LUKA 20

Jisua thuneina an ridonna

(Mat.21:23-27; Mk.11:27-33)

1Nikhuakah chu Jisuan Tempilah khan mihei ân risei a, Thurchi Ṭha â sîr pêk lâiah khan thiampu lalhei neh Dân inriseituhei khah upahei neh a ziangah an hong a. 2A ziangah, “Tu richamin im hi sinhei hih nî tho? Tûm richam nang ipe ne ril roh,” an ti a.#Joh.2:18.

3Jisuan a sâm a, “Kei khomin ṭong khatkah nangni ridon ki ti. 4Johana baptisma khah Pathian richam im miriam richam im, ne ril rei,” a ti a.

5An khâtin an risêl a, “Im ei ti rang tâk? ‘Pathian richam,’ ei ti lakin ‘Ithôm nin iam no,’ ne tîng a ta. 6‘Miriam richam’ ei ti lakin hi mipuihei hin lungin ne dêng an ta, Johana khah zânthla a nit ngêt itia an îpom a nit a,” an ti a. 7Khanchu, “Tu richam im ai nit, reh mang ung e,” itin an sâm a.

8Khante, Jisuan an ziangah, “Kei khomin tu richamin im hi sinhei hih kî tho nangni ril ual bîk no ning e,” a ti a.

Grep rikul enkoltu ṭongrikhek

(Mat.21:33-46; Mk.12:1-12)

9Jisuan hi ṭongrikhek hih mihei â sîr pêk tâk a, “Mi khatkan grep rikul a siam a, â enkoltuhei ziangah ṭuan rilo rangin a pêk a, ram dangah isôt takka thang rangin a fe tâk a.#Isa.5:1-7. 10Khante, grep rimal zoro a hong nitin chu a dongtum ilah rangin a enkoltuhei ziangah a suak khatkah a tir a. Nikhomsela, rikul enkoltuhei khan a suak khah an lei hêm a, kut korongin an infe nôk a. 11Khante, suak dang a tir nôk a, kha khom khah an lei hêm a, mâimôk an sak bit a, kut korong ngirin an infe nôk tâk a. 12A ṭum ithumna ai tir nôk vâng kha chu an lei iphop neng a; rikul putiang an pai isua a. 13Khanungchu, grep rikul ineitu khan, ‘Ingkam ki tho rang tâk? Ki naipa lungthlung tak hih tir ki ta, ani chu lei marit ngêt an ti,’ a ti a. 14Khannisela, rikul enkoltuhei khan an lei mu kaneh chu, ‘Hi mi hih a chongpu naipa a nit. That ei ti u; khanchu, archon hi ei ta nîng a ti,’ itin an inrual a. 15Khanchu, grep rikul ata an kâi isua a, an that tâk a. Khateh, a chongpu khan rikul enkoltuhei khah im lo tâng a ti? 16Hong a ta, kha mihei khah that a ta, grep rikul khah enkoltu danghei pêng a ti,” a ti a.

Kha thu khah an riatin chu, “Khangkah raiin chu an tho rang ni mak khate,” an ti a.#TS.13:46; 18:6; 28:28.

17Jisuan annihei khah a en a, an ziangah,

“‘In isintuhein lung an îdit ino tak khah,

Â kila lung kâmiomtak a chang tâk,’

iti riziak hih im a omzia ai nit?#Lap.118:22; TS.4:11; 1 Pet.2:6-7.

18“Tutu kha lung chunga bâ kangân chu rinôi an ta, kha lungin ai del vâng chu rinôi indîchit an ti,” a ti a. #Isa.8:14,15.

Sia chôi thua ridonna

(Mat.22:15-22; Mk.12:13-17)

19Dân inriseituhei neh thiampu lalhei khan, kha ṭongrikhek khah anmani demin a îsîr a nit iti an riat sikin kha mun zelah khan Jisua khah iman an tum a; khannisela, mipui lak an ṭi a.#Lk.19:47. 20Khanchu, zoron ṭum an iruang chak tâk a. Rom.Ram-optu neh a thuneinaah an ithlun theina rangin a ṭong insual iman rangin mi ṭhenka hei, mi ṭha angkana om a, Jisua enthlât rangin an tir a. 21Kha mihei khan a ziangah, “Minriseitu, ni thu sîr neh ni thu inriseihei hi â dik iti kin riat; tute thleibîk iloiin Pathian lungdo thutak nen risei ngai a.#Joh.3:2. 22Khate, Rom.rêng Kaisara zianga sia kin ichôi hih ei dân a nit im? Ni mak im? Ne ril roh,” an ti a.

