KEYUM KERO 15

Shédíke Abramkíng Daapong Ibosuname

1Sikesim irongem Abramkíng, Ruutum ke agome kaarí-kaanyo kolok pííto, “Abram no pesomapeka, ngo nok tamte; nokke amane botteyé.” 2Abram poyansuto, “E Ruutum Shédí, nok amanem ingkokodí biyén? Kapeila ngo ome-oo kamadada, delokke ngok ekum lokke ruutumem Damaskas lokke Eliejermin ibomyén. 3No ngome ome-oo bimanam legape, ngok abíl konemin ruutumem doge bomyékune.” 4Delo Ruutum me bí podupe tattoku, “Si amisi nok ekurangem yége bommayé, nok agíke ue yégesuyé.” 5Delo Abramme Ruutum bí luyulo lenmopala poto, “Taleng telo kaadusudola takar kídíem hanla domílo hankíto; telok kísape nokke otíng-oyine iyé.” 6Abram Ruutum me míngkesuto, depeila bím Ruutum bí deena amikope toríksuto. 7Ruutum bí bím poto, “Ngomino nome Babilon lokke Ur doolung lok laalenla, sim amosim yébomdope tomlenna RuutumE.” 8Abram bím poto, “E Ruutum Shédí, ngo amosim yébomyé emla kapekísa kényén?” 9Bí bím poto, “No dítak angum-angumna ruoko, bénbílko, méroko delokke pekí kolang perong ooko ngok keraso bomalangka.”

10Dekedem Abram bomala pettang kídí kékondem raadanglok papansula, pakétonam tarong eelendem laaríksula, orek annyikope leeto. 11Edílo sogum kídíe simangdem aabomtodí, Abram dekedem monpakla ibomto.

12Doonyi uangdelo Abrambí pesola danname ila yagorupe immie iyato. 13Delo Ruutum bí Abramme poto, “No sim arope míílangka, dítak língko appi loope nokke otíng-oyine abílpe ila bulum iréé sinyola, bulu ami amolo magoodola yéyé. 14Idola bulum ipusilééla ina kídídem ngo edo rayéku, delokke edílo bulu delok gílen yékudí, bulu yagorupe ekuserang kala lenyéku. 15Idola no agísuedan mijing jingkaklo ai-kampope sila, nok abu buku kídarlo gíyéku. 16Bulu siirum appinalo so aalatsuyéku, kapeila Amorit kídíke deemang amoe apíngmangada.”

17Edílo doonyie uala kaamotodí, míkkíe ila, eme írna peking kolang írna meruko adín pakénam kídí pénsam delok gíto. 18Delo longe delo Ruutum bí Abramkíng daapong ibosudola sipe poto, “Nok otíng-oyin kídíem, Ijipt among lokke rísulok ila bottena korong Euphrateske pénsamso duuna, 19Kenit, Kenijjit, Kadmonit. 20Hittit, Perijjit, Rephaim, 21Amorit, Kanaan, Girgashit delokke Jebusit among kídí sim ngo biyé.”

Currently Selected:

KEYUM KERO 15: adiBSI

Highlight

Copy