RIPHUTNA 41

Josefan Faroa rimangphan a rilfia pêk

1Kum inikah a vun nungah khan Faroa khan rimang a phan a. Armangah khan Nail vadung pangah khan a lei iding a. 2Vadunga rithoka khan serâtpui sarikah â ṭha, â tak mut mut hi an hong suak a, vadung rikam lâiluang bilah khan an hong lêng a. 3Kha nungah khan serâtpui dang sarikah inthir fer fer, â kông ngêi ngêi hih vadunga rithok ngirah khan an hong suak nôk a, serâtpui danghei kôla vadung pangah khan an hong iding a. 4Serâtpui inthir fer fer, â kông ngêi ngêi hei khan serâtpui dang iṭha tak tak, â tak mut muthei kha an fâk zoi vang tâk a. Faroa khah a ṭhang rak tâk a. 5A hang in nôk a, rimang a phan nôk ngir a; bu kung khatkah hin vui sarikah â lian iṭha, â bit tak tak hih a hong suak a. 6Kha nungah khan vui sarikah dang a kênda dâr dâr, khosak ithli lum isêm inchâr rim remhei hih an hong suak nôk a. 7Bu vui ida dâr dâr tehei khan bu vui ilian tak tak, â ṭha tak tak sarikahei khah an ilem zoi riai a. Khanungchu, Faroa khah a hong ṭhang a; armang phan a nit iti a riat a. 8Atûk zîngah khan chu a lungril a buai ok tâk a; khanchu, mi a tir a, Aigupta rama mitvaidôi ithiam murdi neh mi vâr murdi khah a koi bûm a. Faroa khan armang phan khah a lei isîr pêk a; khanniseh tute â rilfia pêk thei zel omak a.#Dan.2:2.

9Kha lâi takah khan uain ipe ngai ruaitu tak khan Faroa ziangah, “Vuanah hin ke sualzia ki riat suak tâk. 10Voikah chu, Faroa khah a suakhei chungah a ning a thik a; khanchu, vêngtu pôl ruaitu inah khan keimah neh ibai isiam ruaitu tak khah a ne khum a. 11Zânkah chu kin ruaikan rimang kin phan seng seng a, omzia dang seng seng inei a nit a. 12Kha munah khan kin ziangah vêngtu pôl ruaitu som, Hebrai mi, tlangvâl khatkah a om a. Ani khah kin rimang phan chu kin iril a; khanchu, kin rimanghei khah a ne rilfia pêk a; kin rimang phan lam angka takin a ne irilfia pêk seng seng a nit. 13A ne rilfia pêk lam angka takin a hong iom tâk a nit; kei chu ki sin hih ni nen zom nôk a; nikhomsela, ibai isiamtu khah chu ni îkhâi that tâk a nit,” a ti a.

14Khanungchu, Faroa khan Josefa khah mi ân koi zel a. Khanchu, rimot takkan rip sung ata khah an hong ṭhui suak a. A nermulhei a voi infâi a, a silbomhei a thleng zoiin chu Faroa ziangah a hong rilang tâk a. 15Faroa khan Josefa ziangah, “Rimang ki phan a, â rilfia thei tute omak a, nangman chu rimang thu khah ni riatin chu ni rilfia thei iti ni thurchi mi îsîr ki lei riat a,” a ti a.

16Josefa khan Faroa khah a sâm a, “Amakhah keiman chu thei mang e; nikhomsela, Pathianin Faroa rimang kha idik thapkan rilfia pêk a ti,” a ti a.

