MAK 10

Jisu Byasunii Piigomi Tonsḛrdo

(Mt 19.1-12; Lk 16.18)

1 # Mt 19.1-9. #Lk 9.51; Jn 10.40; 11.7. Ho mo hiika hiimi apatela ho Judia gandaho intii ho Jordan mitrḛ impo yala, ho hiira miyuabuje mohmi bumpu biitii; ho hiira, mohka muju paka lyitiinii, mo hiira mohlumi tonsḛrtii.

2Parisi tonge ahtii ho mohmi tenkala mohlu takatii, “Milobo atoh mihie mika byasu niisi miidi kosu peha?” 3Mo lukotii mohlumi, Mose nunumi nii miitolya hiila lune? 4Mohlu lutii, “Mose milobomi byasu biilyi kuke hiila paniiñpota bilala, ho mohmi apalakiñ doke lune.” 5Hojalo Jisu mohlumi lutii, “Nunuka ahha alḛr kopa mo ketii siika lujubiniiñ mi nunupa. 6Hojalo puliñ biilyi jaho hokii, ‘Pinii mo anye mi milobola ho nyimii nyimi putii.’ 7‘Hopa siika piigopa milobo atohka aba la annii mi apatela ho mohka mihie ka agiñho duhiñ monkiñdo, 8ho anye hii konepa lyikiñdo.’ Hopa mo anye, anye kuma hojalo apo koneku. 9Hiiko hopa nii mina Pinii gadiñ siibi tiinii, hiimi miyu lupe nyayo.”

10Ho ude ho hiira henjeajiñ atañ mohmi siika piigo mi takatii. 11#Mt 5.32; Lk 16.18; 1 Kor 7.10-11; Rom 7.2-3. Ho mo mohlumi lutii, “Hu jalopa atoh mihie mi byasu tela ho koneya mihie lahchi hii ipfyodo. 12ho nyimii matiirḛ atoh milo mi byasu tela ho koneya biisḛr dokoda, mo ipfyoda.”

Jisu Himme Atañmi Lyambiido

(Mt 19.13-15; Lk 18.15-17)

13 # Mt 19.13-15; 18.3; Lk 18.15-17. Ho mohlu himme atañmi mohko ahgii bitii, niimpalukoda mohmi mohlumi tenne kiine dupa; ho henjeajiñ atañ mohlumi gatii. 14Hojalo Jisu hiimi kappa lala, mo herutii, ho mohlumi lutii, “Himme atañmi ngiiko ahke nento; mohlumi lutiñyo; niimpalukoda siika atañ sike Pinii ka raddeganda kii. 15Jijeloda, Ngo nunumi lukoso, hujalopa Pinii ka raddeganda mi siika himme chulipa larii tama hii ahla kemma hiikaho.” 16#Mk 9.36. Ho mo mohka lapoho mohlumi gola la, mohluka ayoh mohka alah mi tembii tola, ho mohlumi lyambiido.

Mingo Miyu Kone

(Mt 19.16-30; Lk 18.18-30)

17 # Mt 19.16-30; Lk 18.18-30. #Lk 10.25; Mk 1.40. Ho mo myodi impa irikele, miyu kone haratii ho mohka hataho liibañ khangatii, ho mohmi tahiitii, Denki tonsḛrbo, nii miido kodape ngo santḛrlamanii sango kappa kendonii 18Ho Jisu mohmi lutii, “Niimpa no ngiimi denki hiila ludu? Kone hetḛr denki make hojalo Pinii kontiisii. 19No lujubiniiñ mi chinne: ‘Nunu melyayo; Nunu ipfyoyo, Nunu diipyoyo; Nunu amuhpa haki pa dulyayo; Nunu talubalo yayo; Atoh ka annii aba mi khiito.’” 20Ho mo mohmi lutii, “Tonsḛrbo, ngo siika atañmi hikha ngiika yapa hokii heri budu.” 21#Mt 6.20; Lk 12.33; Miin 2.45; 4.34-35. Ho Jisu mohmi kadi biidola mohmi hentii, ho mohmi lutii, “No ngoya kone miichi make; inge, pyunge niiko hoka donii atañmi, ho arroatu atañmi binge, ho niika mingo hii dariiganda hoke dokiñ donii; ho ahla, ngiika kiiliñ ho imboto.” 22Siimi mo tapa lala mohka nyimo moyo ritii, ho heru biidola intiiku, niimpalukoda mohko mohkii abuje ganda nencha dotii.

23Ho Jisu kahi kaso lala ho lutii mohka henjeajiñ atañmi, “Niimkane ahru kendo mingo miyu atañpa Pinii ka raddeganda ho ahdupa!” 24Ho henjeajiñ atañ mohka luniiñmi tala lala aluñ nyatii. Hojalo hiira Jisu mohlumi lutii, “Himme atañ, niimkane ahru do Pinii ka raddeganda ho ahdupa! 25Uth ka pasu ubu hoka boniiya bopyo yakiñdo mingo miyu ka Pinii ka raddeganda hoka ahniiñmi hentola.” 26Ho mohlu hempḛr uro hemur nyatii, ho mohlu mohmi lutii, “Hokoda hu lyangur kola kendo?” 27Jisu mohlumi kadi lala ho lutii, “Miyu pakoda simi miila kemma, hojalo Pinii pamake; niimpalukoda kappa nehemi Pinii miila doke.” 28#Mk 1.16-20. Pitar lurii ritii mohmi, “Kato, ngunu kapane hemi apatekula ho niimi imbodu.” 29Jisu lutii, “Jije, Ngo lukoso nunumi, kone hetḛr huna atohka ude malo anuabañ malo barmii malo annii-aba malo himme-oho malo aji mi apatiinii, ngiipa jalo ho aya puyu piigo pajalo, 30#Mt 6.33. hii lange abuyapa siika santuñ so kappa kendo, ude ho anubarmii, annii ho himme-oho, ho aji, miihimiire ka agiñho, ho ahsanii santuñ ho santḛrlamanii sango. 31#Mt 20.16; Lk 13.30. Hojalo abuje huna kapyo danii hii kami kendo, ho kamihii kapyo kendo.”

