KEYUM KERO 18

Mibo Angum Lokke Kaanganame

1Longe raadang kolo, tombu eyab keralo Abrahamke duudungem, Ruutum bí Mamre lokke kumsuko esing kolo lengkansuto. 2Abraham kaatoname midum angumko, bík anínlo dagdupe kato. Edílo bí bulum kaatodín, delo bí bík dungko delokke gíríkla amonglo pelala kumto. 3Bí lupoto, “Noluk keralo ngom ayang kaapaatumílo E Ruutum, ngom gíbong mayika, 4ngom asiko laabimoi, delo nolu alem arbínsula, esing rumkíngso apéétoka. 5Noluke béérang keraso aabinam legape, ngo dopenam anyongko itabiyé. Delo nolu dola-tííla, noluke gígosupe gísudokupe.” Bulu bím poyansuto, “Aiyé, nok pokampe itola.” 6Delo Abrahambí tombulo menape aalangkula Sarahme poto, “No menape tírkak angumkope gairuna atalok laala burla goona ettínglok ito.” 7Delo Abraham gooru alung delo lomala, ngella gairuna rubílko umla béérangem bito; delo béérade keenyupe lombomkai. 8Depe irodem bí gakír, dohi delokke keenyunam adín emla abíd donam kídíem buluke keradelo lengabito. Buluke doduem, bí esing rumkíng delo buluke anínlo dakto.

9Bulu bím poto, “Nok mime Sarah bí ingkolo?” “Bí tombu arang esi,” emla bí poyansuto. 10Delo Ruutum bí poto, “Silo kísana moodílo, ngo lekoda lunnying aayéku, delo nok mime Sarahbí ooko oyé.” Dem agomdem bík méélam delo, tombu eyablo dakla, Sarah tatsito. 11Abrahamla Sarah bínyi mijing eejo bosudobong. 12Dem tatla, Sarah agíe ngilsula posuto, “Ngok miloe mijila, ngote eejola irodem, ngo erapnamko kayé adadí?” 13Ruutum bí Abrahamme poto, “ ‘Ngo eejokai, kape kísa ngo kooko gelayé adan,’ emla kape Sarahbí míísula ngilkane? 14Ruutum ke ilamanam kadunia? Lunnyingke sikena moodílo ngo aayéku, delo Sarah bí ooko oyé.” 15Delo Sarah pesola topaksula manto, “Ngo ngilmang.” Idola bí manto, “Ma. No arope ngilto.”

Sodom Keepe Abrahamke Roguname

16Delo ami kídíde gerep langkula Sodompe kaasuto delokke Abraham, bulum yamlík mínpe gímín geto. 17Ruutum agísue posuto, “Ngo ingko kodí ipe emla idudí, dem ngo Abraham keelok rumnyokmayé. 18Kapeila Abrahamke otíng-oyine, bottena opín kope iyé, delokke tani amongke opín kídíe, Abraham keelok, utepooro rulíknamem paayé. 19Ma, kapeila bíkke ome-ue, bíkke otíng-oyin loope, Ruutum ke bedalok yédope delokke ingkuedí deene delokke aine, dekeme poyilsula ikolok, ngokke pésunamem bíkke teyolo, ngo ipíng líkdope bím ngo tomlensuto.”

20Delo Ruutum bí poto, “Sodom kelang Gomorrahke piyyange bottekai, 21ngokkíng píína piyyang agomde aroedí, aromangedí, ngo gíla kangkíyé.”

22Delo midum annyide delok gílenla Sodompe tokto, idola Abrahambí Ruutum kíng asoope dakmín geto. 23Delo Abraham aaníndola poto, “No arope deena amiem, atímanalo nyoktak sumoyénía? 24Míngkítoka, doolung elo midum íying pilngoko deena amie kadung emmílo, buluke legape dooludem, mesiimape nyokmoyénía? 25Atímana amilo deena amiete nyoktak sumonam agérde, nokkelok mooteng daklangka. Demamílo, de deenem atímanalo akampe míílíkname. Nokkelok dekena ségue mooteng daklangka. Tani among takamem kebang lubinade deenampe ipe aiyé.”

26Delo Ruutum bí poto, “Sodom aralo midum íying pilngoko, deena amiem paayémílo, buluke legape Sodomem, ngo nyokmomayé.” 27Abraham poto, “Ngo nok keralo atí popemane, kapeila ngo kédéng lok pínam taniko, iname ngokke sikepe aapí bottepe íínam sim, no ayang bilangka. 28Míngkítoka, midum íying pilngo ayanpe midum íying appi kolang pilngoko kamílo, buluke legape dooludem nyokmo yénía?” Ruutum poyansuto, “Midum íying appi kolang pilngo legape, ngo nyokmomayé.” 29Lekoda Abraham íngkítoku, “Midum íying appiko kamílo?” Bí poyan suto, “Midum íying appi legape, ngo imayé.” 30Abraham lekoda potoku, “E Ruutum, no marmapeka, ngo lekoda ííyéku, midum íying angumko kayémílo?” Bí poyan suto, “Midum íying angumko paamílo, ngo imayé.” 31Abraham lekoda potoku, “Ruutum nok keralo sipe aapí mirampe ponamem ayang bilangka. Míngkítoka, midum íying annyiko kamílo?” Bí poyan suto, “Midum íying annyi legape ngo nyokmomayé.”

32Abraham lekoda íngkítoku, “E Ruutum, no marmapeka, ngo sim agom atel sim íngkí poyéku. Míngkítoka midum íyingko kamílo?” Bí poyan suto, “Midum íyingko kamílokom, buluke legape ngo nyokmomayé.” 33Ruutum bí dekepe Abraham kíng lupo manmo ibosurodem, bí gíkaku delokke Abrahamte bíkke dungkolo gísutoku.

Currently Selected:

KEYUM KERO 18: adiBSI

Highlight

Copy