JOHANA 21

Kôilôm sarikahei ziangah ân lâr

1Kha rizoiin chu Jisua kha Tiberia dîlah a kôilômhei ziangah ân lâr nôk a. Hingka hin a înlâr a nit. 2Simon Petera hei, Thoma (Phîra an iti) hei, Galili ram Kana kho mi Nathanaela hei, Zebedaia naipa inikahei neh a kôilôm dang inikahei kha munkan an ribuk a. 3Simon Petera khan an ziangah, “Inga man rangin fêng ki ti,” a ti a.

Anni khan a ziangah, “Keini khom ni ziangah zuang sâng kin ti,” an ti a. Khanchu, rikuangin an fe tâk a; nikhomseh, kha zânah khan chu îte man mak a. #Lk.5:5.

4Inî a hong suakin chu Jisua kha vakôlah a hong iding a; khannisela, kôilômhei khan Jisua a nit iti reh mak a. 5Jisuan an ziangah, “Tlangvâlhei, nin man im?” a ti a.

Anni khan, “Ite man mang ung e,” itin an sâm a.

6Ani khan an ziangah, “Rikuang changtiangah khan dêng unla, man nin ti,” a ti a. Khanchu, an zuk dêng a, inga an man intam rai sikin rikuangah kâiisua thei khâi mak a.

7Kôilôm Jisuan lung ai thlung khan Petera ziangah, “Pumapa kêng a nit so te,” a ti pêk a. Khante, Peteran Pumapa a nit iti a riatin chu a zakua khah a vong a, koronga lei iom a nit a, tuiah archôm tâk a. #Joh.13:23. 8Kôilôm danghei chu rikuangin vakôlah an hong a, inga sip ngit kan lên khah an kâi isua a, imuanga rithoka lah rak ino, mûk rizanikah vêl banga om an nit a. 9Vapang an hong suakin chu rihola sêm mei, a chunga inga om neh ibai khah an mu a. 10Khanungchu, Jisuan an ziangah, “Atûn lelea nin inga man khah ṭhenkah hin hong chôi ta u,” a ti a.

11Simon Petera kha rikuangah a va chuang a, lên khah inga lianpa pa sipin imuangah a kâiisua a, a rêngkan rizalei sômringakah ithumkah a nit; kha dôr inga tam khom seh lên khah ai ṭet ino a nit. 12Jisuan an ziangah, “Hong unla, fah rei,” a ti pêk a. Kôilômhei lâia tute khomin “Tûm nî nit?” iti ridon ngam mak a. Pumapa a nit iti an iriat infel a nit. 13Khanchu, Jisua kha a fe a, ibai a lâk a, a ziangah a pêk a, inga khom khangkah ngirin a sem pêk nôk a.

14Amakhah Jisua mithi lâia rithoka kâiithoi a nit nunga a kôilômhei zianga ân lâr a voi thumna a nit.

Jisua neh Petera

15An fâk zoiin chu Jisuan Simon Petera ziangah, “Simon, Johana Naipa, hihei nêkah hin lung ni ne thlung ual im?” a ti a.

Ani khan a ziangah, “O, Pumapa, lung nang ki thlung iti ni riat,” itin a sâm a.

Jisuan a ziangah, “Ki beratehei ifâ roh,” a ti a. 16A voi niknan Jisuan a ziangah, “Simon, Johana naipa, nangman lung ni ne thlung im?” a ti a.

Ani khan a ziangah, “O, Pumapa, lung nang ki thlung iti ni riat,” itin a sâm nôk a.

Jisuan a ziangah, “Ki berahei donsui roh,” a ti a. 17A voi thumnan Jisuan a ziangah, “Simon, Johana naipa, nangman lung ni ne thlung im?” a ti a. A voi thumnaah, “Lung ni ne thlung im?” a ziangah a ti sikin Petera ringai a siat tâk a.

Khanchu, a ziangah, “Pumapa, tinrêng ni riat a, lung nang ki thlung iti khom ni riat,” a ti a.

Jisuan a ziangah, “Ki berahei ifâ roh. 18Thudik tak nang ke ril; ni naipang lâiah khan chu ner siama, kongkhit ni khit a, ni nuamna tiang tiang ni fe thei ngai a. Khanniseh, ni ûnlian tenan chu ni kuthei phar ni ta, mi dangin ni kong nang khuap pêk an ta, ni nuam nona tiang tiang nang ṭhui an ti,” a ti a. 19Petera kha ingkana thina tongin im Pathian roinpuina a la înlang rang iti riatna ranga kha thu khah a îsîr a nit. Kha rizoiin chu Jisuan a ziangah, “Ne zui roh,” a ti pêk a.#2 Pet.1:4.

Jisua neh kôilôm lung ai thlung

20Khante, Petera kha nungtiang a hei rihêlin chu kôilôm dang Jisuan lung ai thlung, zânbu an nêk lâia Jisua tiang hei ri-ôn a, “Pumapa, nang inmantu rang chu tûm ai nit?” itia ridontu khan a hong zui a mu a. #Joh.13:25. 21Peteran ani khah a mun chu Jisua ziangah, “Pumapa, a ni rêk soh teh im a tho rang?” itin ardon a.

22Jisuan a ziangah, “Ki zuang nôk mâka ring mai rangin nuam ngân inlang im ni lo rang? Ne zui zel roh,” itin a sâm a.

23Khante, kha kôilôm khah thi no nih itin Jisua zuihei lâiah ân thang tâk a. Khannisela, Jisuan thi no nih ti mak a, “Ki zuang nôk mâka ring mai rangin nuam ngân inlang im ni lo rang?” kêng ai ti ai nit.

24Kha kôilôm khah hi thu retu neh riziaktu a nit a; a thu sîr khom â dik a nit iti ei riat.

Thukhârna

25Jisua sintho a dang itam takkah a la om a. Khahei murdi khah riziak vang rang ni ta sela chu, lekhabu riziaka om rang kha rammualah khom ikeng rangin inrihoi mang e.

Currently Selected:

JOHANA 21: BIATBSI

Highlight

Copy