik aghai ingjong, manta ne ke ne Apa yok aman piman, aro nali ke neyok aman pipe. 50Manta nebithang ajortang bisarse; lalong jortang kabisar aro bisar-kahonthe man ihutpo do. 51Khanangsi ne nali thando, inghone bak nelamthe hel mainotdo, tene anang jat kithi thek hlonghle ye.” 52Lalong Jihudi hel anang yok pulo, “Nang ke si-ik aghaido, bangpo minon nangthan uno. Abraham po aro turki hel thisi damo; manta nang ke pudo, ‘ingho ne lam mainot do, anangke jat kithi thek hlongle ye.’ 53Hali sar-lar Abraham po thisi damo, anang yokta nang thechot ma? Aro turki helta thilo; nang bithangyok inghote pusi nang chironman? 54Jisu pulo, “Ne bithangyok jortang chipado man; tene ne labang jortang jatsi ingjong; manta inghoyok nali Arnam pusi pudo, labang ne Apa posi neyok jortang pido. 55Nali anangyok chinine; neke anangyok chinido; ne anangyok chinine pu tene nali badi kachobelpo chiplange. Manta ne anangyok chinido aro anang lamthe ne mainot do. 56Nali sar-lar Abraham po ne kiwang apor thek hlonge pusi aneng arong kido, aro labang chitheksi aneng arongo. 57Laparake Jihudi hel anangyok pulo, “Nang nengkan kep phongo ta chokche lang; nang Abraham po yok thekngo ma?” 58Jisu analiyok pulo, “Khanangsi ne nali thando, Abraham po kiplang ango para ne do.” 59Lasi anali anangyok kiwar yok arlong eno. Manta Jisu abithang chibutisi Arnam ahempo para damo.

Currently Selected:

JOHON 8: AMRI-BSI

Highlight

Copy