LUK 9
9
Jisuke Midum Íying Kolang Annyiem Megoolíkname
(Mt 10:5-15; Mk 6:7-13)
1Jisu bí midum íying kolang annyidem tomdum supala, bulum ralnamem, uyu takamem monpak kunana delokke kinam ramnamem ipí kunana ralnamem bilíkto, 2delokke bí Shédíke yétem pogoola delokke kina kídíem ipí dokupe emla bulum megoo líkto. 3Bí bulum poto, “Enna gínana atí míímapeka- banggén dokom, ege galuk apek dokom bommapeka. 4Ingkona ekumlo no enayédí nokke gílen kumangem delo taondelo duulangka. 5Ami kídíe nolum torík sumang yémílo, bulum mepak sunana iyodpe, no buluke taon delokke gílen yékuem, nokke ale pemugem danbínsula gílangkuka.”
6Depe iname bulu enlenla delokke doolu doolulo tatpona ngiitomem pogoola delokke rego regolokke amikídíke kinamem ipígoola yéto.
Herodke Míngasuname
(Mt 14:1-12; Mk 6:14-29)
7Sike legang takam sim Herod roja, bíkke aapíde míngkén mííyén yimape ito; kapeila ayokone Joanme sikolokke kiirep tungku emla poto, 8ayokone Elijah bí lendungku emkai, delokke ayokone kerango kake kaaluna miriko lendoku emto. 9Idakkom Herod bí pokai, “Ngo Joanme patuto. Sékoi demílo si ngokke tatnam kídísi?” Delokke ila Herod bí bím kaape emla ralkai.
Éjar Pilngo Amiem Jisuke Doboname
(Mt 14:13-21; Mk 6:30-44; Jn 6:1-14)
10Tomlíknam kídíde enlangkula, Jisume buluke inam saanam takamem pokan subitoku. Delo bí bulum gíbola delokke bulu Bethsaida, emnam taonlo agí agíe gítoku, 11idakkom milude dem tatla bíkkíng gímín gekai. Bí bulum aipe toríksuto delokke Shédíke yéta legangem pobola, delokke ipí kosulína kídíem ipíto.
12Doonyie adenge irodem íying kolang annyide bíkkíng aala poto, “Bulu ayir agong doolung kídíso gíla ipkeng dongkeng mata sudope amikídí sim melík tokuka, kapeila ngolu mootengko amolo dung.”
13Bí poyansukai, “Nolu bulum donamko bilangka.”
Bulu pokai, “Ngoluke lub roti pilngo kolang ngopil annyi petomko dung, ngolu gíla rebimadem siddína mibamso pííbo sumayé.” 14(Delo jarngo kopekai amie ito.)
Idakkom bí bíkkíng luyilsuna kídídem poto, “Íying pilngo opéé opéépe bulum duumotoka.”
15Luyilsuna kídíde depe imoto, delo mipil miyonge dungkai. 16Lub roti pilngo demlang engo pumsudem laala, teyong danpe kaadu sudola, bí dekedem yidgeto, delokke pento. Delokrongem bí dekedem luyilsuna kídílo amiem joobidope emla mebito. 17Bulu takame dola delokke luyil suna kídíde dongadem aapé bííne aapé íying kolang annyiko tídum sutoku.
Pitorke Jisume Agíkepe Posuname
(Mt 16:13-19; Mk 8:27-29)
18Longeko Jisu bí rongngampe bíkkelo luyilsuna kídídem duubosula kumsu dungem, bí bulum íngkíto, “Ami kídíe ngom séko emla podun?”
19Bulu pokai, “Ayokone Joan Baptist bí; ayokone Elijah; delokke abíde kerangke kaaluna miri akone turlat sudungku” emla podung.
20“Idola nolu kape míídun?” emla Jisu bí íngkíto. Pitor bí pobito, “Shédíke Kristo bí.”
Jisuke Agí Sipe Nyokpenamem Pokansubiname
(Mt 16:20-28; Mk 8:30—9:1)
21Jisu bí, dem séko meteng pokan madope bulum pogapto. 22Delokrongem bí pokai, “Tanike Ue deddína adírem dírgela mirokídíe, ríne kídíe, ukil kídíe akdope iyé delokke bulukíng petkosuyé depe idokom ibum rohlo bím kiirepyéku.”
23Delokrongem bí bulum takam pokai; “Séko ngokke méélamlo gípe míídudí, bí agíem mepak superung aido delokke agílo loodíke kross em bomla ngokkíng gímín gepe aido. 24Kapeila séko agí turnamem mosing supe míídudí, bí dem menyok suyé, idakla séko ngokke legape agí turnamem menyok sududí bí dem bomgapyé. 25Tanie tani among tabungem paadola, agí turnamem menyok sumílo ingko laabko kadon? 26Séko ngomlang delokke ngokke agomem annying dudí, teyong Abuke angun ralnamlok delokke deena teyong kotoki kídíem aabo sulangkula aayékuem, Tanike Uekom bím annyiyéku. 27Ngo nolum arope podung, so dakna ayokonekom bulu Shédíke amongem kaama tetengem simape duupoyé.”
