MATHIU 9
9
Akethisa Khat Jisun A mandamna
(Mrk. 2:1-12; Luk. 5:17-26)
1Jisun rokuang khat a chuanga akanna ama akhua han a hong kir jui. 2han enru, mingain a pang her khat athia a nat mi khat ha a jalna le ama jiang an hong tuang, hale Jisun anmani takngai na ha a mu a, a pang her khat thi jiang a ti, “Ka naijo, na lung manngamro; na siatna lim ha ka na ngaidam jui.”
3Hava lai tak han dan oja aviar in anmani masia an hong kan ti; “Hiva mi hi ning Pathian a nuisojui.”
4Tak-ha Jisun anmani an ngaidon ha a jet a hong ti; “Iruija mo nan lung sunga asat mak nan ngaidon?” 5Ajarko, na siatna rakip ka na ngaidam jui, animakle thui innang lonro tihi, holam mo abeidet? 6Tak-ha nang nin, Mi Pasalnai ha ramuol la siatna hi ngaidam na ranak a nei tihi nan jet na rang, hava han a man a pang her khat thi jiang, “Thuiro, na jalna lui nang, na inna chetaro a ti.”
7Hale a man a thuia, a inna a che jui. 8Hava hanna mitamin an mu pha, an ngak ban, hale miring jiang hi ang rarak a pek; Pathian ha an manpak jui.
Jisun Mathiu A kui na
(Mrk. 2:13-17; Luk. 5:27-32)
9Hava suale Jisun hava mun tenna a che pha, Mathiu anti pasal khat khasana pek na mun na alui ong a mu a; a man ama jiang a ti, “Kei na juiro,” hale a man a thuia ama a nuk alui jui.
10Hale hingahin alui ni, Jisun inn sunga a onga; enru, khasana chomngai, siat nei ngai, hale a thiamruoingai le an lui ongsuam. 11Hale pharisingain hava an mu han, anmanin a thiamruoingai jiang anti; “Iruija mo nan oja ning khasana chomngai le siat nei ngai le a chak a nek suam?”
12Tak-ha Jisun hava a jet, a man anmani jiang a ti, “A damngai rang ko thiampu nem na om ma tak-ha anatngai rang ko thiampu nemna a om.” 13Tak-ha che u nang hivahi itenna mo vakan chubakru; “Kein manritthei ha ka dei, hale phurkat ha dei making,” ajarko midikngai kuirang ka hong nimak tak-ha siatneingai lung thul na ranga ka hong ani.
Bungei Ruia Dingkelna
(Mrk. 2:18-22; Luk. 5:33-39)
14Hava suale Johon a thiamruoingain ama jiang an honga anti keini le pharisingainko bu kanngei chak; tak-ha na thiamruoingaiko bungei ma u.
15Hale Jisun anmani jiang a hong ti; “Muipa ning a shapngai le an om kar je; anmanin chajang siarna mo an nei? Tak-ha hi ang nikhuo la hong nati, anmani kar tenna muipa ha latuang nanti; hava suale anmanin bungei nanti.”
16“Tu innom puan lui chunga puan thar suidengai ma u, ajarko, an suide puan her ha ning a kei therdea; a khel la chet denati, 17mingain darkha tuithar ha savunlui puankok thun ma u, savun ha achet darkha tui abuak, hale savun puan kok ha a mang, tak-ha darkha tui thar ha savun puankok tharra an thun hale an ninia an manruitor.”
Chuan Lam kai Ulian Naitenu Le Jisu Puansit Numei
(Mrk. 5:21-43; Luk. 8:40-56)
18A man hiva rakip hi anmani jiang a tilai han enru, vai hom ulian khat ning a honga ama ha chubei a buk a, “Atuntak han ka nai, numeinai ha a thi jui, tak-ha hong innang a chunga na kut na siak pero, hale ama ringkhir nati,” a hong ti.
19Hava han Jisun a thuia a manuk a hong jui, hale ama a thiamruoingai innom an lui jui.
20Hale jet lui thai luia kumsomleini thi a charra a nat numei an khat in a nuk tiang a honga; ama a puan mor ha a vasit. 21Ajarko a thei jak alui kan ti. “Kein ama puan si ka sit jak, ka sit inko, ka dam rang ke.”
22Tak-ha Jisun a kan hei a, numeinu ha a luimu a a ti; aleijo naning mansat taro na takngai na han na dam jui, hava pha tak han numeinu ha a dam jui.
23Hale Jisun vai hom ulian inna a hong pha, theili tumngai le mi rasa tam ha a mu a, 24anmani jiang alui ti; kanthitru, ajarko naitenu hi thimak; a jalke anmanin Puma ha ma ha esella an lui nuiso. 25Tak-ha mitamngai ha an man suak verra; Puma ha inn sunga a lut naitenu a kut a o han naitenu ha a ringkhir jui 26Hale hiva chuan tho ruihi ram rakip a tung jui.
Pasal Mitdel Anni Jisun A mandam
27Hava mun ha Jisun a mak a che pha han, mitdel pasal annin an juija, an khek a “David a pasalnai, keini na lungsiatro,” an hong ti.
28Hale Jisun inkhat a lut pha han, mitdel pasalngai om ama jiang an lui honga, han Jisun anmani jiang a ti, “Nang nin hivahi kein ka tho tor tihi tak mo nanngai?” Anmanin ama jiang anti, Puma tak kan ngai.
29Hava han, Jisun an mit a sitpea a ti; “Nan takngai na nuk jui a nan chunga damna ni rase.” 30Han an mit ha a var jui, hale Jisun anmani ha chongngar tak a chong abea, “Mi khat jak om manjet maru,” a ti.
31Tak-ha anmanin hava mun tenna an chea, ama ruia ram rakip hin chong an lui semjui.
Jisun Chongsuak Lui Pasal A mandamna
32Anmanin an che lai, enru, seitan in a choi a chongsuaklui pasal khat ama jiang an lui hong tuang. 33Hale seitan ha a notchei pha han, a chongsuaklui ha a hong suak jui; han mitam an ngak chian na “Israel sunga hiva anghi la mu chil masing,” an hong ti.
34Tak-ha pharisingain anti, “A man seitan ranak a seitan hi a notchei an lui ti.”
Miringai Jisun Lungsiat A mu na
35Hale Jisun khuo khat a chea, Sainagok sunga a manchu, “Rengram chongsat ruia, hale ritong le a nat rakipngai ha alui mandam.” 36Tak-ha Jisun mitamngai ha a mu pha, anmani ha lungsiat a mu jui, ajarko, anmani ha a rungrang bui; an kansenkhui, belramngai anga an lui ni. 37han, a man a thiamruoingai jiang a ti, “Chang, at rang a tam, tak-ha a at rang miko an tom.” 38Hiva jarra, “Puma a chang rasik ranga a neipu ama jiang lamru, a man chuan sin ranga na juangtir pe nati.”
Currently Selected:
MATHIU 9: AIMOLBSI
Highlight
Share
Copy
Want to have your highlights saved across all your devices? Sign up or sign in
Aimol (Re-edited) NT - Rabu Athar
Copyright © The Bible Society of India, 2016.
Used by permission. All rights reserved worldwide.
