MATHAIA 8

Jisuan iphâr ân dam thu

(Mk.1:40-45; Lk.5:12-16)

1Khante, Jisua itlânga rithoka a zuang ṭumin chu mipui itam takkan an zui a.

2Khanchu, a ziangah iphâr khatkah a hong a, a makungah rikhûk idilin, “Epu, ni nuamin chu ni nen rithiang thei,” a ti a.

3Jisuan a hang iban a, a tôn a, “Ki nuam, hong rithiang ta roh,” a ti a. Tukvakkan â phâr khah a hong rithiang zel tâk a. 4Khanchu, Jisuan a ziangah, “Ringai roh, tute iril no roh; khannisela, thiampu ziangah thleng thal inla, vân en roh; khanchu, ni dam tâk iti mi tinin an riatna rangin Mosian ribôlna ilan ranga a înkung khah lan roh,” a ti pêk a.#Lev.14:1-32; Mk.3:12; 5:43; 7:36; 8:30; 9:9.

Sipai rizaka ruitu som indam thu

(Lk.7:1-10)

5Khante, Jisua kha Kapernaum khua a hong lûtin chu a ziangah Rom.sipai rizaka ruitu a hong a, 6“Epu, ke som dam mak a, izeng châng thei loiin inah takkan zâlmunah a om,” itin indam pêk rangin ṭhatnemringai takkan a ngên a.

7Jisuan a ziangah, “Hong ki ta, indam ki ti,” a ti a.

8Sipai rizaka ruitu khan a ziangah, “Epu, khangkan ni mak, ki insung ni lûtna tlâk ni mak e. Ṭongbâi ringot tin la, ke som dam zel a ti. 9Kei khom mi nuaia om ki nit a, ki nuaiah khom sipaihei an om a. Mi khatka ziangah, ‘Fe roh,’ ki tin chu a fe ngai a; mi dang ziangah, ‘Hong roh,’ ki tin chu a hong ngai a; ke som ziangah khom, ‘Amahih sin roh,’ ki tin chu a sin ngai,” itin a sâm a.

10Jisuan kha ṭong khah a riatin chu arngai arkhêl ok a, mipui â zuihei ziangah khan, “Nangni ke ril, Israelhei lâi khomah hi dôrka iamna lian hi chu la mu mang e. 11Ti titakin nangni ke ril, sak neh thlang ata mi itam takka hong an ta, rivân ramah khan Abrahama hei, Isaka hei, neh Jakoba hei ziangah ruaiṭhena rikhîl an ti.#Isa.49:12; 55:2; Mal.1:11; Lk.13:28,29. 12Ram naihei #8:12 Israel mihei isîrna a nit. kha chu putiang izîngah pai isuan om an ta; amakhan ṭap an ta, an rikam inritông an ti,” a ti a.#Mat.22:13; 25:30; Lk.13:28. 13Khanchu, Jisuan sipai rizaka ruitu ziangah khan, “Ni inah fe tan la, ni iam lam angkah takin ni ta rangin isin nîng a ti,” a ti a. Khanchu, kha mitrikhap ngêiah khan sipai ulianpu som khah a dam tâk a.

Jisuan mi itam takkah ân dam thu

(Mk.1:29-34; Lk.4:38-41)

14Khante, Petera inah Jisua a fe a, Petera tarpi inkhura zâlin a mu a. 15A kut a tôn pêk a, ân khur khah a boi pêk zel tâk a; khanchu, a thoi a, thlâi a sin pêk tâk a.

16Khante, kholoi a hong nitin chu mipuihein Jisua ziangah ramrili iman mi itam takkah an hong ṭhui a. Jisuan ṭongbâiin ramrilihei khah a ûm isua a, dam ino murdihei khom ân dam sa a. 17Zânthla Isaian, “Amah ngêiin ei râtnonahei a lâk a, ei natnahei a pêl tâk,” itia a lei îsîr khah a hong tlung idik theina rangin amakhah ai tho a nit.

Jisua zui itumhei

(Lk.9:57-62)

18Khante, mipui itam takkah a kôla om Jisuan a mun dîl râl tianga kâi rangin a kôilômhei khah thu a pêk a. 19Dân inriseitu khatkah a ziangah a hong a, “Minriseitu, ni fena mun tinah nang zui ki ti,” a ti a.

20Jisuan a ziangah, “Sihalhein khur an nei a, ivahei khomin ribu an nei a; khanniseh, Miriam Naipa chu a lu ringatna rang ilua nei mak e,” a ti a.

21Khante, a kôilômhei lâia mi dangin a ziangah, “Puma, inah nen fe nôk inla, ki pa la va phûm bak hi rong,” a ti a.

22Jisuan a ziangah, “Ne zui roh, mithi khan an mithi champui chu phûm riseh,” itin a sâm a.

Jisuan thlipui a ngo indâi

(Mk.4:35-41; Lk.8:22-25)

23Khante, Jisua rikuangah a chuang a, a kôilômhei khan an zui a. 24Khante, tukvakkan thlipui a hong râng a, rikuang khah rinîk pai rangin a om tâk a. Nikhomseh, Jisua chu a in thlar a. 25Kôilômhei khah a ziangah an fe a, an va thoi a, “Puma, nen zôk roh, kin irmang rang a nit,” an ti a. 26Jisuan an ziangah, “Ithôm nin ṭi bâk a? Ingkana nin iamna khom ai chîn rai tâk im na!” a ti a. Khanchu, a thoi a, thlipui neh tuirisok khah ringam rangin thu a pêk a; khanungchu, a hong dâi dup tâk a.#Mat.6:30; 14:31; 16:8. 27Mi tin an ringai arkhêl a, “Hi mi hih ingkana mi tak im ai nit? Thlipui neh tuirisok tena khomin a thu an izôm hi!” an ti a.

Ramrili iman mi inikah ân dam thu

(Mk.5:1-20; Lk.8:26-39)

28Dîl râl tiang Gadarin #8:28 Mss ṭhenkatah chu ‘Gergesin, Gersina, Gerasen’ iti hei a nit. mihei ram kha Jisua a hong tlungin chu ramrili iman mi inikah, ithlâna rithoka hong isuakhein an hong pun a. Khahei khah iṭi an om tak tak a, kha lampuiah khan tute an ife ngam ngai ino a nit. 29Voikarengin anni khah an ikhêk a, “Pathian Naipa, im ne lo rang nî ti? Zoron kung tlung maa deng nen thei ranga nî zuang im ai nit?” an ti a.

30Khantaka rithoka inâi sarka tah khan vok lôm fâk izong an om a. 31Khanchu, ramrilihei khan, “Ni ne ûmisua rangin chu vok lômhei sungah son nen lût roh,” itin Jisua an riphat a.

32Jisuan an ziangah, “Va lût rei” a ti a. Khanchu, an suak a, vokhei sungah khan an va lût tâk a. Khante, vok lôm khah an rêngkan dîl rikama rôlbôkah an itlân a, dîlah khan an rinîk vang tâk a. 33Khante, vok irâkhâlhei khah an itlân a, khosungah an fe a, thil omzia tinrêng an isîr a, ramrili imanhei chunga thil hong itlung khom khah an isîr a. 34Khanchu, a kho pumin Jisua mu rangin an suak a; khante, amah an va mun chu an ram ata suak rangin an ngên tâk a.

Currently Selected:

MATHAIA 8: BIATBSI

Highlight

Copy