MAK 6

Jisu mi Nazaret ho Khiipatii

(Mt 13.53-58; Lk 4.16-30)

1 # Mt 13.53-58; Lk 4.16-30. Mo hokii iri kula ho mohka atoh gandaho ahtii; ho mohka henjeajiñ atañ mohmi imbo montii. 2#Mk 1.21; Mt 7.28. Ho dumoalo ho mo sinagog ho tonsḛr ritii; ho hutiina mo luniiñmi tapa tiinii aluñ nyala, lunyatii, “No hokiina siika miyu si siika drih siimi tagii tiinii? Niitañ ka diilalula na mohmi bitiinii? Niitañ kaye miigo na mo alah loka miidanii! 3#Mt 11.6. Si hiika bitie miinii boma siiha, Mary ka oho ho Jems, Jose, Judas ho Saimon ka abañ, ho siikasi mohka barmii masu ha ngunu agiñho danii?” Ho mohlu mohmi khiipatii. 4Jisu mohlumi lutii, “Nyibuhenii bomi khiima miima, mohka atoh gandaho mohka atoh heniiñ myaniiñ, ho mohka atoh ude uru mi apalala.” 5#Mk 5.23; 7.32; 8.23. Ho mo hiiko kaye miigo miila matii, hojalo achih-ahe nii tonge mi tenka tii ho mohlumi tempya bitii. 6#Mt 9.35. Ho mo mohluka henje maniiñ mi hemurtii.

Jisu Alyañlenye Henjeajiñ mi kiiniñ biido

(Mt 10.5-15; Lk 9.1-6)

Ho mo lemba atañ ho ila tonsḛr tatii. 7#Mt 10.1,5,7-11; Lk 9.1-5. #Lk 10.1. Ho mo alyañlenye mi gyola lala ho anye anye mi kiiniñ biido, ho kacho Yajiyallo mi mompa nanii otority bitii. 8Mo mohlumi hangja bagii yo mohluka myodi inko ho panyi kontii biitolya lutii; yatañ bagiiyo, chiru bagiiyo, tiicko bagiiyo nunuka hupo ho; 9hojalo nyotananii kontii giitolya ho tarii tiirḛ benye alii giilyayo. 10Ho mo mohlumi lutii, “Nii ude ho nunu ahchi, hiika ude ho hiika lemba hokii inku menda hemi dutolya. 11#Mt 10.14. Ho nii ganda na nunumi karii tama nii ho nunu luniiñmi tate manii, nunuka ilyi kuho, nunuka alih daka siimu giinii lohepa pipa siito kulya aya miima keha hiila luko lugiñ naniiñpa.” 12#Mt 11.1; Lk 9.6. Hopa mohlu ila ho tonsḛrkhenyo tii miyu atañmi henkur dopa. 13#Jem 5.14. Ho mohlu hempḛr abuje igii mompa biido, ho kutu lo arrḛyartii abuje achih-ahe nii atañmi ho mohlumi miipyatii.

Jon Baptisma Binii Boka Shiiniiñ

(Mt 14.1-12; Lk 9.7-9)

