KEYUM KERO 25

Abrahamke Siname

1Abraham Keturah emnam mime konko bomtoku. 2Bí Jimran, Jokshan, Medan, Midian, Ishbak delokke Shua bulum obitoku. 3Jokshan bí Sheba keelang Dedanke abupe ito. Dedanke otíng kídíe Assurim, Letushim delokke Leummim. 4Midianke oo kídíe Ephah, Epher, Harok, Abida delokke Eldaah. Si takamsi Keturah keelok lenne.

5Abraham bí Isaak kelo, bík bomnam ekuserang ato kídí takamem melíkto. 6Idola bíkke turdungem, bíkke éémé kídílok onam oo kídíemte aman bila, Isaak kíng duubo sumadope, among delokke sanggodan amolo mepan sulíkto.

7Abraham apíípe dítak língko kolang tagying kíníd kolang takngoko yéto. 8Abraham bí mijing jingkakpe yérongem sikai. 9Bík oo Isaak lang Ishmael bínyi, bíme Mamre ayirlo duuna Hittit ami Joharke oo, Ephronke aríkpe ituana, Makhpela díítum bupík delo yuto. 10Aríkde Hittit ami lok Abrahamke rename. Delo bík mime Sarah kíng lekope Abrahamme yubo sulíkto. 11Abraham ke sirodem, bík oo Isaak me Shédíbí utepooroem ruulíkto. Isaak Birlahairoi moolop anínlo duuto.

Ishmaelke Odonge

12Sarahke paknepe ina, Ijipt mime Hagarke Abrahamme obinam Ishmaelke odonge.

13Si okorpe odong signame: Ishmaelke opong yalumname, Nebaiot, delo Kedar, Adbeel, Mibsam, 14Mishma, Dumah, Massa, 15Hadad, Tema, Jetur, Naphis delokke Kedemah. 16Sikesi Ishmaelke oo kídíe delokke bulu opín íying kola annyi lokke buku kídíe. Buluke amín kídíem buluke duupom-dakpom delokke doolung amín pete mínlíkto. 17Ishmaelbí dítak língko kolang takying angum kolang dítak kínídko turpala sikai. 18Ishmaelke otíng-oyine, Assiria danpe gíyém, Ijipt sanggo danlo duuna Habilah kelang Shur pénsam amolo dungkai. Bulu Abraham keelok lenna abíd-abíd otíng kídíem dungusula dungkai.

Esau melang Jakob me Oname

19Si Abrahamke oo Isaak ke dooyinge, Abraham Isaakke abue, 20delokke Paddan Aram lokke Aramean ami Bethuelke ome delokke Aramean ami Labanke bírme, Rebekahme mimepe laado delo Isaakke dítage takying appito. 21Isaakbí Ruutum me, mime delok legape kumto, kapeila mimede negen kuai. Ruutum bí kumnamem tadbila Rebekah koo gekai. 22Koo kídíde, ane akii aralo nelmínsula anede agíem emsuto, “Ngokkíng kape sikepe ikan?” Depeila bí Ruutum me íngkíto.

23 Ruutum bím poto,

“Opín annyiko nok akiide gedung.

Nokke lok olen pename ami annyiko,

de yépan suyé,

akonem akone ralyayé

delokke abíyade aníyangem agér ibinape iyé.”

24Bíkke odí longe píírodem kaatoname oo annyiko bíkke akii delo gedung. 25Kerang yape lennade yalíla, amíl tabunge amíd ege gena kísape, amíde ila bím, Esau emla amínem mínto. 26Delok rongem bík bírode lenmín gela, Esauke leduem ummín gela ikolok, bím Jakob emla amínem mínto. Rebekahke bínyim odo dem Isaakke dítage takying akkéko ito. 27Edílo koo kídíde sisaa todí, Esaubí apta miyokpe ila, moonam lokke amipe ikai delokke Jakob bí dengomna amipe ila, tombulo duutímínnape ito. 28Isaak Esaume ayang yato, kapeila bí Esauke aptaem domín geto, idola Rebekah Jakob me ayang yato.

Esauke Obíng Tarongem Kosuname

29Longe konem Jakobke pééron amí raadungem, Esaubí aptalok akii keno runge ila enatoku. 30Bí Jakobme poto, “Ngo keno aloodung, ngome líína pééron amí delok bitola.” (Sok legape bíme, Edom emlateng míntuai)

31Jakob poyan suto, “Kerape nokke oo obíng tarongem ngokkíng kolík tola.”

32Esau poto, “Kaatola, oo obíng tarong de ngom ingkona aiko iyén, ngo kenolok sidakbong.”

33Idola Jakob poto, “Kerape pésupoto.”

Delo Esaubí pésula bíkke oo obíng tarongem, Jakob kelo kolíkto. 34Delo Jakob bí, Esaume pééron amí delok lang burla goona ettíng eke bito. Bí dola-tííla ipala gíkaku. Dekepe Esaubí agíke oo obíng tarongem míípak suto.

Currently Selected:

KEYUM KERO 25: adiBSI

Highlight

Copy