RIPHUTNA 26

Isaka Gerarah a om

1Abrahama dam lâia ṭâm itla ni no, kha ramah khan iṭâm a zuang tlâk nôk a. Khanchu, Isaka khah Gerar khuaah Filistiahei rêng Abimeleka ziangah a zu fe a. 2Pumapa chu Isaka ziangah a zuang inlâr a. “Aigupta ramah khan zu fe no roh; nang ki înmu ramah hin om roh. 3Hi ramah hin om inla; khanchu, ni ziangah om ki ta, ṭhat nang vur ki ta; hi ram murdi hih nangmah neh ner chihei ipen, ni pa Abrahama zianga ki ṭonginkung khah ki îndet rang a nit.#Riph.22:16-18. 4Rivâna ârsi zâkan ner chihei chu inpung ki ta, hi ram murdi hih ner chihei kî pêk rang a nit. Nangma richia rithokin rammuala nam tin hamṭhatna la dong an ti. 5Abrahaman ki thu a ôi a, ki thurilhei, ki thupêkhei, ki dânhei neh ken riseinahei a zôm sikin ṭhat nang kî vur rang a nit,” a ti a.

6Khanchu, Isaka kha Gerar khuaah khan a om mai tâk a. 7Kha khua mihei khan a nupui thurchi an ridon a; ani khan, “Ki farnu a nit,” a ti a; Rebeki khah a mêl a ṭhat sikin, “Hi khua mihei hin Rebeki sikin ne that duai an ti,” itin, “Ki nupui a nit,” ai ti ngam ino a nit. 8Kha khuaah khan isôt takkah a om nungin, Filistiahei Rêng Abimeleka khan tukvera rithokin a zuk thlîr a, Isakan a nupui Rebeki â riam lâi a zuk mu a. 9Khanchu, Abimeleka khan Isaka khah a koi a, “Ni nupui a nit ngêt hi te? Îtho sikin im, ‘Ki farnu a nit,’ ni ti hi?” a ti a.

Isaka khan a ziangah, “Ama sikin mîn an ne that duai lôiin iti ki ṭi sika a nit,” a ti a.

10Abimeleka khan, “Kin chunga ni thiltho hih ingka tliam ai nit tâk? Ki mihei lâia a tukhôk khom hin ni nupui hih a lei izâlpui thei duai kêng ai nit, khangkan ni ta sela kin chungah hin thiamnona ni zuang îthlun ai nit rang a nit,” a ti a. 11Abimeleka ngir khan mi murdi ziangah, “Tukhom hi mi hi manih, a nupui hi manih, â tôn kangân chu ithat ngêt rang a nit,” a ti a. #Riph.12:13; 20:2.

12Isaka khan kha ramah khan chi a chôi a, Pumapa khan ṭhat a vur sikin kha kumah khan a bâk rizakan a mu a. 13Khanchu, a vângsak a hong bei tîr tîr a, richong tak a hong nit tâk a. 14Bera lômhei, sial lômhei, isomhei a hong nei intam tak tak tâk sikin Filistiahei khan an narsa tâk a. 15Khanchu, a pa Abrahama dam lâia, a pa suakhein tuisunsua an ichoi murdihei khah Filistiahei khan an nêl a, ipilin an nêl insip zit tâk a. 16Khanungchu, Abimeleka khan Isaka ziangah, “Kin ziang ata hih rithon ta roh, keimani nêkan nî rât ual ok tâk a nit,” a ti a.

17Khanchu, Isaka kha khantak ata khah a suak a, Gerar phâiah om mun a khuar a, amakhan a om tâk a. 18Isaka khan a pa Abrahama dam lâia an tuisunsua choih, Abrahama thi nunga Filistiahein an lei inêl insiphei kha a choih nôk a; a pân riming a lei be lam angkah takah khan riming ân riput nôk riai a.

