KEYUM KERO 26

Gerarlo Isaakke Duuname

1Abrahamke longe delokke dírí kísa delo longe delo díríe ila, Isaak bí Gerar lo Philistia roja Abimelek kíng gíto. 2Ruutum bí Isaakme lengkan sudola poto, “Ijiptlo tokmape, ngokke duulangka, emko amonglo no duulangka. 3So amoso longko loonyi duupo langka. Ngo nokkíng yémín gela nome utepooroem ruulíkyé. Kapeila ngokke, nok abu Abraham keelo ingkoko toge sutuadí dem ipíng líkpe, nok otíng oyinlo lang nokkíng sim asi among sim ngo biyé. 4Ngo nokke otíng-oyinem taleng telokke takar kísa bojémoyé, delokke sim asi-among sim biyé. Nokke otíng-oyinlok tani among sokke opín tabunge, ngokke utepooroem paayé. 5Kapeila, Abraham ngok agomem tatla, ngok míínampe yéla, ngok ngiitomem, ngok polígem delokke ngokke podu-potok ségupe yéto.” 6Depeila Isaakbí Gerarlo duuto.

7Edílo delokke ami kídíe, bík mime legangem íngkí todí, delo bí sipe poyan suto, “Bí ngok bírme,” kapeila bí “Ngok mime,” emla pope pesoto. Legade, “Rebekah bí kampodung, iname bík legape ngom ami kídísi mokapelo,” emla bí míísuto. 8Isaak delo longe delo bojéko yérongem, Philistia lokke roja Abimelek bí, longe konem kirki lok, Isaak mela Rebekahme mííbo sudupe kaatokto. 9Delo Abimelek Isaakme tomla poto, “‘Bí ngokke bírme,’ emla kape no mankan? Bí nokke mime pelal idune.” Isaak poyan suto, “Bíkke legape ngom moka pelo emla ngo mííto.”

10Delo Abimelek poto, “Ngolum no kape sikepe ikan? Ngoluke amikone nok mime delo ipmín getuamílo, ngoluk teyolo no ebínko ilíkyai.” 11Delo Abimelekbí bíkke ami kídíem, “séko amiedí, sim ami sim demangkom bík mimesim ipusilééla iyédí, dem ngo mokayé,” emla pogo moto.

12Isaak bí delo among delo arík ila delo dítak delo bojérupe ali-ayém isito; kapeila, Ruutum ke utepooroe bíkkíng kalíkto. 13Amide miremla bíkke ekuserange bojé momo ila remkín alongkai. 14Bí bojérupe gooru, sobén, mér delokke béérang kídíe kala Philistain kídíe bím neto. 15Depeila bíkke abu Abrahamke longelo, edítko abu lokke béérang kídíe asi déérungem kootodí, dem takam, Philistain kídíde kédélok gekap kapyinto.

16Delo Abimelek Isaakme poto, “No ngoluke sokke gígéé langkuka, no ngolum pemílo ralyana ami kope ikai.” 17Depe pokolok Isaakbí delokke gígéé langkula Gerar yiibelo duungatoku. 18Abrahamke sirongem, Philistain kídíke gepin kunam, Abrahamke longelo asi déérung koonam kídíem, Isaakbí lekoda koosi-koomo toku, delokke lembít amín mínkampe bí amín kídíemte mínlík toku.

19Isaakke béérang kídíe yiibe delo asi déérung aníko koone, sirung ko koopato. 20Idola Gerar lokke taro kaabomna kídare, Isaakke taro kaabomna kídíem, “Si asisi ngoluke,” emla lumín sula asi déérung delokke amínem Esek #26:20 Esek: Akmín sunam. emla mínto, kapeila delo bulu bíme lumínsuto.

21Delo bulu angukon asi déérungko kootoku, demte ami kídíde lumín subomla, bí Sitna #26:21 Sitna: Mirupe inam. emla amín mínto. 22Depeila delokke bí gígéé langkula, moolop konkolo asi déérungko kootoku. Delo sékote lumín gemato, depeila, “Ruutum bí ngolum among so sadínpe jéla remla idokupe moolobem bitung,” emla deme bí Rehoboth #26:22 Rehoboth: Sadín among. emla amín mínto.

23Delokke bí Beershebape saatoku. 24Delo yoh delo Ruutum bí, bíme lengkan sudola poto, “Ngo nok abu Abrahamke Shédíe. Pesomapeka, kapeila ngo nokkíng yémín gedung. Nok teyolo ngo utepooroem ruulík bila, ngom agér ibina Abrahamke legape nokke otíng oyinem parmoye.” 25Delo Isaak rungguko píla, Ruutum me kumsuto. Delo bík tombuem ilíkla, bík béérang kídíe asi déérung ko kooto.

Isaak keelang Abimelekke Daapong Ibosuname

26Abimelek Gerar lok bím poyilna Ahujjath melang bík sipaying ruutum Phikolme gíbola Isaakme kaangato. 27Isaak bulume ííto, “No ngok mirupe ipala, ngom lupak palang kula kape no ngom supak kaangadune?” 28Bulu poyan suto, “Nokkíng Ruutum bí kadung emla ngolu arope kaapato. Ngoluke lang nok pénsamlo daapongko ibosulape delokke elík bosunam kebangko baabo sulape. 29Ngolu kape kísa, nom ipusilééla imape, ai-kampo ila nom aiyope melík tokudí, dekepe ngolumte no atímape ipe aimang delokke no Ruutum ke utepooro ruulíknam emte paadung.”.

30Delo Isaak bulum doman doboko ibola, bulu dola-tííla ibosuto. 31Roh kondem rokompe, bulu buluke aradelo agom-aangem elík bosula, pobosula ibosurodem Isaak bulum kaalíkla, bulu aapí-aange eetetpe enkaku.

32Delo longe delo Isaakke béérang kídíde buluke kootonam asi déérung konggang em popadola, “Ngolu asiem paato,” emla bím poto. 33Depeila bí moolop dem, Siba #26:33 Siba: Písunamlok déérung demangkom Kínídlok déérung. emto delokke silo peteng doolung delokke amínem Beersheba emdung.

34Esauke takying appi rodem, bí Hittit ami, Beerike ome Judith melang Hittit ami, Elonke ome Basemath bínyim mimepe laato. 35Delokke bínyi Isaak keelang Rebekahke yénamem yényimoto.

Currently Selected:

KEYUM KERO 26: adiBSI

Highlight

Copy