RIPHUTNA 10
10
Nova naipahei richi
(1 Rich.1:5-23)
1Amahih Nova richi zuang risui dân thurchi chu a nit. Nova naipahei Sema, Hama neh Jafeta hei khan tui lian nungah khan naiipahei an nei a.
2Jafeta naipahei chu: Gomera, Magoga, Madaia, Javana, Tubala, Meseka, Tirasa hei an nit. 3Gomera naipahei chu: Askenaza, Rifata, Togarma hei an nit. 4Javana naipahei chu: Elisa, Tarsisa, Kitima, Dodanima hei an nit. 5Annihei khah tuipui rikama om mihei neh tuihuala om mihei chibul chu an nit. Khahei khah Jafeta richihei, anmani nam chita om a, anmani ram chit ilua a, anmani ṭong chit imanga omhei chu an nit.
6Hama naipahei chu: Kusa, Mizraima, Libia, Kanana hei an nit. 7Kusa naipahei chu: Seba, Havila, Sabta, Raama, Sabteka hei an nit. Raama naipahei chu: Seba neh Dedana an nit. 8Kusa khan naiipa Nimroda a nei a; kha mi khah rinêng chunga mi rât inthang tak a nit. 9Pumapa iṭangpuiin ani kha kut inrak tak a nit a; khasikin, mihein, “Nimroda angkan Pumapa khan kut inrakin nang siam riseh,” an iti ngai a nit. 10Ân lal phutna chu Babilonah hei, Erekah hei, Akad-ah hei#10:10 Hebrai tiang chu ‘Akad khuahei, Kalne khuahei’ iti a nit. a nit a, an rêngkah hin Sinar rama om korong an nit. 11Kha rama rithokin Asuria ramah a fe a, amakhan Ninevi khuahei, Rehobot-ir khuahei, Kala khuahei ân ding a. 12Ninevi neh Kala kho kârah an khopui tak Resen khom a siam a.
13Mizraima richihei chu: Ludi mihei, Anam mihei, Lehab mihei, Nafta mihei, 14Pathros mihei, Kaslu mihei. Hi mihei hih Filistia neh Kaftor mihei chibul an nit.
15Kanana khan nai lutîr Sidona a nei a, Hetha khom a nei nôk a, 16Kanana khah Jebus mihei, Amor mihei, Girgas mihei, 17Hiv mihei, Arka mihei, Sin mihei, 18Arvad mihei, Zemar mihei neh Hamath mihei richi rithokna khom a nit. Khanungah khan Kanana richihei khah an inzar a, 19an ramrî khah Sidon khua sim tianga rithok Gerar ridîna Gaza khua dênin; sua tiang Sodom, Gomora, Adma neh Lasa khua kôla Zeboim idênin a nit. 20Khahei khah Hama richihei, anmani nam chita om a, anmani ram chit ilua a, anmani ṭong chit imanga omhei chu an nit.
21Jafeta ulianpa Sema khah Hebrai mihei chibul a nit. 22Sema naipahei chu: Elama, Asura, Arpaksada, Luda, Arama hei an nit. 23Arama naipahei chu: Uza, Hula, Gethera, Masa hei an nit. 24Arpaksada khan naiipa Sela a nei a; Sela khan nai Ebera a nei a. 25Ebera khan naipa pasal inikah a nei a, â khatna riming khah Pelega a nit a, a dam lâiah khan rammuala miriamhei hih iṭhenin an om tâk sikin Pelega#10:25 Hebraiin ‘Ikhoi, inṭhen’ tina a nit. an isak a nit. A dang khatka riming khah Joktana a nit. 26Joktana naipahei chu: Almodada, Selefa, Hazarmaveta, Jera, 27Hadorama, Uzala, Dikla, 28Obala, Abimaela, Seba, 29Ofira, Havila, Jobaba hei khah an nit. An rêngkah hin Joktana richihei korong an nit. 30An omna ram chu Mesaa rithoka Sefar idênin a nit a, khosak tiang tlângram murdi ai huam a nit. 31Khahei khah Sema richihei, anmani nam chita om a, anmani ram chit ilua a, anmani ṭong chit imanga omhei chu an nit.
32Kha mihei murdi khah Nova richihei, an richi risui dân angka chit a, nam tin zuang risuihei chu a nit. Tui liansâng nungah khan kha namheia rithoka khan rinêngah hin chi tin an îndar tâk a nit.
Currently Selected:
RIPHUTNA 10: BIATBSI
Highlight
Share
Copy
Want to have your highlights saved across all your devices? Sign up or sign in
The Bible Society of India
© 2014, Used by permission. All rights reserved. More
