RIPHUTNA 34

Dinaii Sekeman a siatpui

1Sûnkah chu Jakoba neh Leaii nainu Dinaii kha, kha ram nungâkhei ipan rangin a va lêng suak a. 2Kha ram ilal khah Hiv mi Hamora a nit a. A naipa Sekema khan ani khah a lei mu a; khanchu, a mana a siatpui tâk a. 3Kha nungâk khah nungâk iṭha tak a nit iti a mun chu lung a thlung tâk a, ani khah ṭongbâi ithlum tak takin â sôn a. 4Sekema khan a pa Hamora ziangah, “Ama nungâk hih ki nupui rangin ne biak pêk roh,” a ti a.

5Jakoba khan a nainu Dinaii khah Sekeman ân nim iti a riat a; nikhomsela, a naipahei khah phûlah an ranhei ienkola an om lâi a nit a, an hong kîr mâkah chu Jakoba khah a dâirek a.

6Jakoba sôn rangin Sekema pa Hamora khah a hong a. 7Kha lâi takah khan Jakoba naipahei khah phûla rithoka khan an lei hong kîr tâk a, thurchi an riatin chu an ilung a sunin, an ning a thik tak tak a. Sekeman Jakoba nainu a lei isiatpui chu Israelhei lâia thil isual porinche tak, tho tlak iloi rang khah a tho tâk sikin idâirek chi ni mak a. 8Hamora khan ani khah â sôn a, “Ki naipa Sekema hin ni nainu chungah a lungril a om khap a. Ringaiihoi takkan nupuiin innei râm ta u. 9Khanchu, rinei risak ei ta; nin nainuhei nen nei unla, kin nainuhei khom nei sa rei. 10Khanchu, kin ziangah kin ramah om thei nin ta; nin nuamna tiang tiang om nin ta; zalen takkan rivai thông nin ta, sial-ui-ar khom vâi thei nin ti,” a ti a. 11Khanungchu, Dinaii a pa neh a ṭâpahei ziangah Sekema khan, “Lung nen kham ngêt unla, ki zianga nin iphût murdi chu nangni pêng ki ti. 12Man neh thilpêk chu nin ngên zâkah nin ti lam takkan nangni pêng ki ti; nupuiin nen nei ngêt rei,” a ti a.

13Jakoba naipahei khan an farnu Dinaii khah mualphoi a sak sikah khan Sekema neh a pa Hamora khah ivâr takkan an sâm a. 14An ziangah, “Sertan ino mi hih kin farnu innei thei no ning ung e, amakhah kin riming siatna rang a nit. 15Keimani angkan nin lâia ipa murdi ser nin tan riaiin chu nangni innei thei kin ti. 16Khanchu, kin nainuhei nangni innei kin ta; nin nainuhei khom nei kin ta, nin lâia omin, suapui urêng ei hong init rang a nit. 17Nikhomsela, kin thu nin zôm no a, sertan nin nuam non chu kin nainu chu ṭhui kin ta, fêng kin ti,” an ti a. 18Hamora neh a naipa Sekema khan an thil phût kha ṭha an ti a. 19Jakoba nainu khah â dit tak tak sikin tlangvâl khan an thu khah rivuak loiin a bôzui zel tâk a. Ani chu a pa insungkuahei lâia mihei imarit tak a nit a. 20Hamora neh a naipa Sekema chu an khua kulpui kotsuaah khan an fe a, an khua mihei khah an isôn a, 21“So mihei soh ner ngeipui irkan an om a; khasikin, hi ramah hin ei lâiah om sela, zalen takkan sum rivai tho riseh. Ringai ta u, an rang khomin ram iôl rizat tôk a om a. An nainuhei nupuiin nei ei ta, ei nainuhei khom nupuiin nei sa riseh. 22Nikhomsela, hi mihei hin ei zianga oma, suapui urêng ei hong nit theina rangin chu thil khatkah an tho lam angkana ei lâia ipa rêng rêng sertan an iphût ngit a nit. 23An ranhei, an sumhei, an ui-arhei murdi ei ta a hong init zit rang ni mak ima? An thu hih izoipui ei ti u; khanchu, ei ziangah an iom rang a nit,” an ti a. 24Hamora neh a naipa Sekema thu khah kulpui kotsuaa suak ngai murdihei khan an izoipui#34:24 Hebraiin Kul kotsuaa suak ngai’ iti a nit, sin itho thei. a; khanchu, ipa rêng rêng chu ser an tan korong tâk a. 25A sûn thumnî, an sertan a nat inrik lâi takah khan Dinaii ṭâ Simeona neh Levia, Jakoba naipahei ruai khan an khandai an chôi a, inrûkkan khua khah an lût a, ipa murdi khah an that vang a. 26Khanchu, Hamora neh a naipa Sekema khom khah khandaiin an sât that a, Sekema ina rithokin Dinaii khah an ṭhui a, an suak tâk a. 27Jakoba nai danghei khan mi an ithathei khah an va mun chu khua khah an irok tâk a, an farnu mualphoi an sak pêkna phuba khah an ilâk a nit. 28An berahei, an sialhei, an sakuartunghei, an khuaa thil iomhei, an loia thil iomhei khah an lâk pêk a. 29An sum neh puan murdihei, an nainetehei neh an nupuihei murdi khah an man a, an insunga om murdi khom an lâk pêk riai a. 30Jakoba khan Simeona neh Levia ziangah khan, “Ki chungah inkhôk nin îthlun a nit hih; atûn chu hi rama om Kanan mihei, Periz mihei neh mi tin tinin an ne inel rang tâk a nit. Keimah lakin mi nei intam mang a; ne doi rangin an ribûm a; an ne rûnin chu ei insungkua pumpui ei irmang rang a nit,” a ti a. 31Nikhomsela, anni khan, “Kin farnu hih nochizuar angkan an nuam nuamin an ompui rang ni mak e,” an ti a.

Currently Selected:

RIPHUTNA 34: BIATBSI

Highlight

Copy