LUKA 17
17
Sual
(Mat.18:6-7; 21:22; Mk.9:42)
1Jisuan a kôilômhei ziangah, “Ibânahei hi om ino thei ni mak e; nikhomsela, ibâna in-omtu chung chu ân khôk vang na! 2Hi mi chîntehei lâia khatkah khom inbâ nêkan chu ân bâtu ringah khan bunôilung inlin tuikhanglianah iṭhul sela, a ta rangin ṭha ual a ti.#Mat.18:15.
3“Ridîn rei, ni suapuiin ni chungah sual a sinin chu ril roh, ân sîrin chu izâ roh. 4Sûnkatah ni chungah voi sarikah thil thonsualin voi sarikah, ‘ken sîr tâk,’ itin ni tiang a hong ribatin chu ni lei izâ rang a nit,” a ti a.
Iamna
5Tirtônhein Pumapa ziangah, “Puma, kin iamna nen det pêk ual roh,” an ti a.
6Pumapa khan, “Anṭam ru tiakah iamna nin neiin chu hi theiârlung kung ziangah hin, ‘Hong riphâi inla, tuikhanglianah rithon roh,’ tîng nin ta nin he ringai zel a ti. #Mat.17:20; 21:21; Mk.11:22,23.
Isom sintum
7“Khante, nin lâia tukhôk hin manih isom a nei a, rinêng ituka fe manih, bera hôla fe manih, iṭuan a hong tlung kaneh, ‘Hong inla, bu khêng hong ot zel roh,’ tûm a lei iti rang chei ua? 8Khanêkan, ‘Ki bu khêng ne do pêk bak inla, puan vong inla, ki nêk zoi mâkah ne ngâk roh, kha rizoiin nang chu ni nêk rang a nit,’ tûm â ti no rang chei u? 9Isomin thu a zôm sikin tûm a ziangah lômthu sîr ngai? 10Khangkah khan nangni khom thupêk murdi nin sin zoi riai nung khomin ‘Isom takritâi ino kin nit, kin sintum pial khah kin isin chak a nit hih,’ nin ti rang a nit,” a ti a.
Jisuan iphâr sômkah ân dam
11Khante, Jisua Jerusalem a pan malamin Samari neh Galili ramrî a ro a. 12Khua khatkah a lût rangin iphâr sômkah a tiang an hong a.#Lev.13:45,46. 13Ilah takah an iding a, “Jisua, Minriseitu, lung nen kham roh,” an ti a. 14Anni kha Jisuan a mun chu an ziangah, “Fe unla, thiampuhei ziangah var en rei,” a ti pêk a. Khangkana an fe lâiah khan lampuiah chu an dam tâk a.#Lev.14:1-32. 15An lâia khatkan chu a dam tâk iti a riat kaneh rôl iring takka Pathian inpâk pumin a hong kîr nôk a. 16Jisua ke bula bokin lômthu â sîr a. Ani khah Samari mi a nit. 17Jisuan, “Mi sômkah â dam nin nit a, a dang ikuakkahei khah takâm an iom tâk? 18Ithôm hi nam dang mi bang hih Pathian inpâk ranga a hong ikîr nôk?” a ti a. 19Khanchu, Jisuan a ziangah, “Thoi inla, fe ta roh, ni iamna hi nî dampui a nit,” a ti pêk a.#Mat.9:22; Mk.5:34; Lk.8:48; 18:42.
Pathian ram zuang tlung thu
(Mat.24:23-28,37-41)
20Farisai ṭhenkahein Pathian Ram zuang tlung rang zoro an ridon a. Jisuan, “Pathian Ram chu imuh theiin zuang tlung no nih. 21Tutên, ‘En ta u, hin kêng a om,’ manih, ‘Son kêng a om,’ manih ti no nih. Ringai rei, Pathian Ram chu nin lâiah hin ai om a nit,” itin a sâm a.
22Khante, a kôilômhei ziangah khan, “Miriam Naipa ringlâi sûnhei hih sûnkate lua nin mu nuam nikhua la om a ti; khannisela, mu khâi no tin u. 23Mîn nin ziangah, ‘En ta u, soteh soh’ manih, ‘En ta u, hiteh hih,’ manih la tîng an ta; nikhomseh, ien rangin fe suak no rei. 24Miriam Naipa zuang nî chu, rivânah khothlâr arlek a, kôlkung ata kôlkung idêna ai vâr ngai angkah hin nîng a ti. 25Khannisela, kha matonah khan atûnlâi mihei hin heng an ta, thil itam takkah a lai tuang bak rang a nit. #Lk.9:22.
26“Nova hun lâia thil omdân angkah khan Miriam Naipa zuang nôk nikhuaah khom la nîng a ti.#Riph.6:5-8; 7:6-24. 27Nova, rikuangah a lût nikhua dênah khan mihei khan an fâkin an in a, nupui pasal an rinei a; tui a hong lian a, an rêngkan a înrimang riai tâk a nit. 28Khangkah ngirin Lota dam lâi khomin mi tin an fâkin an in a, an richôk a, an zuar a, thil an phun a, in an sin a.#Riph.18:20-23; 19:24,25. 29Nikhomsela, Sodom khua ata Lota a suak nin chu rivâna rithokin mei neh kât a sûr a, an rêngkan ai that riai a nit. 30Miriam Naipa zuang nôk nin chu khangkah khan la nîng a ti. 31Kha nikhuan chu inchunga omin neinun ilah rangin ṭum no riseh. Khangkah ngirin loia om khomin inah hong kîr no riseh.#Mat.24:17,18; Mk.13:15,16; Lk.21:21. 32Lota nupui remai rei.#Riph.19:26.
33“Tutu a ringna inzôk itum kan ichân an ta, tutu a ringna chân kan inzôk an ti.#Mat.10:39; 16:25; Mk.8:35; Lk.9:24; Joh.12:25.
34“Nangni ke ril, kha zânah khan chu zâlmun khatkatah mi inikah zâl an ta, khatkah chu iṭhui nîng a ta, khatkah chu ima nîng a ti. 35Nupang inikan fâng suk an ta, khatkah chu iṭhui nîng a ta, khatkah chu ima nîng a ti. 36Mi inikah loiah om an ta, khatkah chu iṭhui nîng a ta, khatkah chu ima nîng a ti,” a ti a.
37Khante, kôilômhei khan, “Pumapa taktiang im?” an ti a.
Jisuan, “Saruak omna kipah vasatelhei khom om an ti,” a ti a.
Currently Selected:
LUKA 17: BIATBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
