MATHIU 12

Sernikhuo Ruia Dingkelna

(Mrk. 2:23-28; Luk. 6:1-5)

1Hava pha han Jisun sernikhuo ni han lui puk laia alui hong, a thiamruoingai ha an von a cham ma gehubor ankhiak an lui chak jui. 2Tak-ha pharisingain an mu a, ama jiang an hong ti, “Enro, na thiamruoingain sernikhuo hin tho salui chuan an tho.”

3Hava han a man anmani jiang a ti, “David ning a kan ruoipuingai ha an von a cham pha imo a tho pe nang nin pamak che u mo? 4A man Pathian inn na ija mo a lut thiampu jak in chak jot bulom ha tu khat innom chak jot lui ha ama le a kan ruoipuingai ning an lui chak. 5Animakle sernikhuo thiampungain biakinn sunga, sernikhuo ha an ngakmak innom an siatna om mak tihi, nang nin dan rabu ha pamak che u mo? 6Tak-ha kein nang ni jiang kati hiva mun hin biakinn nek a lian det khat a om. 7Kein manritthei ha ka dei, an khat phur ha dei making, tihi nang nin imo a ti na nan lui jet inko siat nei lui mingai ha nan lui man siat lui rang ani. 8Ajarko Mi Pasalnai ha sernikhuo Puma ke ani.”

A Kutthi Pasal Khat

(Mrk. 3:1-6; Luk. 6:6-11)

9Hava mun ha a man a mak a anmani Sainagok sunga a hong lut. 10Hale enru, a kut her khat a thi mi an khat alui om, hale anmanin ama jiang an dingkel la anti, “Sernikhuo mandam rang hi tho salui mo ani?” Hivahi ama jiang siatna man nei na rang ani.

11Hava suale a man anmani jiang a ti, “Nang ni karra mi an khat in belram an khat anei a, hale sernikhuo han khur an khat sunga a chul inko, a kut a obak a kei sua lui rang tu mo nan om? 12Ha aninko belram nek a mi ning lam a man tam det mo nimak? Hiva jarra sernikhuo hin chuan sat tho ngai ani.” 13Han a man mipa jiang han a ti, “Na kut ha thuangro,” hale a man a kut a thuanga, an khat anga a dam pe jui. 14Hava suale pharisingain an suak ama hi ija mo siatna kan man nei rang hale ija mo kan manmang rang tia chong an lui kan siam.

Pathian Thangsuak Suak

15Tak-ha Jisun hava a jet pha han, hava mun tenna a suak jui; mitamtak in ama a nuk an lui jui, hale a man a nat rakip alui man dam. 16Hale kei hi mi jiang na manjet maru tia, a man chong ngartak a bejui. 17Hivahi Pathian tashanthei Isaia in alui ri ha tung na rang ani, 18“Enru ka suak rang ka thang ha; ka lungsiat ama jiang ka lungdo a tung, ama jiang kein ka thavang ka thun pe rang ke, hale a man dik na ha jatdang mingai jiang phuangsot nati. 19A man mi le kansuolpui noning animakle khek om khek noning, hale lam rakip ama rang tu ning om jet noni u. 20Adik chongtan han chung suak na a om mak kar je a man tuoitung kuisha ten nom ekkhiak noning. Hale a thi dedeng meisher om shemthat tor noning, 21Hale ama a ming ha a dangjatngain takngai nanti.”

Jisu Le Belzabul

(Mrk. 3:20-30; Luk. 11:14-23)

22Hava suale seitan in a choi a mitdel, a chongsuaklui mi khat ama jiang an hong choi; hale a man ama ha a man dam jui, hava han a chongsuaklui ha an mu jui, 23Hale mitamngai ning an ngak, “Hivahi David a pasalnai ha mo ani?” anti.

24Tak-ha pharisingain hivahi an jet anti, “Hiva mi hi ning seitanngai ulian ‘Belzabul’ ranak ni lui a a dang seitanngai notchei ma.”

25Tak-ha Jisun anmani an ngaidon ha a jet anmani jiang a hong ti; “Rengram rakip sunga anmasia herni an suak inko mang na a suak, hale khopui animakle inn sung rakip sunga herni an suak inko ring tor noni u.” 26Hale seitan in seitan ha a notchei inko, a man ama sunga herni a chang jui ha aninko, a rengram ha ija mo a ngir tor rang. 27Hale kein Belzabul ranak seitanngai ka notchei inko, nang nin nan pasalnaingain tu ranak a mo anmani ha an notchei? Hiva jarra anmanin nang ni chongtanpu chang nanti. 28Tak-ha kein Pathian thavang rat na han seitanngai ha ka notchei aninko; a thiang Pathian rengram ha nang ni jiang a hong jui.