Jisu Rohiñ niipa Mohka Shiiniiñ Piigomi Ludo

(Mt 20.17-19; Lk 18.31-34)

32 # Mt 20.17-19; Lk 18.31-34. Ho mohlu lembo ho ila dotii, Jerusalem lohe chadupa hiila, ho Jisu mohlumi impyo yapa intii; ho mohlu hemur nyatii, ho mohmika imbo monii atañ biiso nyatii. Ho hiira mo alyañlenye mi ingiila, mo luko ritii niihna mo sango lyikiñ tiinii, 33#Mk 8.31; 9.12; 9.33. lubiidola, “Kato, ngunu Jerusalem lohe chalyi; ho Miyu ka Oho mi nyibu burii la pagenii atañmi nembi kendo, ho mohlu mohmi mendopa halii kendo; ho mohmi Midomiyu atañmi nembi kendo; 34#Mk 14.65; 15.19,26-32. ho mohlu mohmi nyapa kendo, ho chukḛr chupu kendo mohmi, ho mohmi tarulo hikiñdo, ho mohmi menkiñdo, ho allo lohiñ niika hiibaho mo turku rikiñdo.”

Jems la Jon Nyika Kuniiñ

(Mt 20.20-28)

35 # Mt 20.20-28. Ho Zebedi ka oho anye, Jems la Jon nyi, mo aruñho ahhitii, ho mohmi lutii, “Tonsḛrbo, ngiinyi nii kuchi kuja lopa no ngiinyipa miibi dokoda hiila hendo.” 36Ho mo lutii mo anyemi, “Nii ngiimi niinyimi miibi kencho hiila hendo?” 37#Mt 19.28; Lk 22.30. Ho mo anye mohmi lutii, “Ngiinyi mi kone mi lahbi dalyiho kone mi lahchi dalyiho dudopa bilyape, Niika radde paka dulyiko.” 38#Lk 12.50; Jn 18.11. Hojalo Jisu lutii mo anyemi, “Niinyi chimake niihna niinyi kudo nii. Niinyi Ngiika taniiñmi tambo lakiñ dopeha, malo Ngo niilo baptisma latii hiilo niinyi labo lakiñ dopeha?” 39#Miin 12.2; Mih 1.9. Ho mo anye mohmi lutii, “Ngiinyi miila kendo.” Ho Jisu mo anyemi lutii, “Ngo niihna tandonii niinyi tiirḛ tangki doke; ho niihtañ baptisma na Ngo latiinii, nunu tiirḛ lakiñ doke; 40hojalo ngiika lahbi dalyi malo ngiika lahchi dalyi hoka dusa niimi ngo lula kema, hojalo siikasi hiipake hupana miimyo bitiinii.” 41Siimi midiñalyañhe tapa lala, mohlu Jems la Jon nyimi hadii ritii. 42#Lk 22.25-27. Ho Jisu mohlumi mohko gyolii lala ho mohlumi lutii, “Nunu hiila chindo Midomiyu ka punkoho huna sangiila dunii hii atoh hiilyañ mohluko dudu, ho mohluka kaye miyuatañ mohlumi otority ho biitola dudu. 43#Mk 9.35. Hojalo siikasi nunuka punkoho lyikiñ make; hojalo hujalopa nunuka punkoho kaye japa lyichi hii nunuka miirapa lyikiñdo lodake, 44ho hujalopa nunuka punkoho kapyo japa lyina donii hii miilañ ruka miirapa lyikiñdo lodake. 45#1 Tim 2.5-6. Niimpa Miyu ka Oho miiho kodupa ahmake miiho pake ahnii, ho mohka sango mi abuje miyu atañmi tupya nanii pa bipake ahnii.”

Jisu Micha Bartimayas mi Miipya biido

(Mt 20.29-34; Lk 18.35-43)

46 # Mt 20.29-34; Lk 18.35-43; Mk 8.22-26. Ho mohlu Jeriko ho ahtii; ho mo mohka henjeajiñ atañ ho hempḛr miyuabuje Jeriko mi apatela inku kiile, Timayas ka oho Bartimayas, micha myadobo, lembo aruñho dutii. 47#Mt 9.27. Ho mo siikasi Nazaret daka Jisu hiila tapa lala, mo gyuritii ho ludo, “Jisu, David ka oho, ngiimi arohpe!” 48Ho abuje mohmi gabiido, aduyo hiila lubiido; hojalo mo goro yapa gyutii, David ka Oho, ngiimi aroh-ayape! 49Ho Jisu damo lala ho lutii, “Mohmi gyoliito.” Ho mohlu micha miyu mi gyobiido, mohmi lubiido, “Heruyo; gurito, mo niimi gyodoke.” 50Ho mohka pulye miilañmi ripa datii hela mo gurila ho Jisu ko haratii. 51Ho Jisu mohmi lutii, “No ngiimi niihpe niimi miibi kencho hiila hendonii?” Micha miyu mohmi lutii, “Atoh, ngiimi kappa kiine kupe.” 52#Mt 9.22; Mk 5.34; Lk 7.50; 8.48; 17.19. Ho Jisu mohmi lutii, “Ingeku niika lemboho; niika henje ke niimi miipya biinenii.” Ho ohepada mo kappa ritii ho mo imbo montii lembo ho.

Currently Selected:

MAK 10: APATBSI

Highlight

Copy