19Isaka suakhein an omna phâia tuisunsua an ichoiah khan tui a om inṭhat tak tak a. 20Khanchu, Gerar khuaa berapuhei khan, “Tui hih kin ta a nit,” itin, Isaka berapuhei kha an zuang rikhalpui a; khanchu, amah an zuang irkhalpui a nit sikin tuisunsua riming kha “Esek” (Rikhalna) a be tâk a.

21Tuisunsua dang an choih nôk a, kha khom khah isut itumin an rikhalpui nôk a; khanchu arming kha Sitna#26:21 ‘Vânirisâma ṭonginkungna tuikuang’ tina a nit. Tuikuang sarikah khom a nit (26:33.) (Ritûrna) a be nôk a. 22Khantak ata khah arthon a, tuisunsua dang a choih nôk a; amakhah chu isut itumin ringopui khâi mak a, arming kha Rehobot (Zalenna) a be tâk a. Khanchu, “Atûn chu Pumapa khan ei omna rang mun rizat tak a ne siam pêk tâk a, hi ramah hin vângsak tâng ei ti,” a ti a.

23Khan taka rithokah khan Beersebaah a hang rithon a. 24Kha zân ngêiah khan Pumapa chu a ziangah a zuang inlâr a, “Keimah hi ni pa Abrahama Pathian chu ki nit. Ṭi no roh, nang kî ompui mai a nit. Ṭhat nang vur ki ta, ki suak Abrahama sikin ner chihei chu itam takkan ki la înpung rang a nit,” a ti a. 25Khanchu, kha munah khan Isakan mâichâm a siam a, Pumapa riming arlam a. Kha munah khan a puan in a dâng a; â somhei khan kha mun khomah khan tuisunsua an choih nôk a.#Riph.21:22.

Isaka neh Abimeleka risôn rimunna

26Gerar khuaa rithokin Abimeleka khah a malpa Ahuzatha neh a sipai ruaitu Fikola ṭhuiin Isaka mu rangin an fe a. 27Isaka khan an ziangah, “Nin ne nel a, nin ziang ata nin ne ûm pai a, îtho sik im ki ziangah nin ihong hi?” a ti a.

28-29Anni khan, “Pumapa chu ni ziangah a om iti ifel takkan kin riat a; khasika khan, ni ningsiat kin isin ngai ino angkan neh thil iṭha ti no chu ni chungah îte rêng rêng tho loi a, iṭha takka nang kin înfe angka khan, keini khom kin siatna rang rêng rêng ni tho nona rangin ei kârah, keimani neh nangma kâr ngêiah hin ṭongrikhâmna om sela, ei kârah ringeina thuthlung ne thlungpui roh, kin iti a nit; atûnah hin nang chu Pumapa ṭhatvur idongtu ni hong nit tâk a,” an ti a. 30Isaka khan an rang ruai â ṭhe a; khanchu, an fâkin, an in tâk a. 31Atûk zîngah chu zîng takah an thoi a, ṭong an rikhâm seng seng a; Isakan anni chu â thla a; khanchu, rualrichanin an inṭhen tâk a.

32Kha nî ngirah khan Isaka somhei khah an hong a, an tuisunsua choiah khan, “Tui kin mu tâk,” an hong ti a. 33Khanchu, kha tuisunsua khah Seba #26:33 Seba tih hi Sarikah tina manih, Ṭongrikhâmna tina manih inia ringai a nit. ‘Itam, sîtipôk nang ino’ tina khom a nit thei. a be a; khasika khan kha khua riming khah atûn tenan Beerseba an lai ti a nit.

Esauvan nam dang nupuiin a nei

34Esauva chu kum sômilika mi a nitin, Hit mi Beeria nainu Judithi neh Hit mi Elona nainu Basemathi hei kha nupuiin a nei a. 35Kha mihei khah Isaka neh Rebeki lungril insôltu chu an nit.

Currently Selected:

RIPHUTNA 26: BIATBSI

Highlight

Copy