ADUNHEL 13

Barnabas po Pen Sol poyok Arwalne Kitol

1La parake Barnabas po aro Simiyon anangyok Nigro, aki-ikpo puta puman, aro Sairen arong arleng Lusiyas, aro Herod recho pen kachi-al Mannayen po, pen Sol po, anali ke turki hel aro kapaklang hel Antiyok long kido kachikruk long kido. 2Labang adak anali Hemphu yok chirdomsi an-kihum, labang amunsi Jiuli-Kangthir para analiyok pulo, “Ne pot si asal katiki yok Barnabas po pen Sol poyok taramo, la-asal aphan analiyok nemen aphan paprek ngot.” 3Laparake anali an-kihum aro pingkitsi, anali bang-hini aphuthak ari batsi analiyok tolo.

Saipraslong Arnam Alam Kapahar

4Labadi si Jiuli-Kangthir para anali tol tangsi, anali Selekiya yok damo aro lalong para anali tilong pen Saipras yok damo. 5Aro Salami rongpe hlengsi, Jihudi hel kachirdom ahem long Arnam Alamthe paharo; Johon po ta analipen sal kirap badi kido. 6Ladisi anali Papho rongpe long labang langlompe long artingsi, lalong Bar-Jisu pusi Jihudi arleng asi-ik aro asisik katurki kipaklang arleng ihut yok anali phochak ngo. 7Akireset Sarjiyas Paulas amen labang langlompe gobornorpo pen alok kido; labang gobornorpo Barnabas po pen Sol poyok taramsi, anang Arnam alam karjuyok ar-ih lo. 8Manta Elimas, (lake Grik amen) kipu bhiliki kapaklangpo gobornor po ayok pakrol hlonghle yok neng parting pon aphan ajat-jat badi analiyok teng duno. 9La-amun Sol po, kachini amen Pol pota puman, anang Jiuli-Kangthir plengsi, bhiliki kapaklang arlengpo yok lang-etsi pulo, 10“Ei, kangho anang aro kangho asal katiki chot, si-ik asopo, aro ahuwit kadhorom ahutur, nang Hemphu khanang aduwar kapangho yok tikangke lang ma? 11Aro minon langot! Hemphu ari nang theksi do; aro nang angkhan adinyok arni thek thesi, nangmek chotoksi dohlonge.” La-amunsi photsi anang mek thek phri-phri detno, aro kangting ben thipmo; aro anang ari otsi kipon ayok, anang arleng bisar-woro. 12Ladi kachiplang thek hlongsi, gobornor po Hemphu kapaklang alamthe long asombhik hlongsi krol peno.

