KEYUM KERO 17

Daapong Iyodpe Dínbíng Iyodsuname

1Edílo Abramke dugríge, íying konang kolang dítak konang todí, delo Ruutum bí, Abramme lengkansudola poto, “Ngomin Miram yalumna Shédíbí, ngok agomem tatla deenampe yélangka. 2Ngo nokkíng daapong ibosula, nome yagorupe parmoyé.” 3Delo Abram lebíng konídola kumsuto. Delo Shédíbím potoku, 4“Kaatola, ngok daapongem nokkíng ibosuto, no mití-maglíng opín kídíke abupe iyé. 5Nok amínem Abram emyimape, Abraham emyéku, kapeila ngo nom mití-maglíngke abupe imoyé. 6Nom ngo yagorupe parmola, nokkelok ngo opín kídíem kalenmola, nokkelok roja kídíete lenyé. 7Ngokke daapongem, ngonyike pénsam lolang nok otíng-oyin loope, agínpe iyar bompenam daapongpe imoyé, delokke nokkelang nokke méélam otíng-oyin keepeteng, ngo Shédípe iyé. 8Delokke nokke supakke yégongko among sime, nomlang nok otíng-oyin kídíem, sim takam Kanaan among sim agínpe bomyar bomdope ngo biyé, kapeila ngo nokkelang buluke Shédípe iyé.” 9Abrahamme Shédíbí poto, “No agísuelang nokke méélamke otíng-oyin kídíe, ngok daapong sim siirum-siirum loope bomyar langka. 10Simoko nolang nokke méélamlo, nok otíng-oyinke bomyarpenam ngok daaponge: noluke aralo milokong tabungde dínbíng iyodsuyé.#17:10 Dínbíng iyodsunam: Maksum attíngem gatnam. 11Nolu agí adínlo dínbíng iyodsuyé, simoko nokkela ngokke pénsamlo daapong iyode. 12Longe píínyina ojingem dínbíng iyodyé, delokke sime siirum-siirum loope, noluke agí osunam oo kídíemlang noluke mootelok laala agíke ekumlo duubonam delokke luyulok langaanam abíl milokong tabunge iyargela iyodsuyé. 13Si nokkelang ngok pénsamlo, ibosutonam turyarna daapong iyodem kaananape iyé. 14Ingko milokongedí agíke dínbíngem iyodsumayéne, bím ngokke amikope sanyimayé, kapeila ngokkíng bí daapong iyodem igemang.”

15Delo Shédí Abrahamme potoku, “Nokke mime Saraime, Sarai emyimape supak kelok ila, Sarah emla mínlangkuka. 16Ngo bím utepooro rulíkto, bíkkelok ooko olenmoyé; delokke ngokke utepooro agomlok bí opín kídíke anepe ila bíkke otíng oyin kídí aralok roja kídíe lenyé.” 17Delo Abraham lebíng konídola, migmue among danlo idola ngilla mííto, “Dítak língkona ami ngolang, takying konangna mime kooko ododín?” 18Depe mííla, Shédíme Abraham poto, “E, dekemílo Ishmaelme nok kangkolo yémotoka.” 19Shédíbí bím poto, “Ma. Nokke mime Sarahbí ooko geyé, no bím Isaak emla amínem mínlangka. Bík otíng oyinloope turyarna daapongem ngo bíkkíng ilíkyé. 20Ishmaelke legape ngo nom tatbito. Kaatola, ngo bík teyolo utepooro ruulíkla bojéko ome-uem kamola parmoyé, delokke bí roja íying kolang annyike abupe ila bím opín bottenakope imoyé. 21Idola Isaakke teyolo ngok daapongem ibosuyé, bím lunnyingke toodílo, sikena longelo, Sarahbí oodem oyé.” 22Agomem poyin bosurodem, Shédíbí Abrahamke keralok gíkaku.

23Depe irongem Shédíke pokampe, Abrahambí edung-erang lokke milokong tabungemla Ishmaelme, delokke olennam emlang renam milokong abíl takamem delo longe delo dínbíng iyodyinto. 24Abrahamke dínbíng iyodsudo delo bí takying konang kolang dítak konangko ido. 25Ishmaelme dínbíng iyoddo delo bík dítage takying kolang tagumko ido. 26Delo longepak delo Abrahamlang bík oo Ishmael bínyi dínbíng iyodsuto. 27Delokke bík edung-erang lokke milokong tabungemla olennam delokke renam milokong tabung emteng dínbíng iyodyinto.

Currently Selected:

KEYUM KERO 17: adiBSI

Highlight

Copy