17Faroa khan Josefa ziangah, “Ker mangah khan Nail vadung pangah hin ki lei iding a. 18Serâtpui sarikah â ṭha, â tak mut mut hih vadunga rithoka khan an hong suak a, lâiluang bilah khan an hong lêng a. 19An inung zelah khan serâtpui dang sarika inthir fer fer, â kông ngêi ngêi hih an hong suak nôk a. Khangkah dôra kông serâtpui kha Aigupta ram pumpui khomah hin ki lai mu ngai ino a nit. 20Serâtpui â kông ngêi ngêi, inthir fer ferhei khan serâtpui, â tak mut mut lei hong suak masahei khah an fâk zoi vang a. 21Nikhomsela, an fâk zoi nung khomah khan an fâk iti ireh thei ual ni mak a; a tîra angka khan an la kông fer mai a. Khanchu, ki ṭhang tâk a. 22Ki hang in nôkin chu rimang ki phan nôk a, bu kung khatkah hin vui sarikah â lian iṭha, â bit tak tak hih a hong suak nôk a. 23Kha nungah khan bu vui sarikah a kênda dâr dâr, khosak ithli lum isêm inchâr rim remhei hih an hong suak nôk a. 24Bu vui ida dâr dârtehei khan bu vui iṭha tak takhei khah an ilem riain ki mu a. Khante, ker mang khah dôipuhei khah ke sîr pêk a; nikhomsela, nê rilfia pêk thei tute omak e,” a ti a.

25Josefa khan Faroa ziangah, “Faroa rimang hi omzia thumun a nit. Pathianin a thil tho rang khah Faroa a lei înriat a nit hih. 26Serâtpui sarika â ṭha, â tak mut muthei khah kum sarika entîrna a nit a. Bu vui sarika â lian iṭha tak takhei khom khah kum sarika entîrna a nit sa; a omzia chu munkah a nit. 27An inunga serâtpui sarikah inthir fer fer, â kông ngêi ngêi hong isuakhei kha kum sari ṭâm tlâk rang entîrna a nit a, bu vui sarika a kênda dâr dâr, khosak ithli lum isêm inchâr rim remhei khom khah kum sari ṭâmpui tlâk rang entîrna a nit. 28Ni zianga kî ti tâk angka khan, Pathianin a thil tho rang khah nang a lei înriat a nit hih. 29Ringai roh, Aigupta ram pumpuiah bubâl vâng zuak zuak kum, kum sarikah hong tlung a ta. 30Kha rizoiah khan ṭâmpui kum, kum sarikah hong om nôk a ti; khanchu, bubâl vâng zuak zuak kumhei khah Aigupta ramah hin ringil phar ni tâng a ta; ṭâmpui khan ram hih isehchit a ti. 31Ṭâmpui khah a natinsat rai sikah khan hi ramah hin fâknêk bei lâi kumhei khah ringil phar tâng an ti. 32Rimang omzia thumun ṭum inikah ni phanna chu Pathianin kha thil khah ân det a, sôt inoteah a zuang îthlun rang tina a nit.

33“Khasika khan atûnah hin mi khatka bengivâr tak, mi vâr tak zong suak inla, Aigupta ram chungah hin ruaitun siam roh. 34Khapenah, ruaitu danghei khom phun inla, kum ṭhat kum, kum sarika sungah khan Aigupta rama bu hih mun ringaka ṭhena mun khatkah khah bûm mai riseh. 35Khanchu, anni khan kha kum ṭhat kum hong itlung ranga bu murdi khah bûm khômin Faroa thunuaia om rangin khuaheiah khan bûm sela, vong inṭha khap riseh. 36Khanchu, ṭâmpui sika ram pumpui armang rip nona rangin bu khah ṭâm kum, kum sarikah Aigupta rama hong itlung ranga khan lei inrinna rang nîng a ti,” a ti a.