Pol po Pen Barnabas po Pisidiya Antiyokyok Kidam

13La-aphel Pol po aro alokjor pen Papho rongpe para langpe jon-jon tilong pen damsi Pamphiliya alongri Parga arongpeyok damo; manta Johon po analiyok tikangsi Jerusalem yok dam phakngo. 14La-aphel anali Parga alongri para damsi Pisidiya alongri Antiyok rongpe hlengsi, kisang-arni anali kachirdom ahemyok lutdamsi iningo. 15Lalong Mosi po kanong aro turki hel kiwi alamthe taram tangsi, kachirdom ahem phu-phang thawang hel anali dung thansi parju tolo, “Ei korte hel, arleng helyok nali penebak neng kirung alamdo, pu tene labangpo hali thanot.” 16La-amun Pol po arjapsi, ari atewa pen lam kangje yok cheng pono; “Ei Israyel arleng hel, aro O Arnam yok kaphere abang, onenot, 17labang Israyel arleng hel Arnam ili sar-lar helyok arwalo; aro Ijip alongri anali kido adak arleng helyok akithe ajat otesi, Arnam apharan akithe pen analiyok Ijip para olesi wano; 18aro kep phili anengkan anang analiyok ingnam aju asitem analiyok Apa badi ral duno. 19Lalong para anang Kanan alongri ajat thorok-isi paremsi, anali alongripo kangning pon ayok analiyok pilo. 20La-aphel kachiplang nengkan phoro philine nengkan kep phongo bak anengkan dam tango. La aphel ke, Samuyel turki po aporyok bisar phu-phang hel ayok arwalo. 21Aro anali recho ihut kachihangsi; Arnam Benjamin ajat para Kiss po aso Sol poyok arwalsi, nengkan kep phili ayok recho pang ningo. 22Lapara ke anangyok patikangsi, anali recho kachiplang ayok Dabhit po yok paplango. Aro anang lam hakhi pisi pulo: ‘Ne neng ateng ihutyok, lake Jesipo aso Dabhit po yok hlongo; anang ne ahuwit kiron ateng pachoknge.’ 23Labang Dabhit po agijing para Arnam anang seme-kitang ateng ihut Ral Hemphu, lake Jisu yok, Israyel arleng hel ango wang parjap mo. 24Jisu kiwange ango, Johon po, ahuwit Israyel arleng ango pap anang chipharlepsi baptist kachiplang alamthe paharo. 25Aro Johon po Arnam asal katiki ki-orbo amun, anang arleng helyok pulo, ‘Nali, neyok inghopo pusi chiron do? Neke anang ihutpo kalek; manta langot! Ingho akeng-op arik so kiphlok yok ta ne michangche, anang ihutpo ne phel wangsi do.’ 26“Ei kortehel, O Abraham po agijing aso hel, aro nali sitem Arnam kaphere abang, ili yok labang kijok alamthe wangtol do. 27Piyokte pu tene Jerusalem kido arlenghel aro anali kapangdom abang anangyok Ral Hemphu puke chininesi, aro kisang-arni tenta kataram turki hel alamthe abhu hlonghlesi, Jisu yok adai kolsi, turkihel alam pachok ngo. 28Aro kamariyok isi ado hlonghle yongta, anangyok kamariyok Pilat poyok chihango. 29Aro anang phan jibak alam lo-kangthir long kiwi do-ero, labang pachoksi, anangyok kros para pasunsi ahilik long bilo. 30Manta Arnam anangyok kithi hel asitem para paburo. 31Aro anang Galili para Jerusalem yok anangpen wang kidun abang ango jokha arniyok chiklango; analisi minon arleng hel ango anang hakhi badi do. 32Aro ili sar-larhel angot seme-kitang alamthe, 33hali nali sitem labang kime-alamthe nali parjudo, te Arnam Jisu yok pabursi, labang seme-kitangpo ili so-suhel aphan pachok plengo. Labang alam lun-parklam longta ladi kiwi do: ‘Nang neso, mini ne nangyok paplango.’ 34Arnam anangyok kithi para paburo, monphel kanghonhe ayok paburo; labang alam anang kithan, ‘Dabhit poyok kapang-ak potsi abor-eh, labang ahuwit ne naliyok piye.’ 35Lasi kamprek lun-parklam alongta anang pudo, ‘Nang kangthirpo yok panghon tolek.’ 36Piyok pu tene Dabhit po Arnam alamthe badi anang adin arleng hel kime asal tikisi momo yok thisi damo; aro anang sar-larhel pensi kipep ahilik arlosi thulo. 37Manta ingho yoksi Arnam paburo, bang ihut ke ladike inghohe yongot. 38Lasi, O korte hel, labang ihutpo parasi pap-kiron alam nali ngot paharsi wangdo; 39aro potsi ado kido ta Mosi po kanong pen joktang un-eh yong, labang ahuwit ado hel, kikrol ahuwit ta anangpen chipajok-unman. Labangpo nali than un pene. 40La-apot chilang chidat salne donot; turkihel alo long kiwi alam nali phuthak wange: 41‘O nali kangho kithan abang, nali langot, asombhik hlongot, aro neng hel chipang thir; piyok pu tene jipe katiki atomopo, inghone bak nalithan yongta, nali krolkre ye, ladi asal ne nali kido adinsi tiki ye.” 42Lapara ke labang alam, kiwang kisang-arni ta pahar tol yok, anali olesi kidame amunsi, arleng hel wang chingduk ngo. 43Aro rongbong kachikak amun, ako-ong Jihudi aro Jihudi adhorom kimeng abang, Pol po aro Barnabas po aphel duno; lalong anali pen chithansi, Arnam kajinso long krolsi kido yok nengrungo. 44La-aphel kisang-arni rongpe long ahuwit arleng Arnam alam ka-one yok chingrumo. 45Manta Jihudi hel ratyok theksi, neng long amek kachiso wangsi patharaksi, Pol po kithan alamthe yok hoi chodunde yongot. 46La-amun Pol po pen Barnabas po chipangtang dutsi pulo, “Ango ke nali ngo Arnam alamthe kapahar nange kido; manta nali bangpo sedetsi nali bithangyok or-eh len ajiuli kamichangche paklango apot, langot, hali nali tikangsi Bang-ajat yok dame. 47Piyok pu tene Hemphu labadi thano, ‘Pirthimipe aholyok nang kapajok ponyok, nangyok ne Bang-ajat hel aphan katha-ang honjoksi bilo.” 48Aro Bang-ajat hel bangpo arjusi anali neng arongsi, Arnam alamthe yok jortang pilo; aro konbak arleng ki-or eh ajiuli kapahlong aphan karwal, latengsi krolo. 49Aro ahuwit Hemphu alamthe labang arat ajal dungsi chisang detno. 50Manta Jihudi helke, aman kido arloso helyok aro rongpe kilang phu-phang arleng helyok pachonsi, Pol po pen Barnabas poyok honjat papisi, anali rongpe ahol para pa-ujharo. 51Lalong adun hel anali kengtak anghan Jihudi hel kilang un-eh anat chihijirsi, Aikoniyam rongpe ayok damo. 52Aro adun hel anang arong pen Jiuli-Kangthir plengo.

Currently Selected:

ADUNHEL 13: AMRI-BSI

Highlight

Copy