Jisuke Angukon Amipe Ballupname
(Mt 17:1-8; Mk 9:2-8)
28Longe píínyiko sim agom kídar sim popala yérongem, bí Pitor, Joan delokke Jems bulum gíbosula díítelo kumsukape emla saato. 29Bí kumyédem, bíkke ege galuk kídare yaari angun kísa punname ikai. 30Midum annyiko, Mosilang Elijah, 31teyong amolokke angunlok lengkan sula Jisume luposukai. Kape kísa bí Jirusalemlo gíla sila, Shédíke mííbom namem ipííyédí, dekedem Jisume pobosula dakto. 32Pitorlang bíkke angong kídíe ipmie ito, idola bulu darngo suyékudem, bíkke angun ralnam emlang bím midum annyiko dakbosula dakdope kaato. 33Ami kídíe Jisume gínyokupe iyédelo, Pitor bí bím poto, “Poyilne, ngolu so duunamde duujidung. Ngolu so dongko angumko molaju, akonem nokkepe, akonem Mosikepe, delokke akonem Elijah kepe.” (Bí ingkuem podungadí kénsuyimang)
34Bíkke dekepe podungem muklemko aala bulum yéllum bomkai, delo bulu doomug aralo duunamdem pesorupe mííto. 35Doomug gooralok agomko polento, “Si ngokke ullennam Ue, bíkke agomem tatlangka.” 36Agom poyin rodem kaaname Jisu petom duudope bulu kaato. Bulu ingkuem delo kaatodí luyilsuna kídíe dem sékomete pomape agí agí aapílo gesuto.
Atímana Aide Duubomnam Kookonem Jisuke Ipíkuname
(Mt 17:14-18; Mk 9:14-27)
37Longekon delo bulu dííte delok oyi yékuname, mibam bamdíko bulum gíríkdo. 38Ami goora delok amikone goktoola pokai, “Luyilbona babue, ngokke uem kangkíbika emla nom ngo rogudung, kapeila bí petom ngokke ue. 39Uromko bím duulub bomla bím amobelo dan goosula nappalok apud ayude lendope iyardung. Si aid si bím duudan teteng bomla bím nyokmope idubong. 40Ngo nokkelo luyilsuna kídíem sim ipak bidokupe rogutuai, idakkom bulu paklamato.”
41Jisu bí poto, “E aro míímana bulna siiruma, edítko nolukíng ngo yébosula duubo supene? Nokke oodem so langaatola.”
42Koo delokke aadak emkom uromde bím dan go sudope amolo geletto. Idola Jisu bí deemana uromdem lupakla, koodem ipí palangkula bím abulo melat líktoku. 43Delo bulu takame Shédíke ralnamem kaala irí sinyo rupe mííto. Mipile Jisuke inamdem kaala sai emla mííduem bí luyilsuna kídíem poto, 44“Ngokke popenam agom sim tatgap tola: Tanike Uem tani alaglo yadlík dakbong.” 45Idakkom de kape emnamei dem bulu aipe kénmato. Kapeila de agomde buluke kénpí míípí mangkolo dungada, delokke bulu bím dem legadem íípe namemte pesoto.
Sékoi Botte Yalumnade
(Mt 18:1-5; Mk 9:33-37)
46Sékoi botte yalumne emnam agom dem luyilsuna kídí aradelo pétkí lukí sulenkai. 47Jisu bí buluke aapíem kénla, aména kooko gakla bím bíkke ampedelo dakmoto. 48Delokrongem bí bulum poto. “Ngokke amínlok séko bulu sim koo aména sim torík sududí de ngomkom torík sudung; delokke séko bulu ngom torík sumadí ngom melík nemkom torík sumang. Kapeila séko noluke takam aralo améyalum dudí bímin botte yalumnade.”
Séko Nolum Akmadudí De Nolukepe Idung
(Mk 9:38-40)
49Joan bí poto, “Saare, ngolu nokke amínlok uyuem monpak kuna amiko kaato delokke ngolu bím lutumkíto, kapeila bí ngolu kemang.”
50“Bím luya mapeka” emla podola Jisu bí poto, “Séko noluke mirupe imadí de nolukepe idung.” emkai.
Samari Doolunge Jisume Torík Sumaname
51Bím teyong amope laadíkue píínín rodem, Jisu bí Jirusalempe enperung mííto, 52delokke bí kotokiem megelíkto. Bulu Samari doolunglo atíem bíkkepe iruudope gíto. 53Idokom delo duuna ami kídíe bím torík sumato, kapeila bí Jirusalem danpe endak. 54Delo luyilsuna kídí, Jemslang delokke Joan bínyi kaayédem, bínyi íngkíto, “Ruutume, no taleng telok eme tokla bulum guyindope ngolum kummope míídon?” 55Idakkom Jisu bí ngengkut sudo langkula bulum marbomto, 56delokke delo bulu doolung konlo gíto.
Jisukíng Gímín Gere
(Mt 8:19-22)
57Bulu bedalok gídungem amikone bím gokkai, “No ingkolo gíyédí ngokom gímín gepe.”
58Jisu bí poyansuto, “Ménsurungke arung kado delokke pettangke asup kado, idola Tanike Ue agíke dumpong emte leepeko kamang.”
59Ami akon dem bí “Ngokkíng gímín gelangka” emto idakkom amide poyansuto, “Ruutume, kerape ngom gíla ngokke abuem yusu pomokui.”
60Jisu bí bím “Sina kídíem sinem yusu molangka, idakkom no gíla Shédíke yéta legangem pogoo bitoka” emto.
61Delo ami konkote aala poto, “Ruutume, ngo nokkíng gímín gepe; idola kerape gílangkula ngokke ekum erangem kaarík supo mokui.”
62Jisu bí poyansuto, “Séko, aalem gurlen dola méélampe kangkut suyédí, bí Shédíke amolo loorí mane.”
Currently Selected:
LUK 9: adiBSI
Highlight
Share
Copy
Want to have your highlights saved across all your devices? Sign up or sign in
Adi (Re-edited) Bible - Deena Baibél
Copyright © Bible Society of India, 2012.
Used by permission. All rights reserved worldwide.