29Animakle, tu ang khat in, a rat mi an khat inna a lut ama ha mankhit bakluia ama a nei nun ha ija mo a suttor rang? Akhit suale han ama a nei nun ha ruktor nati,

30Kei le om suam lui mi ha kei le kan enda ha ni, hale kei le mankanchun lui mi ha, a man avorthe ha ni nati. 31Hiva jarra kein nang ni jiang kati, mingai siat nale esella chong ri rakip ngaidam om nati; tak-ha thavang jiang chong ri rakip mi ha ngaidam om noning. 32Tu aninom Mi Pasalnai jiang, enda chong ri rakip ama jiang ngaidam om nati; tak-ha tu aninom thavang thiang chunga enda chong ri rakip, hiva ramuol chunga le a hong rang ramuol ha nom, ama jiang ngaidam om noning.

Thingkung Le Ara

(Luk. 6:43-45)

33Thingkung ha man satru a raham sat nati, animakle thing kung ha man sat maru a raham sat noning; ajarko a rahan thing kung ha jet torna a om. 34Rul naingai, nang ni satko satlui che u, ija mo asat chong nan ri tor? Ajarko lung sunga a om rakip ha bai in arisuak. 35A sat mi ning an lung innte sat han, asat phur an kei sua; hale a satlui mi ning an lung salui innte han, a satlui phur an kei sua.

36Tak-ha kein nang ni jiang kati, “Mingain nem na buia an chong ri a an rina nuk jui a chongtan ni han mu nanti. 37Ajarko nang na chong ri nuk jui a nang ha na dik tia, hale nang na chong ri nuk jui a nang ha dik ma che tia na lui nanti.”

Angakpa Na man muro

(Mrk. 8:11,12; Luk. 11:29-32)

38Hava pha han danthei “Oja” aviar le pharisingain an hong shanga anti oja, “keinin nang jiang jet na an khat kan mu jot.”

39Tak-ha a man anmani jiang a hong ti, “A satlui tho le numei ka lal mirualngain jet na an tok hale Pathian tashanthei Jona jiang jet na ha ni lui a a dang jet na pelai noni u.” 40Ajarko Jona ha sun le jan nikhuo thum ngalianpa vonsunga a om ang han; Mi pasalnai ning om sun thum le jan thum simlei sunga om nati, 41Nineveh mingain chongtan ni han, hiva mirualngai le hongthuisuom nan ta; anmanin dik ma u tia na donati, ajarko chong a ri lai anmanin an lung an luithul; hale a thiang tak hivahi Jona khel la a lian det khat hin a om. 42Thangtianga rengnu ning, chongtan na pha han hiva mirualngai le hongthuisuom nan ta; anmanin adik lui ke tia donanti, ajarko a man ramuol mongna tenna a honga, Solomon a ching a thei na ha ngai rang jarra, hale a thiang tak hivahin Solomon khel la a lian khat a om ani.

Thavang salui Hong kan Lena

(Luk. 11:24-26)

43“Mi khat sunga thavang thiang lui ning a suak pha han, ram char na han a chea; pong kan shak na a tok, hale lui mu mak. 44Hava suale a man a ti, kein ka hong suak na ka inn han kirkhir takati; hale a man alui tong hiaia, a kanphiat pet hale asat alui om ha a mu jui. 45Hava han a man a chea, ama khel la thavang satlui sari a hong tu anga, hale an lut an om jui, hale mi ha man lai nek a tornahin a nun chan khel la hong sat ma; hiva ang hin a satlui mirual hiva ngai jiang om hong ni nati.”

Jisu a nu Le A naipangai

(Mrk. 3:31-35; Luk. 8:19-21)

46Jisun mitamngai jiang chong a ri a a om pha han, enru, a nu le anaipangain ama le kan biakpui ranga tualla an ngirra an lui om. 47Hava suale mi khat in ama jiang a ti, “Enro, na nu le na naipangain nang le kan biak ranga tualla an ngirra an om,” 48Tak-ha a man a hongtipa jiang a ti, “Tu mo kan u, hale tungai ha mo ka naipangai?” 49Hale a man a thiamruoingai jiang a kut, a thuanga a ti, ka nu le ka naipangai ha hin an om. 50Ajarko tu aninom vanram ma om ka pa lungdo a tho mi ha kei ka u, ka nai, hale ka nu ka pa anni.

Currently Selected:

MATHIU 12: AIMOLBSI

Highlight

Copy