MARK 3

Akutthi Pasal Khat

(Mat. 12:9-14; Luk. 6:6-11)

1Hava suale Jisun kan chun na inna acheretjui, hava mun na a kut her khat a thi mi an khat alui om. 2Hale mi aher khat in Jisu ha man siat thei na rang sernikhuo han amandam rang ha an enna anjuichak. 3Jisun kut aher khat athipa jiang han, “Hin hongro,” a ti. 4Hale Jisun anmani jiang ading kel, “Sernikhuo chuan sat tho le chuansatlui tho, animakle kansanringle, thatranghi holam mo dan na adik?” a ti pe. Tak-ha anmanin i om rimau. 5Jisun lung thak puma a en chiak, an lung ngarle andik mak naha a ning adong puia, “Hale mipa jiang han na kut jikro”, atia. Hale a man a kut a jiak, a kut ha a dam jui.

6Hava pha han Pharisingai an chea Herod mingai le ija mo ama hi kan that rang tia a rak tak a an kanbiakjui.

Tui ong Sira Mitam

7Jisun a thiamruoingai le tuionglian khamtiang an che, hale Galili le, Judia ram ma, 8Jerusalem, Idumia ram va ralla Jordan sirra, Taiar le Sidon ram tenna puma a nuk an hong jui, ajarko Jisu chuan tho rakip an jet pha, mipuingai an hong ani. 9Mipui ha antamrei jarra Jisu annengtuar rang a pua a thiamruoingai jiang rokuang an khat siakna ranga chong a bejui. 10Jisun mitamtak alui mandam jarra a nat mingai han ama ansit chiak na ranga ama an hong naidet an hong kannengjui. 11Hale thavang satlui a choi mingai han ama an mu pha, a mai kung a an kan lum, “Nang Pathian Nai na ni,” tia ankhekjui.

12Jisun a maha tu mo ani tihi mingai jiang rimaru tia chongngar tak alui pek.

Jisun Thiamruoi Somlei anni Athang

(Mat. 19:14; Luk. 6:12-16)

13Hava suale Jisun amidei rakipngai ha akuia, anmanin ama jiang an honga, tangbunga a che jui, 14hale ama ning thiamruoi somleini alui thangjui, a man thiamruoi tia alui kui. “Kein nang ni le chuan tho rang kan ni,” alui ti. “Kein nang ni ha Pathian chong sem kanatir rang ke, 15hale ranak nei tak khonamngai notchai nangtor rang ke.”

16Somleiningai ha ko: A man Pitar, tia a ming a phu-a Simon; 17hale Jebedi a naingai Jems le Johon anmani hi rori naingai tia an ming “Boanerjes”, tia aphua jui; 18hale Andrew, Philip, Bartholomew, Mathiu, Thomas, 19hale Alphaios nai Jems, Thadaios, hale Simon Aramlungsiatpa, hale a pek rangpa Iskariot Judas hiva ngai hi anni.

Jisu le Belsabul

(Mat. 12:22-32; Luk. 11:14-23; 12:10)

20Hava suale Jisun inna a che jui. Hava suale mi pui an honga ankanchunret Jisu le a thiamruoingai ha bu ten nom nektor lai ma u. 21An inkuongain achonghi an jet pha, “Avet jui ke” tia, hong tuong ranga antierjui.

22Hale Jerusalem ma an phut Dan oja her khat a hong ngain anti, “Asunga Belsabul i om ke, hava khonamngai reng ranak han sova khonamngai inotchaike anti.”

23Hiva jarra Jisun anmani ha a kui a tetan na a ri, “Seitan nin Seitan ha ija mo inotchei tor rang?” 24Rengram an khat ha a bing a akankhui senna aruprup an kan enda a chang inko hava rengram ha ngir tor noning. 25Hale insung an khat ha abibinga a kan khuisen na an kan sual inko, hava in ha ngir tor lai noning, 26hiva jarra Seitan rengram ngai han ankankhui senna rup dadanga an kan enda aninko, an kan khuisen jui, ngir tor lai noni u.

27“Aranakrat mi an khat ha a masat tak anchura an khit mak inko, tu ten nom a nei ha sutranga a inn sunga luttorma-u tak-ha an khit suale jak ansuttor rang ani.”

28“Adik tak ka na ripe ani, miringnai ngain siat nale a sa mak an ri rakip ngaidam om nati. 29Tak-ha Thavang Thiang a enda arisiat mi ha tu a chang in nom ngaidamhi mu lai noni u, ajarko a man kum sot siatna athojuike.” 30ajarko anmanin an lui ti, “A ma sunga thavang a satlui a om anti.”

Jisu a nu le A naipangai

(Mat. 12:46-50; Luk. 8:19-21)

31Hava suale a nu le anaipangngai an hong lut tuola an ngirra, kuiranga mi anluitir jui. 32Mitamtak Jisu sirtiang an lui onga, hale anmanin ama jiang, “Enro, na nu le na u na nai ngain an na tok a an om anti.”

33Jisun alui sang, “Tu mo ka nu tu ngaimo ka u ka naingai?” 34Hale Jisun asirtiang an ong ngaiha a en chiak, “Enro, hina a omngaihi kan u le ka u ka nai ngaike a tipe! 35Tu-ang Pathian lungdo a tho miha ka u ka nai an khat om kanu kapa anni.”

Currently Selected:

MARK 3: AIMOLBSI

Highlight

Copy