14 # Mt 16.14; Mk 8.28; Lk 9.19. Herod radde siimi tapatii; niimpalukoda Jisu ka armyañ mi tapa tatii nyatii. Tange lutii, Jon baptisma biniibo turi dokuke; hopa siika miila naniiñ si mohmi miigii donii. 15Hojalo tange lutii, “Siikasi Elija.” Ho tange lutii, “Siikasi nyibuheniiñ, ayu hoka nyibuhenii chuli.” 16Hojalo Herod siimi tapa lala mo lutii, “Jon, humi ngo adiñ papato, hii turi do hiila.” 17#Lk 3.19,20. Niimpalukoda Herod kiiniñ lala ho Jon mi latu tii, ho pattiih ude ho rato la atiitii Herodias ka piigo pa, mohka abañ Pilip ka mihie, niimpalukoda mo mohmi mihie biitii. 18Ho Jon Herod mi lutii, “Niika abañ ka mihie mi no biila kemma ke.” 19#Mt 14.5-12. Ho Herodias mohmi kanañ matii, ho mohmi mempa nantii. Hojalo mo mela matii, 20#Mt 21.26. niimpalukoda Herod Jon mi biisotii, Jon denki ho darii miyu hiila chimbii tola, ho mohmi memma pa atiitii. Mohka piigo mi mo tapa lala, mo tadḛr biila mapa lyitii; hojalo mo hempyo biidola tatii. 21Hojalo aya myodu ronge ahtii Herod mohka budu allo ho mohka ajiñ ho sabii atañmi ho Galili hoka sangii gyagii nii atañmi sokuñ giitii. 22Ho Herodias ka nyimii wiinga ahbiila ho nasu sotii, mo Herod la mohkoka nyibo ahnii atañmi kaji dopa miipatii; ho radde lutii nyimii mi, “No nii kuna do kuto, ho ngo hiimi bichike.” 23Ho mo hemme biido mohmi, “No ngiimi nii kuchi kuto, Ngo niimi bichike, ngiika raddeganda khache hemi jalo.” 24Ho mo ago lintii ku, ho mohka annii mi lutii, “Ngo niihpe kuchinii?” Mo lusitii, “Jon baptisma binii boka adiñ mi.” 25Ho mo nyibya loda radde ko ahkurtii, ho kutii, lubiidola, “Ngo niimi nyibya loda ngiimi Jon Baptisma binii boka adiñ mi paaku ho bikiñ cho hiila hendo.” 26Ho radde hempḛr henkur tii; hojalo mohka hemme niimi la nyibo ahnii atañmi henka kulala, mo ma hiila mohmi luna kumatii. 27Ho radde nyibya loda sipahi dabii bomi kiiniñ biido ho Jon ka adiñ mi jolii bii hiila lubiido. Mo ila ho pattiih ude ho Jon ka adiñ mi patutii, 28ho mohka adiñ mi paaku ho jolii bitii, ho nyimii mi bitii. Ho hiika nyimii hiimi mohka annii mi bitii. 29Siimi mohka henjeajiñ atañ tapa lala, mohlu ahla ho mohka apo mi jobii tiiku, ho byuh ho alie tiiku.

Jisu Jarngohemi Diigo Hobiido

(Mt 14.13-21; Lk 9.10-17; Jn 6.1-14)

30 # Lk 9.10; Mk 3.20. Kiiniñkonii atañ Jisu ko ahkur tiiku, ho mohmi luko biido hikha mohluka miiniiñ-paniiñ ho tonsḛr niimi. 31Ho mo mohlumi lutii, Miilañru ngunu jirara myokoh ho lingila, ho iche hemmosa. Niimpa abuje ahii-akhe la lyitii ho mohlu diigo diidu patḛr myodu nyimatii. 32#Mt 14.13-21; Lk 9.11-17; Jn 6.5-13; Mk 8.1-10; Mt 15.32-39. Ho mohlu hulu pa jirara myokoh ho atoh atoh inyatii. 33Siisi abuje mohluka inniiñ mi kappatii, ho mohlumi kala nyatii, ho mohlu nyibya loda alih pa hara nyatii hikha taun hokii, ho mohlumi ahpyo yapa ahto kula datii. 34#Mt 9.36. Mo siimie biilyo ho linku kiile, mo hempḛr miyuabuje kappa biido; ho mo mohlupa aroh-aya giitii, niimpalukoda mohlu subuñ ka subuñsornii nyima niihtañ tii; ho mo mohlumi abuje drih tonsḛr ritii. 35Ho myodu impupa miikele, mohka henjeajiñ atañ mohko ahtii ho lutii, “Si jirara myokoh ke, ho myodu si siisi pahii dokuta; 36mohlumi kiiniñ toku, aruñare gandaho lemba atañ ho ila ho diigo tango iche mohlupa riido kiineto dudupa.” 37Hojalo mohlumi lusitii, “Nunu mohlumi diisa iche bito.” Ho mohlu mohmi lutii, Ngunumi ila ho riite hette hiila lanye denarii khiiniiñ yatañ, ho mohlumi dudu pa bitote hiila? 38Ho mo mohlumi lutii, “Nunuko yatañ penne do? Ila ho kakahe.” Ho mohlu kaka lala, mohlu lutii, “Pengohe, ho ngiiyyi sonye.” 39Ho mo miilañ rumi lubiido duhato jiji tammi hahoho tongepa. 40Hopa mohlu duha nyatii tongepa, tange lange ho tange alyañlyangohe. 41#Mk 14.22; Lk 24.30-31. Ho yatañ pengo hemi la ngiiyyi sonye mi lala la, mo yapuñ hahoho kachatii, ho lyantii, ho yatañ mi petu biido, ho henjeajiñ atañmi bila lala miyu atañmi bike nembii do; ho ngiiyyi sonye miilañmi tache tahe bibiido miilañ rumi. 42Ho miilañru diitii ho diide giitii; 43Ho mohlu yagii giilyañlenye poteje petu peponii ho ngiiyyi miilañ tiikuñ tiiku. 44Ho hikha yatañ diinii atañ milobo jarngohe diitii.

