MAK 8

Jisu Miyu Jarpe mi Diigo Hobiido

(Mt 15.32-39)

1 # Mt 15.32-39; Mk 6.32-44; Mt 14.13-21; Lk 9.11-17; Jn 6.5-13. Hiika myodu ho, hiira hempḛr miyuabuje datii, ho mohluko hang diisa nyimatii, mo mohka henjeajiñ atañmi gyola lala, ho mohlumi lutii, 2“Ngo miyu atañmi aroh do, niimpalukoda mohlu ngiika agiñho allo lohiñ lyiku dabo monkunii, ho hang diisa nyima; 3ho ngo matiirḛ mohlumi haya dopa ude ho kiiniñ doku koda, mohlu lembo ho ajju nyanedo; ho tange ada hempḛr adho hokii ahnya da.” 4Ho mohka henjeajiñ atañ lusitii, “Niihtañpa ngunu siika miyu atañmi yatañ hola talyi siika zabyo ho?” 5Ho mo mohlumi tahii biido, “Nunu ko yatañ penne do?” Mohlu lutii, “Pekkanuhe” 6Ho mo miyu atañmi lengo ho duha tote hiila lubiido; ho mo yatañ pekkanuhemi lala la, ho payapacho lula la mo petutii ho hiimi henjeajiñ atañmi bitii miyu atañmi bito hiila; ho mohlu hiimi miyu atañmi bitii. 7Ho mohluka agiñho ngiiyyi miilañ iche dotii; ho hiimi payapacho lulala, mo lubiido siika siimi miilañ mohlumi bito. 8Ho mohlu diitii, ho diide giinyatii; ho mohlu diile tale mi tukuñ tupa tuku, yagii giikkanuhe poteje. 9Hiiko ho miyu harje jarpe pahe datii. 10Ho mo mohlumi kiiniñ nempatii; ho nyibya loda mo huluho chatii mohka henjeajiñ atañka agiñho, ho Dalmanutha ka gandachie ho inyatii.

Parisi atañka Kagiñnanii Kakiñpe Kuniiñ

(Mt 16.1-4)

11 # Mt 16.1-4; 12.38-39; Lk 11.29. Parisi atañ ahtii ho mohmi cherii ritii, mohmi dariiganda hokii kagiñnanii kakiñpe hiila lutii, mohmi tenkala. 12Ho mo mohka Yajiyallo ura ho uropa samo lala, ho lutii, “Niimpape siika santuñ si kagiñnanii medonii? Jijeloda, ngo nunumi lukoso, hang kagiñnanii kakiñ kemake siika santuñ mi.” 13#Mt 16.4-12. Ho mo mohlumi opa tela intiiku, ho hiira huluho dacha kula mo pache dalyiho botii.

Parisi la Herod Nyika Ipo

(Mt 16.5-12)

14Siisi mohlu yatañ bagii sanii mi ahha ahii tii; ho mohluka agiñho yatañ pere kontii huluho dotii. 15#Lk 12.1; Mk 6.14; 12.13. Ho mo mohlumi hendi tote lutii, lubiidola, “hendi nyato, hendi nyatii ka ha Parisi atañka ipo hokiila Herod ka ipo nyi hokii.” 16Ho mohlu kone anya taka siinyatii, lubiidola, “ngunuko yatañ nyima.” 17#Mk 6.52; Mt 13.10-15. Ho hiimi chimpa lala, Jisu mohlumi lutii, “Niimpa nunu yatañ nyima hiila lusu nyada? Siisi lohepa nunu henchiñ ma malo tala nyama rampo? Nunuka ahha alḛr nyado kupo? 18Amee gusudo hojalo nunu kappa nyama, ho yaroo giisudo nunu tapa nyama ha? Ho nunu henge giimapo? 19#Mk 6.41-44. Ngiika yatañ pengo hemi ka jarngo hepa ka petu lyiho, yagii giine poteje petu pepo niimi nunu tukuñ tupato?” Mohlu mohmi lutii, “Giilyañlenye.” 20#Mk 8.1-10. “Ho pekkanu hemi ka jarpepa, yagii giine poteje petu pepo niimi nunu tukuñ toku?” Ho mohlu mohmi lutii, “Giikkanuhe.” 21Ho mo mohlumi lutii, “Siisi lohepa nunu tala nyama rañ ha?”

