JOHANA 12

Bethania Jisua siriak namhoi inôt thu

(Mat.26:6-13; Mk.14:3-9)

1Khante, Kalkan Kût rang sûn rukka matonah, Jisua khan thina rithoka ai kâiithoi Lazara omna Bethani khuah a fe a. 2Amakhan ama ta rangin kholoi bu nêkna an inrifûk a, Marthi khan khalai rikhîlhei khah bu-an a sem pêk a, Lazara khom Jisua bukhêng iotpuihei lâiah a ṭang a. 3Khante, Marin nard siriak namhoi, man ilu tak, kilâtkah #12:3 Rom.mihei tui ritânah kilât, gram 324 vêl ikeng a nit. a hong chôi a, Jisua ke â nôt a, a ke khah a samin a rûk pêk a. Khanchu, kha siriak namhoi inam khan in pumpui khah a sip riai tâk a.#Lk.7:37,38.

4Khante, a kôilômhei lâia khatkah, Juda Iskariota, amah ân man rangtu khan, 5“Ithôm hi siriak namhoi hih duli rizathumka zuarin inrianghei ziangah an pêk no hi?” a ti a. 6Kha ṭong khah inrianghei a uksak sika ai ti ni mak a, inru a nit sika a nit. Kha mi khan sumkok â kol a, a sunga sum khah ama ta rangin ai lâk ngai a nit.

7Khanniseh, Jisuan, “Inbuai no rei, a thil nei hih iphûma ki om nî-a rangin rê riseh. 8Inrianghei chu nin lâia om mai kêng an init, kei chu nin ziangah om mai no ning e,” a ti a.#Dn nik.15:11.

Lazara ithat an tum

9Khante, Juda mi itam takkan Bethani khuah Jisua a om iti an riatin chu kha munah khan an hong a; Jisua mu nuam banga hong ni mak a, Jisuan thina rithoka ai kâiithoi Lazara mu khom an inuam a nit. 10Khanchu, thiampu lalhei khan Lazara khom khah ithat an tum tâk a, 11ama sikin Judahei itam takkan anmani an heng a, Jisua an iam tâk sikin.

Jerusalema inlal takka a lût thu

(Mat.21:1-11; Mk.11:1-11; Lk.19:28-40)

12Atûkah khan Kûta hong mipui itam takkan Jisua Jerusalemah hong a ti iti an riat a, 13itûm ibânhei an chôi a, ama don rangin an fe a, “Hosana, Pumapa riminga zuang chu inpâkin om riseh, Israel Rêng chu inpâkin om riseh,” itin an ipâi a.#Lap.118:25,26.

14Jisuan sakuartung a mu a, a chungah a chuang a, Pathian Thubu-a,

15“Ṭi no roh, Zion nainu,

En ta, ni rêng chu a hong e,

Sakuartungte chunga chuangin,”

iti riziak angkah khan.#Zak.9:9.

16Kha thu khah a kôilômhein a phutah khan chu rethiam mak a; nikhomsela, Jisua chôiinrisânga a om zoi tenan chu Pathian Thubûn ama chungchâng a lei irziak a nit iti neh a chungah khangkah khan an lei itho a nit iti an riat tâk a.#Mk.9:32; Joh.2:22.

17Khante, Jisuan Lazara ithlân ata a koi isua a, thina rithoka a kâiithoi lâia mipui iomhei khan kha thu khah an lei isîr mai tâk a. 18Kha sinrikhêl khah ai tho a nit iti an riat sikin mipuihei khan an lei idon a nit. 19Farisaihei khan, “En ta u, îte chang khâi mang meh; en rei, rammual pumpuiin amah kêng an izui tâk hi,” an ti a.

Grik mi ṭhenkan Jisua an zong

20Khante, Kût lâia Pathian chubai iûn ranga Jerusalema honghei lâiah khan Grik mi ṭhenkah an om a. 21Khahei khah Galili rama Bethsaida kho mi Filipa ziangah an fe a, “Epu, Jisua mu kin nuam,” an ti a.

22Filipa khan Andria a va ril a; khanchu, Filipa neh Andria khan Jisua an va ril a.

23Khante, Jisuan an ziangah, “Miriam Naipa chôiinrisânga a om zoro a tlung tâk.#Joh.13:1; 17:1; Mk.14:25,41. 24Thudik nangni ke ril; Far mal rinêngah a tlâka a thi non chu, armalin a om ṭian ngai a; a thi bangin kêng irâ itam takkah a îsua ngai.#1 Kor.15:36. 25Tukhom mahni ringna inpâmtu khan ichân a ta, tukhom hi rammuala mahni ringna neltu khan kumtluang ringna nei mai a ti.#Mat.10:39; 16:25; Mk.8:35; Lk.9:24; 17:33. 26Tukhomin ki sin itho a nuamin chu ne zui riseh, ki omnaah ki sin ithotu chu om sâng a ti. Tukhom ki sin itho chu ki Pan chôiinrisâng a ti.

