MATHIU 26

Jisu Churnarang Kansiam

(Mrk. 14:1,2; Luk. 22:1,2; Jhn. 11:45-53)

1Atun hingahin ani jui, Jisun chong rakip hi a ri suale, a man a thiamruoingai jiang a hong ti. 2Nikhua nini suale kan na ut a suak ani, hale Mi Pasalnai ha khros chunga an that rang tihi nang nin nan jet.

3Hava han kajapha anti thiampulian achangkuolla, thiampu rakip danthei oja le ulianruplim kan chun na an nei jui. 4Hale anmanin leishei chonga an kan huong ti tirra, Jisu chura, that na rang chong an kan siamjui, 5tak-ha anmanin anti, mitam karra cherchur atimak na rang, “Kholaikhang ut sunga manni ma rei an lui ti.”

Bethani hin Jisu Sariak Annot

(Mrk. 14:3-9; Jhn. 12:1-8)

6Hale Jisun Bethania Simon pangpharpa inna, a om lai han. 7Numei an khat in a man tam kan not sariak ha, lungngui sunga a hong choi a ama jiang alui hong; hale a man tebolsirra a onglai numeinun ama a lu chunga a hongbun. 8Tak-ha thiamruoingain hava ha an mu karra, an lung a thak an hong ti, “Hivahi iruija mo a manmang?” 9“Ajarko hiva a rim hui sariak hi, a man tam ke lui juarbak a; a riangngai jiang lui pek ajotke.”

10Tak-ha Jisun hava ha a jet, a man anmani jiang a ti; “Numeinu ha iruija mo nang nin nan man pong? Ajarko a man kei jiang asat chuon khat a tho jui. 11Ajarko a riang khodengtheingai ha, nang ni le nan om chak, tak-ha kei ko nang ni le om suam chak making. 12Ajarko a man hiva kan not sariak rimhui, ka tak chunga a hongbun thuan hi, an na phum rang ha a lui tho ani. 13A thianga kein nang ni jiang kari ani, ramuol pumpuia hiva chongsat hi an rina mun rakip; numei hi ning alui tho sa hi, a mangaidon na ranga ri nanti u.”

Juda Ning Jisu Ajuorna

(Mrk. 14:10,11; Luk. 22:3-6)

14Hava suale Juda Iskariot anti, somleini Karra an khat in; thiampulianngai jiang a che jui, 15Hale a hong ti, kein ama ha nang ni jiang ka na pek inko, “Nang nin kei jiang imo nan na pe rang?” Hale anmanin ama jiang ruphai somthum antelpejui. 16Hava pha tenna ama hi pe na ranga, a phat kancha alui tokjui.

Jisun A thiamruoingai le Kan na ut A tho

(Mrk. 14:12-21; Luk. 22:7-13,21-23; Jhn. 13:21-30)

17Atun chol kan chel lui tal kholaikhang na a rapa nikhuo han thiamruoingain Jisu jiang an honga ama jiang anti, kan na kholaikhang na ranga nang rang mandet kein in kan hong var rang hi nang in hon mo na dei?

18Hale a man a ti khopui shunga che u nang tu ang mipa khat jiang hong tiru kan oja ning a ti, “Kei ka phat a hong nai jui ka thiamruoingai le kan ruaia kein kan na kholaikhang hi nang inna nei kanti tia hong riru.”

19Han Jisun anmani jiang a manchu anga, thiamruoingain an honga kan na kholaikhang na rang ha an lui hong varjui.

20Atun nitaktiang a hong nipha a man somleiningai le alui ongchunjui. 21Atun anmanin an chak lai han, a man a hong ti, kein a thianga nang ni jiang kari ani, “Nang ni nan karra an khat in kei na pe rang nan ni.”

22Hale anmanin an lung tam tak aponga, anmani rakip ning ama jiang an hong ti, “Puma kei mo kei mo?”

23Han a man a hong shanga a ti, “Kei le kheng khat kan kut kanpur suam a man kei ha na pek nati. 24Mi pasalnai ha ko alui kan jiak sa nuk jui a thina nei rang ani jui, tak-ha alui juarpa rang ko pong na khat ani jui, ama hi nai alui chang mak lamin ama ranga luisat nati.” 25Han ama pek pu Juda ning a hong shanga a ti, Rabbi, kei mo ka ni? A man ama jiang a ti, “Nang in na kan ti jui.”

Kholai Khang

(Mrk. 14:22-26; Luk. 22:14-20; 1 Ko. 11:23-25)

26Hale anmanin an chak lai han Jisun tal ha alui a phuol a pek, hale ek khuia hale a thiamruoingai jiang a pek a ti, “Luinang charu hivahi kei ka tak shake.”