Jisu Micha Miyu Kone mi Miipya Biido Betsaida Ho

22 # Mk 10.46-52; Jn 9.1-7. #Mk 6.45; Lk 9.10. Ho mohlu Betsaida ho ahtii. Ho miyu tange micha miyu kone mi mohko ahgiitii, ho yartii mohmi tenka tope hiila mohmi. 23#Mk 7.33; 5.23. Ho mo micha miyu mi alah lo seritii, ho lemba ka agoho lingiitii; ho mohka amee ho chukḛr tima lala ho mohka alah micha miyu ka hahoho tembiitii, mo tahiitii mohmi, “Siisi no hang kappa doha?” 24Ho mo ayoh kacha lala ho lutii, “Ngo miyu atañmi kappa do, hojalo mohlu sannii chuli, ila do.” 25Ho hiira mo mohka alah mi micha miyu ka amee ho tengatii; ho mo hempḛr kaniila kaditii ho kappa ritii ku, ho kappane kadḛr tiiku. 26Ho mo mohmi mohka ude ho inke nentii ku, lubiido, “Lemba ura hotiirḛ ahlyayo.”

Pitar ka Jisu mi Hiila ku Hiilaka Goliñ Kuniiñ

(Mt 16.13-20; Lk 9.18-20)

27 # Mt 16.13-20; Lk 9.18-21; Jn 6.66-69. Ho Jisu mohka henjeajiñ atañka agiñho intii, Kaesarea Pilipi ka lemba ho; ho lembo ho ila dola mo mohka henjeajiñ atañmi takatii, “Ngiimi miyuatañ nii hiila luda?” 28#Mk 6.14. Ho mohlu lukotii mohmi, “Jon Baptisma binii bo; ho tange ludo, Elija; ho hiira tange, nyibu hennii kone.” 29Ho mo takatii mohlumi, “Hokoda nunu ngiimi hu hiila ludu?” Pitar lukotii mohmi, “No Masiah” 30#Mk 9.9; 1.34. Ho mo lutiñ biido mohlumi kone mitrḛ luko yayo hiila mo piigomi.

Jisu Mohka Heru saniiñ la Shiisaniiñ Piigo mi Ludo

(Mt 16.21-28; Lk 9.21-27)

31 # Mt 16.21-28; Lk 9.22-27. Ho mo tonsḛr ritii mohlumi Miyuka Oho hempḛr heru myanka henkiñdo, ho amiabañ atañlo khiipa kokiñdo ho nyibu burii ho pagenii atañlo, ho menko kendo, ho allo lohiñ niika hiiba ho hiira turku rikiñdo. 32Ho mo siimi didḛr lodapa lutii. Ho Pitar mohmi aruñho ahhi giitii, ho mohmi garitii. 33#Mt 4.10. Hojalo mohiibiila ho mohka henjeajiñ atañmi kadi lala, mo Pitar mi gatii, ho lutii, “Ngiika kiiliñ so dasato, Saitan! Niimpalukoda no Pinii dalyiho damake, hojalo miyu kii dalyike danii.”

34 # Mt 10.38; Lk 14.27. Ho mo miyu abujemi mohka henjeajiñ atañka agiñho gyola lala, ho mohlumi lutii, “Huna ngiika kiiliñ ho matiirḛ imbo talyinii, atoh mi hempa siike nento ho mohka pogyañ mi jobiila ho ngiimi imbo monto. 35#Mt 10.39; Lk 17.33; Jn 12.25. Niimpalukoda huna atoh ka sango mi lyangur siina donii hii hiimi alyu siikiñdo, ho huna ngiika piigopa ho aya puyu ka piigopa mohluka sango mi alyu siitiinii hii lyangur siida. 36Niimpalukoda hiika miyu pa nii injo dokiñdo, hikha supuñ mi biisu dojalopa ho mohka sango miya alyu siido koda? 37Niimpalukoda mohka sango pa mo nii billi siila kendo? 38#Mt 10.33; Lk 12.9. Huna ngiimi ho ngiika aguñpa hiinyañ talyi nii siika gollu misu ho ingyamiigya santuñ so, mohlumi Miyu ka Oho tiirḛ hiinyañ nyansi kendo niidana mo huda khada mohka Aba ko ahchi nii darii miidopopi agiñho.”

Currently Selected:

MAK 8: APATBSI

Highlight

Copy