Aigupta ram optun Josefa iphun a nit

37Kha thu khah Faroa neh a milianhei murdi khan ṭha an ti lam tak a nit a. 38Khanchu, Faroa khan a milianhei ziangah, “Ani angkana Pathian rithla omna mi hi tute mu khâi no min e,” a ti a. 39Faroa ngir khan Josefa ziangah, “Pathianin khahei murdi khah nang ân riat sikin nangma angkana thil iria neh â vâr tute om no nih. 40Nangmah hih ki ram enkoltun nang phun ki ta, ki mipuihei murdi hih ni thu angka takin om an ti. Rêng ṭhungmuna ṭhung thu mâng mânga hin ni nêkan inlal ual ki ti.#TS.7:10. 41Atûnah hin Aigupta ram pumpui chungah ruaitun nang kî phun a nit,” a ti a. 42Khanungchu, Faroan a kut ata arming namna kutsabit khah a thuat a, Josefa kutah ân bun a. Puan zâirimia siam zakorfual ân hâk a, rângkachak rithei ân li a.#Dan.5:29. 43A sakor tâli ṭha tak â niknaah khan ân chuang a, a matonah khan, “Rikiang rei, rikiang rei,” itin an ikhêk a. Khangkah khan Josefa khah Aigupta ram pumpui chungah khan ruaitua phun a nit. 44Faroa khan Josefa ziangah, “Keimah Faroa ki nit; nikhomsela, nangma thu ni non chu Aigupta ram sungah hin tute an kut manih, an ke manih an ilek rang ni mak,” a ti a. 45Faroan Josefa riming kha Zafenat-Panea#41:45 Josefa riming ithar hi ‘Pathian a ṭong, Pathian a ring’ tina nîng a ti. a be a; Heliopolis khua thiampu Potifara nainu Asenathi#41:45 Josefa nupui riming hi Aigupta mihei pathiannu chu Nathu a nit a, kha riming ichôiin ‘Nathu ipêk’ tina a nit. khah nupuiin ân nei a. Aigupta ram pumpuiah Josefa kha an riat tâk a.

46Josefa khah Aigupta ram rêng Faroa sin a tho phutah khan kum sômithumka mi a nit a. Josefa khah Faroa ziang ata a suak a, Aigupta ram pumpui kha arfang suak tâk a. 47Kum ṭhat kum, kum sarika sung kha chu rinêngin itam takkan bu â sua ngai a. 48Kha buhei khah Josefan a bûm khôm a, khopuiheiah khan ân pang a; khua tinah khan an kôlvêl loia bu chit khah ân pang a. 49Josefa khan bu khah tuipuia ṭiai dôra tamin a buk a, rita zoi zat a nit khâi no sikin rita khom rita khâi mak a.

50Ṭâmpui hong tlung maah khan Josefan naipa inikah a nei a, khahei khah Heliopolis khua thiampu Potifara nainu Asenathi khan ai nei pêk a nit. 51Josefa khan a nai lutîr riming khah Manasea#41:51. Manasea hi ‘Inringila’ tina a nit. a sak a; “Pathianin ki dengtheina tin tin neh ki pa insunghei murdi khah a ne înringil tâk a nit,” a tina a nit. 52A nai â nikna riming khah Efraima#41:52 Efraim hi ‘Richiineia’ tina a nit. a sak a; “Pathianin ki dengthei tuangna ramah hin richi a ne înpung a nit,” a tina a nit.

53Aigupta rama kum ṭhat kum, kum sarikah hong itlung kha a hong hek tâk a. 54Ṭâmpui kum, kum sarikah kha Josefa sîr lam angka takin a hong tlung riphut nôk tâk a; ram tinah iṭâm a hong tlâk tâk a; Aigupta ram pumpuiah khan chu ifah rang a om mai a.#TS.7:11. 55Aigupta rama mi murdi khan an ṭâm kaneh Faroa ziangah ifah rang an ngên tâk a. Khanchu, Faroa khan Aigupta mi murdi ziangah khan, “Josefa ziangah fe unla; nangni a ti lam takkan sin rei,” itin thu a pêk a.#Joh.2:5. 56Iṭâm khah rammual pumpuiah khan a hong tlâk tâk a, Aigupta ramah khan iṭâm khah ân rik ual a. Khanchu, Josefa khan fasiar murdi khah â ong a, Aigupta mihei ziangah khan a zuar a. 57Rammual pumpuiah iṭâm khah a tlâk natinsat sikin ram tina mihei khah bu richoh rangin Aigupta ramah, Josefa ziangah khan an ihong ngai a nit.

Currently Selected:

RIPHUTNA 41: BIATBSI

Highlight

Copy