ZAKARIA 14
14
Jerusalem neh a kôlvêla namhei
1Ringai ta, Pumapa chu roirêlna ṭhungmuna â ṭhung rang nî a nâi tâk e. Khanungchu, Jerusalem khah irokin om a ta, nangmaa rithoka an râllâkhei chu ni mitmu ngêiah risem an ti. 2Jerusalem idoi rangin nam tin tin Pumapa khan koi bûm a ti. Khopui chu ila nîng a ta, inhei chu irok nîng a ta, nupanghei chu zâlrâta châipuiin om an ti. Khopuia mihei khah bâkkah chu suaka ṭhuiin om an ta; nikhomsela, mipui la om isunhei chu khopui ata ṭhui inrimangin om no nih. 3Khanungchu, Pumapa chu fe suak a ta, zoro thleng tâkheia ridoinaa a lei châng ngai lam angkan kha namhei khah doi a ti. 4Kha tikin chu Jerusalem sak tianga Oliv Tlângah khan iding a ta; khanchu, Oliv Tlâng khah sak tiang neh thlang tiang ân lâina takah khan kakriphal a ta, a kârah phâizôl ilian tak om a ti. Khante, tlâng khoilokkah kha mâr tiang rithon a ta, a khoilok dang kha sim tiang rithon a ti. 5Itlâng kâra phâizôl tiang ipâlin zôkna rangin itlân nin ta, Judai rama rêng Uzia inlal lâia nînupui inîng zoroa nin chibulhei lâizâm an itho angkan lâizâm thông nin ti. Khante, Pumapa ki Pathian chu zuang a ta, a vântirtônhei murdi a ziangah zuang sâng an ti.
6Kha nî-ah khan chu idâi rai manih izîng rai manih om khâi no nih. 7Zân om khâi no nia, sûn khovâr ni mai tâng a ti. Khannisela, kha sûn tlung rang zoro khah Pumapa bangin ai riat a nit.
8Khante, kha sûn a hong tlung tikin chu Jerusalema rithokin tui iring rithiang luang suak a ta, arzâtkah Tuipui Ithi tiang luang a ta, arzâtkah Mediteranean tuipui tiang luang a ti. Fûr neh ṭhâl khomah chât loiin luang mai a ti.#Ezek.47:1; Joh.7:38; Thup.22:1. 9Khanchu, rinêng chung pumpuiah Pumapa chu rêng inchungtak hong ni tâng a ta; mi tinrêngin amah bang Pathianin chubai ûn an ta, ama riming bang kha rilam tâng an ti.
10Ram pumpui chu Gebaa rithoka Jerusalem sim Rimon idênin phâizôl richam hong ni tâng a ta; nikhomsela, Jerusalem chu a mun ngaingirah inrisâng nîng a ti. Khopui khan Benjamina Kotpuia rithoka kotpui â khatna, â Kil Kotpui an iti ngai idênin neh Hananela In risânga rithoka rêng uain sômkhur an iti dênin a mun del nîng a ti. 11Khante, mihei chu a sungah khan izôkriamkan lêng an ta, siatna rang rêng rêng om khâi no nia, Jerusalem chu râlringam takka lua ni tâng a ti.#Thup.22:3.
12Jerusalem idoitu namhei murdi chungah khan Pumapa khan ripui inlêng a ta, anni chu an la dam lâi zelin an taksa chu mon zoi vang a ta, an mit neh an ileihei khom mon vang a ti.
13Kha nî-ah khan chu Pumapa khan buaina neh rilônthingna natinsat tak an lâiah in-om pêk a ta; khanchu, mi tinin mahni bungtualbôm chungah a kut ilek zel tâng an ti. 14Juda khomin Jerusalem isanin doi a ta; a kôlvêla namhei murdi neinun rângkachakhei, tangkaruahei, silbomhei chu itam takkah bûm a ti.
15Ripui inrît tak khah an sakorhei, sakuartunghei, saringseihei, sakuartung â chîn chihei chungah zuang lêng a ta; Irâlhei riabuka ran iom murdihei chungah khan ripui chu lêng a ti.
16Khanungchu, Jerusalem hong idoitu nam tin tinhei lâia izuaa la om isunhei chu kum tin Dângdi Kût imang rang neh Rêng tak Tinrêngthothei Pumapa chubai iûn rangin fe ngai an ti.#Lev.23:39-43. 17Khante, rinêng chunga nam tin tin, Rêng tak, Tinrêngthothei Pumapa chubai iûn ranga fe nuam inohei chungah khan rua sûr no nih. 18Aigupta mihei khom Dângdi Kût imang ranga an fe nuam non chu Jerusalema fe nuam ino namhei chunga Pumapan ripui ai tir rang kha an chungah khom tlung sâng a ti. 19Khahei khah Aigupta ram neh nam tin Dângdi Kût mang nuam inohei chunga dengtheina tlung rang chu a nit.
20Kha tik tenan chu sakor lâkam ruiheia lua khom “Pumapa ranga thâr inrithiang,” iti chuang a ta; Pumapa ina bûrbêl khom mâichâm maa rihûm angkah dôra rithiang hong ni tâng a ti. 21A nit, Jerusalem neh Juda ram pumpuia bûrbêlhei murdi chu Tinrêngthothei Pumapa chubai ûnna mang ranga thâr inrithiang ni tâng a ti. Ribôl ranga fe murdihei khan bûrbêlhei khah ribôlna sa butna rangin mang thei tâng an ti. Kha tikin chu Tinrêngthothei Pumapa inah khan sumrivai mi rêng rêng tute om khâi no nih.
Currently Selected:
ZAKARIA 14: BIATBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
