LUKA 14

Jisuan mi thling ân dam

1Sabatnî voikah chu Farisaihei lâia ulian khatka inah Jisua bu ne a fe a, mîn an lei enthlât chak a.

2Khante, mi khatkah a ke, a kut ithling hi Jisua ziangah a hong a. 3Jisuan Dân inriseituhei neh Farisaihei ziangah, “Ei dânin sabatnî-a indam a phal im, phal mak im?” itin ardon a.#Mat.12:10; Mk.3:4; Lk.6:9.

4Khante, anni khah an dâirek a. Jisuan damino khah â tûk a, ân dam a, ân fe tâk a. 5Khanungchu, Jisuan anni khah â sôn a, “Nangni lâiah tukhôk manin, a naipa manih, a serâtchal manih, sabatnin tuisunsua khurah thla sela, sabatnî khomin tûm â kêlisua zel ino rang chei u?” a ti a.#Mat.12:11; Lk.13:15.

6Khannisela, tutên kha thu khah sâm thei mak a.

Ringaiintlômna neh mi don thiamna

7Khalai rikhîl ranga an mi fial ṭhenkahein ṭhungmun iṭha an rithlang iti a mun chu Jisuan an ziangah hi ṭongrikhek hih â sîr a. 8“Mîn rinei ruaiṭheah nangni an fialin, ṭhungmun iṭhaah iṭhung no rei; nin nêka milian ual an fialin chu,#Thuv.25:6,7; Lk.20:26. 9inchongpu khah ni zianga hongin, ‘Ama ṭhungmun hi iken roh,’ tîng a ta, mâimôk takkan ṭhungmun ṭhano takah iṭhung duai ni ti. 10Kha nêkan, nang an fialin chu ṭhungmun ṭha no takah iṭhung inla; khanchu, a chongpu khah hong a ta, ni ziangah, ‘Mala, mun iṭhaah hong iṭhung roh,’ tîng a ta, khangkan mipuihei makungah marit lông ni ti. 11Om iliankah tlôm an ta, om itlômkah chu inlutin om an ti,” a ti a.#Mat.18:4; 23:12; Lk.18:14; 1 Pet.5:6.

12Jisuan ama fialtu ziangah khom, “Sûna manih, zâna manih, ruai ne ṭhe tikin chu ni malhei manih, ni urênghei manih, ni suapuihei manih, ni bunga richonghei manih kha fial no roh; khanonchu, nang fial nôk an ta, nang thung nôk an ti. 13Ruai ne ṭhen chu inrianghei, piangsualhei, kebâihei, mitdelhei fial lem roh.#Lk.14:21. 14Khanchu, ṭhatvurna dong ni ti, nang tuakna rang nei khâi no nia; mi felhei thoinôknaah khan Pathianin nang tuak a ti,” a ti pêk a.

Ruaiṭhe roinpui ṭongrikhek

(Mat.22:1-10)

15Khante, a khalai rikhîlpui khatkah khan a thu sîr khah a riat a, a ziangah, “Pathian Rama ruaiṭhe fah ranghei chu an ham a ṭhat vang na!” a ti a.#Thuv.19:9.

16Jisuan a ziangah, “Mi khatkan ruaiṭhepui a siam a, mi tam takkah a fial a, 17a fâk zoro tikin chu a mi fialhei ziangah, ‘Hong ta rei, tinrêng inrifûk diam a nit tâk,’ iti rangin â som a tir a. 18Khante, an rêngkan riphialna an lei nei chit a. A masa tak khan, ‘Loi ker chôk a, â en ki fe ai nang a nit, arngai ne lei thiam ta riseh,’ a ti a. 19Mi dangin, ‘Serâtchal bop ringakah ker chôk a, â en infel rangin ki fe ai nang a nit, arngai ne lei thiam ta riseh,’ a ti a. 20Mi dangin, ‘Nupui ki nei zoi phing a nit a; khasikin, kî hong thei ino rang kêng,’ a ti a.#Dn nik.24:5; 1 Kor.7:33. 21Khante, isom khah a hong kîr nôkin chu a pu â ril a. Inchongpu khah a ning a thik tâk a, â som ziangah khan, ‘Fe vak vak inla, kotsuaheiah, kongkârheiah fen la, inrianghei, piangsualhei, mitdelhei, kebâihei hin hong ṭhui inlût roh,’ a ti a. 22Khante, isom khan, ‘Epu, ni thupêk angkah khan itho a nit tâk a; khanniseh, mun iôl a la om mai,’ a ti a. 23A pu khan a ziangah, ‘Fe nôk inla, lamilian heiah neh lamkêm heiah khan fen la, mihei chu ki in sipna rangin hong ṭhui inlût roh. 24Nang ke ril, Ki mi fialhei tutên ki ruaiṭhe khah fah no nih’ a ti,” a ti a.

Jisua zui intak dân

(Mat.10:37-38)

25Voikah chu mipui itam takkah Jisua ziangah an fe sa a, an tiang a ngat a, an ziangah, 26“Tutu ki zianga hong murdi kan an nu hei, an pa hei, an nupui hei, an nai hei, an urêng hei, an far hei, neh, ama takpum ten nêkan khom lung an ne thlung ual non chu ki kôilôm ni thei no nih. 27Tutu mahni kros riputa ne zui ino chu ki kôilôm ni thei no nih. #Mat.10:38; 16:24; Mk.8:34; Lk.9:23.

28“Nin lâia tukhôk manih hin inrisâng isin tum sela, iṭhungin a sin zoina rang sum a nei neh neino ngaitua bak a ti. 29Lungphûm a phûm nungin zoi thei ta no sela, â mu murdi kan, 30‘Hi mi hih chu in isin a phut a, ai zoi thei khâi ino a nit hiteh o,’ itin nuiso an ti.

31“Khante, rêng khom, a sipai sîngkah iṭhuiin rêng dang sipai sîng inika nei amah hong idoi ranga zuang khah a ngam rang neh a ngam no rang tûm iṭhunga â ngaitua bak ino rang? 32A ngam no rangin chu ilah takkah a la om lâiin ringeina thu sîrpui rangin a ziangah palâi tir ngêt a ti. 33Khaangkan nangni lâia mi tukhom ai nei murdi a mâk riai non chu ki kôilôm ni thei no nih.

Ichi al khâi ino mangmunboi

(Mat.5:13; Mk.9:50)

34“Ichi hi a ṭhat a; khannisela, ichi khah a alna boi ta sela, in-al nôk thei ni khâi mak. 35Rinêng rang khomin ṭha khâi mak a, irînniknaa pol rang khomin ṭha khâi mak e; ipai rang bang a nit tâk. Ikuar nin neiin chu ringai rei,” a ti a.

Currently Selected:

LUKA 14: BIATBSI

Highlight

Copy