MALAKIA 2
2
1 Pumapa Tinrêngthothei khan thiampuhei ziangah, “Hi thupêk hih nangmani rang a nit: 2Nin sinthohein ker ming nin chôiinrisâng noa, ki thu nin ringai non chu nin chungah vânisalna ithlun ki ta, nin ṭhatvurna donghei khah vâni nangni sâm pêk ki ta; a nit, tititakin ki thu lungrila vong nin om no sikin vâni kî sâm pial tâk a nit. 3Ringai ta u, nangmani sikin nin richihei chu kuttum thông ki ta, nin mâiheiah khan nin ribôlna mîringhei êk khah itât ki ti. Khanchu, khahei neh khan êk paina munah pai inrimang nîng nin ti. 4Khanchu, Levia richi Thiampuhei ziangah ki thuthlung hih â ding mai theina rangin hi thupêk hih nin ziangah kî pêk a nit, iti reh tâng nin ti.#Rit.3:11-13.
5“Ki thuthlungah khan ringna neh thlangamna ken kung a, amakhah a nit, an ne marit theina rangin an ziangah kî pêk a nit. Ker ming khom an lei ṭi ngai a, imarit khom an lei imarit ngai a nit.#Rit.25:12. 6Mihei thu dik an inrisei a, milak thu rêng rêng chu an bâiah khan suak ngai mak a. Thlangam tak neh ringei takkan ki makungah an om ngai a, mi tam takka an siatna ata rilet rangin an iṭangpui ngai a nit. 7Thiampuhei bâi khan Pathian riatna dik thu ân risei rang a nit. Anni chu Pumapa Tinrêngthothei tirtôn an nit sikin mipuihei khan ki lungdo risei rangin an ziangah khan an fe rang a nit.
8“Nikhomsela, atûnah hin nangni thiampuhei lampui dik ata nin pêt tâk a. Nin dân inriseiah khan mi itam takkah nin inpêt a; nin zianga ki thuthlung chu nin îsiat a nit. 9Khasikin, keimah khomin ki lampuihei â zui nin omno sikin neh nin inrisei dânah khom thleibîk nin nei lam angkah takin mi tin tin musit neh întlômin nangni kî siam tâk a nit,” a ti a.
Pathian chunga mihei iamom nona
10Ei rêngkan pa khatka richi ni mang mêm a? Pathian khatka ne isiam korong ni mak im a? Îtho sik im Pathianin ei pahei neh thuthlung ai siam khah ikhiakin, mi tinin suapui rêngka ei irlêm risak ngai? 11Juda khan Pathiana a thuthlung â khiak a, Israel ramah neh Jerusalemah thil tir iom a sin a; pathian dang chubai iûn ngai nupuiin a nei sikin mun rithiang, Pumapan lung ai thlung tak kha an înnim tâk a nit. 12Khangkana tho murdi chu mi tukhom Israel mihei lâia rithokin Pumapa khan ṭhângsena vôr inchang sela, Pumapa Tinrêngthothei ziangah thillan nampumin an hong chôinaah khom inṭang ni tlak khâi no riseh.
13Khante, hi khom hih nin itho ngai a nit. Pumapa ziangah nin thillan hong lan rêng rêng â ham khâi no sikin Pumapa mâichâm kha iṭap neh irungin, mitrithlin nin irkhû ngai a nit. 14Nangmanin chu itho sik im a lei iham khâi no nin la ti mai a. Ni vânglâi nupui zianga ni ṭonginkung ne siat tâk iti Pumapa khan a riat a. Ni Thuthlung nupui neh ner koppui a nit a, a chungah iamom ranga Pumapa makungah ṭong nen kung pumin a chungah lêmna sin ni tho ngai sikin a nit. 15Pumapa khan takpum khatkah neh rithla pum khatka rangin nangni ai siam ni mak im a? Îtho sik im pum khatka ai siam? Pathian mi diktak richi nei rangin a nit. Khasikah khan, nin ringna khah vênginṭha unla, tutên mahni rikoppui lêm no riseh. 16“Rimâk hi kî theimâk a nit,” Pumapa Israelhei Pathian khan a ti. “Nin nupuihei chungah tharum nin imang khah kî nel a nit; khasikin, nin ringna vênginṭha unla, nin nupuihei chungah iamom loiin om no rei,” Pumapa Tinrêngthothei khan a ti.
Roirêlna nî a nâi tâk.
17Nin thusîrhein Pumapa chu nin însôl a nit. Nangni rêkin chu, “Ingkan im kin însôl?” nin ti a. “Thil isual thotu murdi Pumapa mitmuah mi ṭha an nit a, an chungah khom ani kha a lôm ngai,” nin iti hei, “Roirêl felna Pathian khah taktiang im ai om tâk?” nin iti heiah hin nin însôl a nit.
Currently Selected:
MALAKIA 2: BIATBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
