RIPHUTNA 14

Abraman Lota a sansuak

1Rêng ilîkahei: Sinar khua rêng Amrafela hei, Elasar khua rêng Arioka hei, Elam khua rêng Kedorlaomera hei, Goim khua rêng Tidala hei khan, 2rêng ringaka dang Sodom khua rêng Bera hei, Gomora khua rêng Birsa hei, Adma khua rêng Sinaba hei, Zeboim khua rêng Semebera hei, Bela khua rêng hei khah an hong rûn a. Bela khua chu Zoar a nit. 3Hi rêng ringakahei hih rizomna an siam a, Sidim phâiruam, atûna Tuipui Ithi an iti a khan munkan an ṭang rilom a. 4Annihei khah kum sômlei kum inika sung Kedorlaomera thu nuaiah an om a, a kum sômleiithumna a khan chu an irhel tâk a nit. 5Khanchu, a kum sômleiilina kumah khan Kedorlaomera neh a thun rualpui rênghei khah an sipaihei neh khan an hong a, Asterot-Karnaim khuaa Refaim mihei, Ham khuaa Zuzim mihei, Kiriathaim phâia Enim mihei, 6Edom tlânga Hor mihei khah El-paran idênin an ûm rizûl a, an rêngkan an rûn inê vang a. El-paran chu ramchâr idepa om a nit. 7Khanungchu, an kîr nôk tiangah khan Kades an iti tâk En-mispat tiang an rikual a, Amalekhei ram murdi neh Hazazon Tamara om Amorhei murdi an rûn infâi riai a.

8Khasika khan Sodom khua rêng hei, Gomora khua rêng hei, Adma khua rêng hei, Zeboim khua rêng hei, Bela khua rêng hei khan Sidim phâiruama ridoi rangin an sipaihei an bûm a, 9Khanchu, rêng ilika hei, Elam khua rêng hei, Goim khua rêng hei, Sinar khua rêng hei, Elasar khua rêng hei khah an doi tâk a. Rêng ringakan rêng ilîkah an idoi a nit. 10Sidim phâiruam khah alkatara khura sip a nit a; Sodom neh Gomora khua rênghei khah lâizâm an tho a, khurah khan an tlâk a; rêng dang ithumkahei kha chu itlângheia lâizâm an tho tâk a. 11Khanchu, rêng ilîkahei khan Sodom neh Gomora mihei thil nei murdi neh an bu bâl murdi an lâk vang a, an rot tâk a. 12Abrama naipa Lota, Sodom khuaa om khom khah, a neinun murdi an lâk pêk banah amah khom an ṭhui sa a.

13Nikhomsela, mi khatkah ridoina ata lâizâm itho khan Hebrai mi Abrama khah thil tinrêng â ril a; kha lâiah khan Abrama chu Mamrea saso kung kôlah a om a. Amor mi Mamrea chu a unaihei Eskola neh Anera neh an inthumkan Abrama risanpuihei an nit a. 14Abraman a unaipa nai Lota khah suakin an ṭhui iti a riatin chu a ina om, risual ithiam mi rizalei sômleiiriatkah a ṭhui suak a, Dan khua dênin rêng ilîkahei khah an rizûl tâk a. 15Kha munah khan amah neh a mihei khah a lôm lômin an inṭhen dar a, an irâlhei khah zânah an rûn a, an that tâk a. Khanchu, Damaska khua mâr tianga om Hoba khua dênin an ûm rizûl a. 16Neinun an lei ilâk tâk murdihei khah an lâk kîr nôk riai a. A unaipa nai Lota neh a neinunhei khom an hong lâk kîr nôk a, nupanghei neh suak an iṭhuihei murdi khom an hong ṭhui kîr nôk riai a.

Melkisedekan Abrama ṭhat a vur

17Abrama khah Kedorlaomera neh a thunrualpui rêng danghei inê zoia a hong kîr nôkah khan Sodom rêng khan Save phâiah khan a lei don a; Save phâi khah Rêng Phâi khom an ti ngai. 18Salem rêng Melkisedeka#14:18 Salem khua hi ‘khua hoi, râlringam iom’ tina a nit, Jerusalem riming dang a nit. Lap.76:2-a an rêng riming Melkisedeka ti hi ‘Rêngdika’ tina khom a nit. khomin ibai neh uain ichôiin Abrama khah a lei don sa a; ani khah Pathian Chungnungtaka thiampu a nit a.#Heb.7:1-10. 19Ani khan Abrama kha ṭhat a lei vur a, “Rinêng neh rivân isiamtu Pathian Chungnungtaka khan Abrama hi ṭhat vur riseh. 20Ne râlhei chunga nêna nang ipetu, Pathian Chungnungtaka chu inpâkin om riseh,” a ti a. Abrama khan Melkisedeka chu a râllâk neinun murdia rithokin sômka khatkah a pêk a.

21Sodom khua rêng khan Abrama ziangah, “Ki miriamhei hih ne pe kîr inla, neinunhei hi chu nangman dong roh,” a ti a.

22Nikhomsela, Abrama khan Sodom khua rêng ziangah khan, “Rinêng neh rivân isiamtu Pumapa Pathian Chungnungtaka#14:22 Melkisedekan ai biak ngai Pathian chu ‘Pathian Chungnungtaka’ (El-elion) itin a îsîr a. Abrama hin chu a Pathian biak kha ‘IAHUA Pathian Chungnungtaka’ itin a îsîr kher a nit, (PUMAPA El-elion). An Pathian biak hi munkah a nit im sîr infel ni mak. A ir-ang ino nîng a ti. ziangah ki irkhâm a nit, 23‘Pat zâi khatka te khom, pheikok rui khatka te khom, ni ta rêng rêng la no ning e,’ khanonchu, ‘Abrama khah keima înrichong im ki ta,’ ni ti duai lôiin. 24Khasikin, ki mihein an lei ifâk tâk neh an lei imang tâk ti no chu îte la no ning e. Nikhomsela, Anera hei, Eskola hei, Mamrea hei khan chu an dongtum khah la riseh,” a ti a.

Currently Selected:

RIPHUTNA 14: BIATBSI

Highlight

Copy