RIPHUTNA 32

Esauva tong rangin Jakoba arfo

1Jakoba chu a fe thiai mai a, Pathian Vântirtônhei khan an lei ritongpui a. 2Anni khah a mun chu Jakoba khan, “Hi mun hih Pathian sipaihei riabuk a nit ngêt hih,” a ti a; khanchu, kha mun rimingah khan Mahanaim#32:2 ‘Ribuk (camp) inikah’ tina a nit. Hi mun hih ramrî a nit a, Pathian sipaihei hi munah hin ramrî rungin an iom a nit. a be a.

3A u Esauva kha Edom ramah a om a, Jakoba khan a matonah mi a tir a. 4Hingka hin thu archa a, “Ki rêngpa Esauva ziangah khan hingkan nin ti rang a nit, ‘Ni suak Jakoban hingka hin ai ti a nit: Labana ziangah khan ki hang om a; atûn tenan a ne la îtûk mai a nit. 5Sialhei, sakuartunghei, berahei, kêlhei, isom ipahei neh nupanghei ki nei tâk a. Ni mit ki tlung itûngin ki rêngpa ziangah ki thurchi ril rangin mi ki hong itir masa a nit,’ ti rei,” a ti a.

6A mi tirhei khah an hong kîr nôk a, Jakoba ziangah, “Ni u Esauva ziangah kin va tlung a, mi rizalikah hong iṭhuiin nang ritongpui rangin a lei ihong thiai tâk a nit,” itin an iril a. 7Khanungchu, Jakoba khan a ṭi a, â lung a dong tak tak a. Khanchu, a zianga mi omhei, a berahei, a kêlhei, a sialhei, a saringseihei khah lôm inikan a ṭhen a. 8“Esauva khah a hong a, lôm khatkah a that khom a, lôm khatkah kha chu la zôk thei an ti,” a ti a.

9Khanungchu, Jakoba khan, “O Pumapa, ki pu Abrahama Pathian, ki pa Isaka Pathian, ‘Nin ramah, nen zirpuihei ziangah kîr nôk ta roh; khanchu, nang siam inlian ki ti,’ ni ne ti a. 10Ni suak chunga lungkhamlianna ni înlang murdi neh iamomna ni înlang murdihei lâia hin, â chîntak khom hih dong inrup ni mang e; hi Jordan dung hih ke rol neh ringot ker kan a; atûn chu lôm inika ṭhen inrupin ki hong ikîr tâk a nit hih. 11Lung nen kham inla, ki u kut ata, ki u Esauva kut ata hih nen zôk roh; a nit non chu nunai rêngka a ne hong ithat rang hih kî ṭi a nit. 12Nangman, ‘Nang siam inlian ki ta, tuikhangliana ṭiai tep zoi loi dôra tamin ner chihei chu siam ki ti,’ ni ti a,” a ti a.#Riph.22:17.

13-15Khanchu, kha munah khan zân a riak a; a mîringhei lâia rithokin a u Esauva pe rang arthlang suak a: kêlpui rizanikah neh kêlchal sôminikah, berapui rizanikah neh berachal sôminikah, saringsei dût sôm lâi sômithumkah neh atehei, sialpui sômilikah neh sechal sômkah, sakuartungpui sôminikah neh sakuartungchal sômkah a khâi inran a. 16Khahei khah lôm tin a ran chitin a suakhei ân hôl a; an ziangah khan, “Ki matonah lei fe unla, lôm tin hih a kâr iom chitin hôl rei,” a ti a. 17A lôm masa tak ihôltu ziangah khan, “Ki u Esauva khan nang a lei tong a, ‘Tu mi neh sa tak im nî nit, taktianga fe rang im? Ni ran hôlhei hih tu ta tak im an init?’ itia nang ardonin chu, 18‘Ni suak Jakoba ta a nit; A pu Esauva ranga lomana peh ranga a ne înhôl a nit hih; ani khom kin inungah son a hong,’ ti roh dua,” a ti a. 19Khangkah ngirah khan lôm â nikna hôltu khom kha he a be a, â thumna pu neh ran lôm dang ihôltu murdi khom he a be chit a, “Khangkah takah khan Esauva nin mu tikin chu nin ti rang a nit. 20Khapenah, ‘Ni suak Jakoba khom kin inungah son a hong,’ nin ti sa ngêt rang a nit,” a ti a. Jakoba khan, “Thilpêkheiah hin a lungril indam ki ta; khanchu, amah ki mu tenan ne ngaidam ngêt a ti,” a ti a. 21A thilpêkhei khah ân fe masa a; kha zânah khan ani chu riabukah khan a riak a.

Penielah Jakoban mi arbuanpui.

22Kha zân ngirah khan a thoi a, a nupuihei ruai neh a bôinuhei ruai kha a nai sômleikhatkahei neh khan a ṭhui a, Jabok vadung khah ân rikan tâk a. 23Anni khah varâl â khâi zoiin chu ai nei murdi khom varâl â khâi sa riai a. 24Nikhomsela, ani chu a khât bangin nungah a la om a.

Khanungchu, mi khatkan khovâr idênin arbuanpui a.#Hos.12:3-4. 25Khanchu, mi khan Jakoba kha â ne khâi no ti a riatin chu â khelru rizomna khah â met pêk a, an ribuanaah khan Jakoba khelru rizomna khah a hong riphêt tâk a. 26Mi khan, “Ne thla roh, khua khom â vâr rang tâk kêng,” a ti a.

Jakoba khan, “Ṭhat ni ne vur mâkah chu nang ithla no ning e,” a ti a. 27Ani khan, “Im ner ming?” a ti a.

“Jakoba” a ti a.

28Mi khan, “Ner ming chu Jakoba nang ti khâi no nih. Pathian neh miriam ner buanpui a, ne nê tâk sikin Israela#32:28 Israel iti hih ‘Pathianin inzôk riseh, tina inin an ringai a. Ribuan iti hih a Hebrai ṭongin ‘sarita’ ti a nit a, an ruaika lâk rikopin, ‘Pathian ribuanpuitua’ itih thei a nit. nang ti tâng an ti,” a ti a.#Riph.35:10.

29Jakoba khan, “Ringaiihoi takkan ner ming ne ril roh,” a ti a.

Nikhomsela, ani khan, “Îtho rang im ker ming ni ne irdon hih?” a ti a. Khanungchu Jakoba khah ṭhat a vur a, a mâk tâk a.#Roi.13:17-18.

30Jakoba khan kha mun riminga khan Peniel#32:30 ‘Pathian mêl’ tina. a be a, “Pathian chu mâi ritongin ki mu a; nikhomsela, ki ringna hih izua a lai nit hih,” a ti a. 31Peniel a mâk tenan chu inî a hong suak tâk a, ani chu â khelru sikah khan a hong ibâi tâk a. 32Khasikin, atûn tenan Israela richihei khan khelru rizomna taka ritharui iom hih fah ngai mak, Jakoba khelru richinna taka ritharui khah a tôn pêk sika a nit.

Currently Selected:

RIPHUTNA 32: BIATBSI

Highlight

Copy