JOHANA 10

Berapu ṭongrikhek

1Jisuan, “Thudik tak nangni ke ril, mi tukhom bera rikul kotbâiah lût loia, mun danga luia lût chu inru neh mi that ngai a nit. 2Kotbâia lût khah berapu chu a nit. 3Kotbâi ingâktu khan ani khah kotbâi a lei iong pêk ngai a; berahei khomin a rôl an riat a, ama berahei chu an riming chitin a koi a, a ṭhui isua ngai. 4Ama ta murdi a ṭhui isua zoiin chu an ma â ruai a, berahei khan a rôl an riat sikin amah an zui ngai. 5Mi dang chu tute zui no nih, izui nêkan itlân pêk pat an ti; a rôl an riat no sikin,” a ti a.

6Hi ṭongrikhek hih Jisuan â sîr pêk a; nikhomsela, a thu sîr omzia khah reh thei mak a.

Jisua berapu ṭha

7Khanchu, Jisuan an ziangah thu â sîr nôk a, “Thudik nangni ke ril, keimah hi berahei kotbâi ki nit. 8Ki matona lei izuang murdi kha chu inru neh mi that ngai an nit a, berahei khomin an thu zôm mak. 9Keimah hi kotbâi chu ki nit. Tukhom keimaa lût chu izôkriamkan om an ti; lût an ta, suak an ta, lêngna mun khom mu sâng an ti. 10Inru chu iruh rang neh mi that rang neh iseh rang bangin kêng ai hong ngai. Kei chu ringna nin neina rang, itam takkah nin neina ranga zuang ki nit.

11“Keimah hih berapu ṭha ki nit, berapu ṭha khan berahei ta rangin a ringna a pêk ngai. 12Rilo mi, berapu dik ni no, berahei khom a ta ni non chu inia hong a mu kaneh chu berahei a mâk rak a, â tlân pat a, inia khan berahei chu a sê a, â chekindar chit ngai. 13Rilo mi a nit a, berahei a uksak no sikin a îtlân pat ngai a nit. 14-15Keimah hi berapu ṭha ki nit. Pan a ne iriat neh keiman Pa kî riat angkah hin, ki berahei chu ki riat a, anni khomin an ne iriat a nit. An ta ranga thi khom kî huam a nit.#Mat.11:27; Lk.10:22. 16Hi bera rikula om ino bera dang khom ki nei; annihei khom la hong ṭhui sâ ngêt ki ti. Ki rôl khom ringai an ta, rikula om berahei neh an rêngkan berapu khatka nuaiah lôm khatkan om tâng an ti.#Isa.56:3-7; Joh.11:52; 17:20; Efes.2:13-18.

17“Ilah nôk ranga ki ringna ki pêk rang sikin Pan lung a ne ithlung a nit. 18Tutên ki ringna hih ne lah pêk thei no nih. Keima richamin kî pêk rang a nit. Â peh thei ki nit a, â lah nôk thei khom ki nit. Amakhah itho ranga ki Pa thu ne pêk chu a nit,” a ti a.

19Kha thu sikah khan Judahei lâiah inṭhenna a hong om nôk a. 20An lâia mi itam takkan, “Ramrili imana ân vêt a nit. Ithôm a ṭong nin irngai pêk?” an ti a.#Joh.7:20; 8:48; Mat.11:8.

21Mi ṭhenkan chu, “Ramrili imanin chu hingkan ṭong thei no nih. Ingkan im ramrilin mitdel mit ân vâr pêk thei ranga?” an ti a.

Judahein Jisua an heng

22Khante, Jerusalemah Tempil Lan Inthar Nôkna Kût #10:22, ‘Lan Inthar Kût’ iti thei a nit. Tempil Lan Inthar Kût isîrna a nit. mang lâi a nit a, phalbi zoro tak a nit. 23Jisua kha Tempila Solomona thapukah khan arlong arlong a. 24Judahei a kôlah an hong ribûm a, a ziangah, “Itena sôt im lung-ôk rikâiin ni ne isia rang? Mesia ni nitin chu ifel takkan ne ril roh,” an ti a.

25Jisuan a sâm a, “Nangni ke ril tâk khate; khanniseh, ne iam mak chei. Ki Pa riminga sin kî thohei hin ki thurchi nangni a înriat a nit. 26Khannisela, ki bera nin nit no sikin nin iiam ino a nit. 27Ki berahein chu ki rôl an riat a; kei khomin anni chu ki riat a, an ne zui ngai. 28An ziangah kumtluang ringna ki pêk a, kumkhuakan thi tlak no nih; tutên ki kuta rithokin ne sut thei no nih. 29Anmani ne petu ki Pa chu tinrêng nêka roinpui ual a nit; ki Pa kuta om chu tutên sut thei no nih. 30Keimah neh Pa chu pumkah kin nit,” a ti a.#Joh.17:21.

31Khanungchu, Judahei khan ama dêngna rangin lung an rût nôk a.#Joh.8:59; 11:8. 32Jisuan an ziangah, “Pan isin ranga a ne ipêk sin iṭha itam takkah nin mitmuah ki sin tâk a, ki sinthohei lâia a îsik takah hin im lunga ne dêng nin itum hi?” a ti a.

33Judahei khan an sâm a, “Sin iṭha sin sikin lungin nang deng no ning ung; khanniseh, Pathian riming ne sîr insiat a, miriam inih chakka Pathiana ner be sikin a nit,” an ti a.#Lev.24:16.

34Jisuan an ziangah, “Nin Dân lekhabuah, Pathianin, ‘pathianhei nin nit a ti,’ iti riziak ni mak im a?#Lap.82:6. 35Pathian Lekha Thu chu kumkhuakan â dik a nit iti ei riat; Pathian thu tlungnahei ilua pathiantehei iti an nitin chu, 36keimah vâng chu Pan a ne iser inran a, rammuala a ne zuang itirah hin, ‘Pathian Naipa ki nit,’ ki ti sikah hin ‘Pathian ne sîr insiat,’ nin ne iti hi? 37Ki Pan isin ranga a ne inuam kî sin a nit non chu ne iam no rei. 38Khannisela, kî sin a nitin chu keimah nin ne iam no khoma, ki sinthohei ilua hih iam rei; Pa khah keimah-ah a om a, keimah Paah ki om iti nin riatinfel theina rangin,” a ti a.

39Jisua kha iman an tum nôk a; khanniseh, an kut ata a suak tâk a.#Joh.7:30; 8:59.

40Khante, Jisua khah Jordan râlah, Johanan matona mi baptisma a thona ngai munah khan a fe nôk a, kha munah khan a om mai tâk a.#Joh.1:28. 41Mi tam takkah a ziangah an hong a, “Johanan sinrikhêl îte sin mak e; nikhomsela, Johanan hi mi chungchâng a lei îsîrhei rêng rêng kha chu a îdik a nit,” an ti a. 42Khanchu, kha munah khan mi itam takkan amah an iam tâk a.

Currently Selected:

JOHANA 10: BIATBSI

Highlight

Copy