Jisuan a thi rang thu â sîr

27“Atûnah hin ke lung a kâng tak tak, im ki ti rang tâk? ‘Epa, hi zoro hih ki chungah ne thlun pêk no roh,’ kî ti rang mani? Khanniseh, hi thil ituang rang pial hi ki zuangna bi chu a nit.#Mat.26:38; Mk.14:34; Joh.11:33. 28Epa, ner ming #12:28 Mss ṭhenkatah ‘Naipa,’ ti a nit. chôiinrisâng roh,” a ti a.

Khanchu, rivâna rithokin rôl a zuang suak a, “Ki chôiinrisâng tâk, la chôiinrisâng nôk ki ti,” a ti a.

29Kha muna, mipui idinghei khan rôl khah an riat a, an lâia ṭhenkan, “Khuarî a nit,” an ti a; ṭhenkah nôkin chu, “Vântirtônin a îsôn a nit,” an ti a.

30Jisuan an ziangah, “Kha rôl khah keima ta ranga zuang isuak ni mak a, nangmani ta rang kêng ai nit. 31Atûn hih hi rammual chungchâng irêla a om zoro a nit; atûn hi rammual roirêltu hih ipai suak nîng a ti.#Joh.16:11. 32Khante, keimah rinênga rithoka ikhâi inrisângin ki om tikin chu mi tin ki tiang rikuai ki ti,” a ti a.#Joh.3:14; 8:38. 33Kha ṭong khah a thi rang tlia riat theina ranga a isîr a nit.

34Mipuihei khan an sâm a, “Mesia chu kumkhuantluangkan ring mai a ti iti kin Dân lekhabu khan a ne îril a nit. Ingkam nangman chu, ‘Miriam Naipa hih ikhâi inrisângin om a ti,’ nî ti thei? Miriam Naipa hih tûm ai nit?” an ti a.#Lap.110:4; Isa.9:7; Ezek.37:25; Dan.7:14.

35Jisuan an ziangah, “Ivâr hih itôitekah chu nin lâiah la om a ti. Ivâr nin la nei sungah hin lêng rei; khanchu, izîngin nangni de no nih; tukhom izînga lêng chu a fena reh ngai mak e.#Joh.7:33; 9:4; Efes.5:8; 1 Joh.2:11. 36Ivâr nin la nei sungah hin ivâr hih iam ta rei; khanchu, ivâr naihei nîng nin ti,” a ti a.#Lk.6:8.

Judahei iam nona

Kha thu khah Jisuan a ti zoiin chu a rot a, an mu thei nona rangah arbîk tâk a. 37An mitmua sinrikhêl itam takkah a sin nung khomin mipuihein amah iam mak a, 38Zânthla Isaian,

“Pumapa, kin thu sîr tûm â iam?

Pumapa ritha khom tu ziangâm a îlang?”

ai ti khah a hong tlung idik theina rangin.#Isa.53:1 (LXX); Rom.10:16.

39Hi sikah hin an iiam thei ino a nit, Isaia ngirin,

40“Pathianin an mit ân del pêk a,

An ilung khom ân cho pêk a,

An mitin a mu nona rang neh,

An lungrilin a riatthiam nona rangin.

Kha no ni sela chu, hong kîr nôk an ta,

Anni khah ki lei îndam rang a nit,”

itia a lei îsîr angkah khan.#Isa.6:10 (LXX); Mat.13:14.

41Isaian kha thu a îsîr khah Jisua roinpuizia a mu sikin a thurchi a îsîr a nit.

42Khangkah dôran khom Juda ulianhei lâia mi itam takkan Jisua chu an iam tâk a; nikhomsela, Farisaihei sikin isîr inlang ngam mak a; inkhôm in ata ûmisua an nit nona rangin.#Joh.9:22. 43Pathian ihamna nêkan miriam ihamna an înlut ual a nit.

Jisua ṭongbâi, roirêlna

44Jisuan rôl iring takkan, “Tukhom ne iam chu keima ne iam bang ni mak a, ne tirtu iam khom a nit.#Mat.10:40; Joh.5:24. 45Tukhom ne mu chu ne tirtu mu a nit.#Joh.14:9. 46Rammual invârtu ranga zuang ki nit, tukhom ne iam chu izîngah om mai no nih. #Joh.8:12; 9:5. 47Tukhom ki thu sîr irian zôm no khom sela, keiman chu thiamno inchang no ning e. Rammual thiamno inchang ranga zuang ni mang a, rammual saninring ranga zuang kêng kî nit. 48Tukhom keima ne heng a, ki thu sîr pom ino chu ama chungthu rêlpêk rang khatkah a nei. Ki thu sîr ngêi khah sûn nungkhônah chu a chungthu rêlpêktu la nîng a ti.#Mat.10:14,15. 49Keima iphuatotin îte isîr ngai mang a, ne tirtu, ki Pa khan ki ti rang neh ke sîr rang thu a ne ipêk ngai a nit. 50Ama thupêk chu kumtluang ringna a nit iti ki riat. Khasikin, thu ki îsîrhei hih Pan a ne ril lam angkah takin ki îsîr a nit,” a ti a.

Currently Selected:

JOHANA 12: BIATBSI

Highlight

Copy