Jisu Yasie ho Indo

(Mt 14.22-33; Jn 6.15-21)

45 # Mt 14.22-33; Jn 6.15-21. Nyibyaloda mo mohka henjeajiñ atañmi huluho ducha kiine lala ho mohmi kapyo yapa pache dalyiho boke nentii, Betsaida gandaho, mohka miyuatañ mika nempya nensa tadoho. 46Ho mohlumi inke nenku lala, mo putoo ho chatii kudupa. 47Ho alyiñdalyi kukele, hulu mi siimie ho kappa kumatii, ho mo kontii kiiddi ho datiiku. 48#Mk 13.35.Ho mo mohlumi biiso biidola hata dalyi khobola dopa kappa biido, niimpalukoda mohluka hataho allyi uro hetii. Ho ayoh ka gunta tape niiho mo mohluka agiñho ahtiiku, yasie ho imbii dola. Mo mohlumi impo biipa miila dotii, 49hojalopa mohlu mohmi yasie ho ila dopa kappa lala, mohlu si uyi hiila hentii, ho gyuritii; 50#Mt 9.2. niimpalukoda mohlu hikha mohmi kappatii, ho biiso nyatii. Hojalo nyibya loda mo mohlumi luriitii ho lutii, “Haro nyato, si ngosu ke; biiso nyayo.” 51Ho mo huluho chatii ku mohluka agiñho ho allyi hengu ritii. Ho mohlu hempḛr hemur nyatii, 52#Mk 8.17. niimpalukoda mohlu yatañ ka piigo mitrḛ hang chindḛr lamatii, hojalo mohluka ahha hii alḛr nyatii.

Jisu Genesaret ho Achih mi Miipya biido

(Mt 14.34-36)

53 # Mt 14.34-36. Ho mohlu bochi biila, mohlu Genesaret gandaho ahtii, ho hulu mi aruñho rantu tola atiitii. 54Ho mohlu hulu hokii agoho daliñ dakele, ohe pada miyuatañ mohmi kala biidado. 55Ho hikha hiika ganda hoka ari-apii hii hara nyatii ho achih-ahe nii atañmi pepu ho jolii biitii mohmi da hiila tapa lala. 56#Mk 3.10; Mt 9.20. Ho mo noh ahchi ahja lopa, lemba jalo, citi jalo, malo ganda hojalo, mohlu achih nii atañmi biijḛr lengo miilañ ho giike nentii, ho mohmi kunyatii ngunumi niika pulye nyetañ mijalo tenne kiinepe; ho hutiina tenne nyatiinii hii hempyo nyatii.

Currently Selected:

MAK 6: APATBSI

Highlight

Copy