27Hava suale a man kok lai alui a amanpak hale anmani jiang a pek a ti, “Nang nin nan renga hivahi inru,” 28ajarko “Hivahi chongtanthar ranga mirakip siat thiang na rang alui suak kei ka thisen ani. 29Tak-ha kein nang ni jiang kati ka pa rengram nang ni le kanruoia a tharra kanin suam rang nikhuo ha ani maje kein a tun tenna darkha tui inlainoning.” 30Hale anmanin hla khat an tho a, olib tangbung tenna an shuakjui.

Pitar Ning Ajot Luirang Jisun A ri

(Mrk. 14:27-31; Luk. 22:31-34; Jhn. 13:36-38)

31Han Jisun anmani jiang a hong ti nang ni rakip in ve en ni janhin kei jarra kutsuikesui na suak nati; ajarko hivahi an lui jiak sa ani. “Kein belram shelpu ha vekata, hale belramterup ha an thei an chang a kan senver nanti”. 32Tak-ha kein ka ringkhir suale, nang ni nek mandet Galili lui che ka ti.

33Pitar in ama jiang a hong shanga a ti, “An renga nang jarra kutsuikesui na an neinom, kei ko kutsuikesui na nei chil noning.”

34Jisun ama jiang a ti, “Kein a thianga nang jiang kari ani, ve ennijan hin arkhongpan akhuang maje, nang in kei hi veithumtak na jot noni che.”

35Pitarin ama jiang a ti, “Kein nang le kan ruaia kan thirang aninom; kei ko nang ha ana jot lui nichil noning,” ha ang han thiamruoi rakip innom an lui ti.

Getsamani a Jisun Alam

(Mrk. 14:32-42; Luk. 22:39-46)

36Han Gethsamani anti mun han Jisun anmani le alui honga hale thiamruoingai jiang a hong ti, “Kein shonna ka chea lamna kan nei kar han, hin lui ongru.” 37Hale a man, Pitar le Zebedi a pasalnai anni a tuanga; hale a man a tam tak pong na a hong nei jui. 38Hava han a man anmani jiang a hong ti, “Kein ka lung hi thina rangkhan a pong jui nang nin hin omnang, kei le jalluia nangak puisuomru.”

39A man ma don tiang a laak det a che hale a bok chunga lamna aneia a ti, O, a pa, hivahi anithei inko kei jiang tenna hiva kok lai hi kan khel ta rase, ha aninom ke kei ka lungdo hong nima rase, tak-ha nang lungdo hongni rashe.

40Hava suale a man thiamruoingai jiang a hong pha han an lui jal a mu a, hale Pitar jiang a hong ti, “Nang nin kei le kan ruaia dar khat jak pha om jalluia ngak tor ma che u mo? 41Nang nin mathemna nan lut mak na rang jalluia ngak nang lamru, thavang inko a ngaidon, tak-ha taksanko tor mak.”

42Veikhat ret a man veini chang na a chea a hong lam ma a ti, “O, a pa kein ka in mak kar je hiva kok lai hi kei tenna a kan khel tor mak rang a tun ko, nang na lungdo ni rase.” 43Hale a man a hong kir ret kar han, anmanin an lui jal ha a mu jui ajarko anmanin an i a tam alui mu.

44Han a man anmani ha a mak vei khat acheret veithum chang na lam na a hong nei han a kan ang rip chonga a hong tiret. 45Hava han a man a thiamruoingai jiang a honga hale anmani jiang a hong ti, “Nang nin a tun tunga nan jalla pong mo nan lakansak? Enru a phat hi a hong nai jui, mi pasalnai ha siat nei ngai kut chunga an pek jui. 46Thuiru keini che tarei, enru, kei ana pekpa mi ha ana hong depjui.”

Jisu Anchur

(Mrk. 14:43-50; Luk. 22:47-53; Jhn. 18:3-12)

47Hale a man chong alui ri laitak han, enru, Juda Iskariot anti somleini karra an khat in thiampulianngai le mikarra ulianngai tenna chem sei le mol, anlek mitamtak le an lui hong. 48Atun ama a pekpa mi ha ning anmani jiang jetna ankhat a hong ti, ‘Kein abiang kitumrang ama ha churru.”

49Hale hava lai tak han a man Jisu jiang a chea, chubei ka na buk oja, atia hale abiang a tum jui.