23Khannisela, an lung inṭong ṭha no khah a riat a. 24An ziangah, “Duli pum khah nen en ta u, tu rilim neh tu riming im â chuang hi?” a ti a.

Anni khan, “Rom.rêng Kaisara,” an ti a.

25Khanchu, Jisuan, “Khah a nitin teh, Kaisara ta chu Kaisara peh unla, Pathian ta chu Pathian peh rei,” a ti a.#Rom.13:7; Lk.23:2. 26Khanchu, vântlâng makunga a thu sîra man an itum khah lo an sam tâk a; a sâmna khah arkhêl an ti a, an dâirek tâk a.

Thoinôk thu ridonna

(Mat.22:23-33; Mk.12:18-27)

27Khante, Sadukai, thoinôkna omak iti ngaihei lâia ṭhenkah Jisua ziangah an hong a.#TS.23:6-10. 28Jisua ziangah, “Minriseitu, Mosian, ‘Tukhom nupui nei seh, nai nei loiin thi sela, a unaipa khan kha numei khah ilua nôkin a ulianpa rang richi a nei pêk rang a nit,’ itin arziak a.#Dn nik.25:5. 29Khateh, urêng pasal sarikah an om a, a ulian takin nupui a nei a, nai nei loiin a thi a. 30Â nikna khan a lua nôk a, 31â thumna khomin a lua nôk a; khaangkan pasal sarikahei khan an lua korong a, nai nei loiin an thi riai a. 32A nungkhôn takah chu nupangnu khom khah a thi tâk a. 33Khante, thoinôknaah khan kha nupang khah tu nupui tak im ai nit rang tâk? An urêngkah lakin nupuiin an nei chit a,” itin an ridon a.

34Jisuan a sâm a, “Hi rammuala mihei hih nupui pasal an rinei ngai a; 35khannisela, rammual la hong iom ranga thoinôknaa ṭang inrupa behei kha chu nupui pasal rinei khâi no nih. 36Vântirtônhei angkan om an ta, ithih khom thi thei khâi no nih. Thina ata an thoinôk tâk sikin Pathian naihei ni tâng an ti. 37Mosia khomin ifel riaikan mithi kâiithoi thu khah sûlribuk ikângah khan Pumapa chu, ‘Abrahama Pathian, Isaka Pathian, Jakoba Pathian’ itin â sîr a. 38Ani chu iringhei Pathian a nit a, mi thihei Pathian ni mak. Ama ta rangin chu mi murdi an iring khai a nit,” a ti a.

39Khante, Dan inriseitu ṭhenkahein, “Minriseitu, ni sâm indik,” an lei ti a. #Mk.12:28. 40Khanungchu, îte ridon ngam khâi mak a. #Mat.22:46; Mk.12:34.

Mesia chungchâng ridonna

(Mat.22:41-46; Mk.12:35-37)

41Jisuan “Mesia hi Davida naipa ingkana an itîm ai nit? 42Davida ngêi khan Lapui bu-ah,#Lap.110:1.

“‘Pumapa khan ki Pumapa ziangah,

Ke changtiang iṭhung roh;

43Ne râlhei ni ke chuangnan ki siam mâkah chu,’ a ti a.

44Davida ngêi khomin ani khah, ‘Pumapa’ a tin teh, ingkan im Mesia khah Davida nai a nit thei rang,” a ti a.

Jisuan Dân inriseituhei a rilna

(Mat.23:1-36; Mk.12:38-40)

45Vântlâng riatin a kôilômhei ziangah khan, 46“Dân inriseituhei ata ridîn rei. Anni khan zakorfual ihâka lêng an nuam ngai a, bazâr muna chibai ritu an ringaiinnat a, inkhôm inah ṭhungmun ihoi neh ruaiṭhe bualah mun iṭha an irngen ngai a nit.#Lk.14:7-14. 47Numei sum an fâk a, mi lêmnan isôt tak takka ṭongṭai an song ngai a; khahei khah an kuttum tuang inrik tak tak a ti,” a ti a.

Currently Selected:

LUKA 20: BIATBSI

Highlight

Copy