50Hale Jisun ama jiang a hong ti, “Sap i ruia mo ni hong?” han anmanin an honga Jisu chunga kut anbanna hale an churra an tuang jui. 51Hale Jisu le alui om suam anmani karra an khat in, achemsei a kei sua a kut a hong thuang han thiampulian suak an khat kuor alui tanthakjui. 52Han Jisun ama jiang a ti, “Na chemsei ha a mun na thun khiro,” ajarko chemsei lekngai rakip in chemsei a mang nanti. 53Animakle thaneithiang somleini khel la kei jiang na hongsanna ranga kein ka pa jiang lamtor noning tia mo nang in ningaidon? 54Ija mo chong thiang in hingan ni rase alui ti ha lungdo a tung tor rang?

55Hava phat han Jisun mitamngai jiang alui ti, “Aruk khat churrang ang han chem sei le molle kan ruaia kei churna rang nang nin nan hong suak jui mo? A ni racham kein nang ni le biakinn sunga kan onga ka na manchu in om kei hi nang nin na chur ma che u. 56Tak-ha tashantheingai chong thiang man tung na rang hiva rakip hi a suak jui ani, hava han a thiamruoi rakip in ama ha an mak an tandejui.”

Ulianrup Ma don na Jisu

(Mrk. 14:53-65; Luk. 22:54,55,63-71; Jhn. 18:13,14,19-24)

57Hale Jisu a churngai ha ning dan ojangai le ulianngain an kan chun na kaijapha thiampulian jiang ama ha an hong tuang jui, 58tak-ha Pitar in thiampulian tualmang tenna ama ha akanlak det alui jui, hale asung a lut a torna ha imo a suak rang jet na ranga suakngai le alui ongchun. 59Thiampulianngai le ulianrup an renga, Jisu that na ranga a nilui shakhi an lui tok. 60Tak-ha khat jak om lui mu ma u, hale ani lui shakhi pek mi a tam lam an hong inom, anmanin i om lui mu ma u, tak-ha nuktak miring annin an honga. 61Hale anti, hiva mipa ning a ti, “Kein Pathian Biakinn hi ka set tor hale nithum sunga ka sin khir tor alui ti.”

62Hale thiampulian in a hong thuia ama jiang a ti, “Nang i om na shang noni che mo? Nang chunga mingai ning an hong pek shakhingai hi imo ani?” 63Tak-ha a om chianjui, hale thiampulianing a hong shanga ama jiang a ti, nang in pathian nai Khrista naninko, keini jiang nari pe na ranga kein a ring Pathian ha chong kashama ka na ri,

64Jisun ama jiang a ti, nang in na ti jui, aninom kein nang jiang kati, “Hiva suale Mi Pasalnai naining ranak nei achang tianga a hong hale vanram shumphai chunga a hong ha nang nin nan mu rang ke.”

65Hava han thiampulianin apuon an ektherra a hong ti, a man Pathian ha esella chong a ri jui, hiva khel la kein in shakhi tok de na rang a nem na imo a la om? Enru, a man Pathian esella a ri ha nang nin nan jet jui. 66“Nang nin imo nan ngaidon?” Anmanin an hong shanga anti, ama a thi rang hi a rahui thek ani.

67Hava han anmanin ama ha an chilthuanna an vejui, a dangngain a mai an benjui. 68An hong ti Khrista nang ana vepu ha tu mo, keini jiang na ri pero.

Pitar ning Jisu Ajotlui

(Mrk. 14:66-72; Luk. 22:56-62; Jhn. 18:15-18,25-27)

69Pitar ning tualla a hong lai han suak numei an khat in ama jiang a honga a ti, “Nang om ke Galili Jisu le na lui kan ruai.”

70Tak-ha a man anmani rakip madona jot mak a hong ti nang in na ti ha kei jet making. 71Hale a man tual tiang a suak han, a dang dong ma an khat in ama ha a mu a, hava mun na a om anmani jiang a hong ti, “Hiva mipa hi om Nazaret Jisu le an lui kan ruai.”

72Tak-ha a man khomak a kan shama lui jot retmak, “Kein mi ha jet making” alui ti.

73Hale pha bongkhat suale hava sirra a ngir anmanin an honga Pitar jiang an hong ti. “Adik tak nang om anmani karra an khat na ni, ajarko na chong ri ning nang ha ana manjet.”

74Hava suole a man khuo a kan khonga hale khomak kan shamna a hong phut a ti, “Kein mi ha jet making” hava phatak han ar khongpan a hong khuongjui. 75Hale “Ar khongpan a khuong mak ma nang in kei hi veithum tak na lui jot noni che tia Jisu ning ama jiang alui ti ha Pitar ning a hong ngaidonjui,” han a man tual tiang a suak lungtok a alui chapjui.

Currently Selected:

MATHIU 26: AIMOLBSI

Highlight

Copy